ໂຈເຊັບ ສະມິດ ແລະ ການແຕ່ງເມຍຫລາຍຄົນ

ໄພ່ພົນຍຸກສຸດທ້າຍເຊື່ອວ່າ ຄູ່ສົມລົດດຽວ—ການມີຜົວເມຍຄົນດຽວ—ແມ່ນກົດຂອງການແຕ່ງງານຂອງພຣະຜູ້ເປັນເຈົ້າ.¹ ໃນສະໄໝພຣະຄຣິສຕະທຳຄຳພີ, ພຣະຜູ້ເປັນເຈົ້າໄດ້ບັນຊາຜູ້ຄົນຂອງພຣະອົງບາງຄົນໃຫ້ແຕ່ງເມຍຫລາຍຄົນ—ການແຕ່ງງານຂອງຊາຍຄົນໜຶ່ງກັບຜູ້ຍິງຫລາຍຄົນ.² ສະມາຊິກລຸ້ນທຳອິດບາງຄົນຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ກໍໄດ້ຮັບ ແລະ ເຊື່ອຟັງພຣະບັນຍັດຂໍ້ດຽວກັນນີ້ ຜ່ານທາງສາດສະດາຂອງພຣະເຈົ້າ.

ຫລັງຈາກໄດ້ຮັບການເປີດເຜີຍ ຊຶ່ງບັນຊາໃຫ້ເພິ່ນປະຕິບັດຕາມກົດຂອງການແຕ່ງເມຍຫລາຍຄົນ, ໂຈເຊັບ ສະມິດ ກໍໄດ້ເອົາເມຍຫລາຍຄົນ ແລະ ໄດ້ແນະນຳເພື່ອນຮ່ວມງານທີ່ໃກ້ຊິດໃຫ້ປະຕິບັດຄືກັນ. ຫລັກທຳຂໍ້ນີ້ໄດ້ເປັນພາກສ່ວນໜຶ່ງທີ່ທ້າທາຍຫລາຍທີ່ສຸດຂອງການຟື້ນຟູ—ໂດຍສະເພາະກັບໂຈເຊັບ ແລະ ສະມາຊິກຂອງສາດສະໜາຈັກຄົນອື່ນໆ. ການແຕ່ງເມຍຫລາຍຄົນໄດ້ທົດສອບສັດທາ ແລະ ກໍ່ໃຫ້ເກີດມີການຖົກຖຽງ ແລະ ການຄັດຄ້ານ. ໃນຕອນຕົ້ນ ໄພ່ພົນຍຸກສຸດທ້າຍຈຳນວນໜ້ອຍໜຶ່ງໄດ້ຮັບຮູ້ວ່າ ການຟື້ນຟູການປະຕິບັດຕາມສະໄໝພຣະຄຣິສຕະທຳຄຳພີທັງໝົດ ເປັນເລື່ອງແປກຕໍ່ຄວາມຮູ້ສຶກຂອງເຂົາເຈົ້າ. ແຕ່ຕໍ່ມາ ຫລາຍຄົນໄດ້ເປັນພະຍານເຖິງປະສົບການທາງວິນຍານທີ່ມີພະລັງ ທີ່ໄດ້ຊ່ວຍເຂົາເຈົ້າເອົາຊະນະຄວາມລັງເລໃຈຂອງເຂົາເຈົ້າ ແລະ ຊ່ວຍເຂົາເຈົ້າໃຫ້ມີຄວາມກ້າຫານທີ່ຈະຮັບຮູ້ການປະຕິບັດຕາມກົດນີ້.

ລາຍລະອຽດຕ່າງໆກ່ຽວກັບການປະຕິບັດຕາມກົດຂອງການແຕ່ງເມຍຫລາຍຄົນໃນສະໄໝເລີ່ມຕົ້ນ ບໍ່ມີໃຜຮູ້ຈັກ ເພາະວ່າຜູ້ທີ່ໄດ້ປະຕິບັດຕາມກົດນີ້ໄດ້ຖືກຂໍຮ້ອງໃຫ້ເກັບການປະຕິບັດຂອງຕົນໄວ້ເປັນຄວາມລັບ. ສະນັ້ນບັນທຶກປະຫວັດສາດຂອງການແຕ່ງເມຍຫລາຍຄົນໃນສະໄໝເລີ່ມຕົ້ນຈຶ່ງບໍ່ມີຫລາຍ: ມີບັນທຶກສອງສາມສະບັບທີ່ໃຫ້ລາຍລະອຽດກ່ຽວກັບສະໄໝນັ້ນ, ແລະ ຕໍ່ມາຄວາມຊົງຈຳຂອງຜູ້ຄົນກໍເພິ່ງອາໄສບໍ່ໄດ້. SAints ບອກເລົ່າເລື່ອງລາວຫລາຍຕອນທີ່ສຳຄັນກ່ຽວກັບການປະຕິບັດຕາມກົດຂອງການແຕ່ງເມຍຫລາຍຄົນ ໂດຍ ໂຈເຊັບ ສະມິດ ແລະ ໄພ່ພົນຍຸກສຸດທ້າຍລຸ້ນທຳອິດ. ສຳລັບລາຍລະອຽດເພີ່ມເຕີມກ່ຽວກັບການແຕ່ງເມຍຫລາຍຄົນໃນສະໄໝເລີ່ມຕົ້ນ, ເບິ່ງ “Plural Marriage in The Church of Jesus Christ of Latter-day Saints,” Gospel Topics Essays, topics.churchofjesuschrist.org.

ຫົວຂໍ້ທີ່ກ່ຽວຂ້ອງ: Joseph Smith Jr., Emma Hale Smith, Fanny Alger, Nauvoo Expositor