Fas Presidensi Mesej, Jenuware 2010
Stap Fetful Blong wan Smol Taem Moa
Wan long ol longfala lesen long taem blong Ketlan hem i se ol spirit blong yumi, yumi nidim blong stap kea long hem oltaem. Yumi nidim blong folem ol tijing blong Lod evri dei sapos yumi wantem blong winim enemi we yumi evriwan i mas fesem.
Las sama waef blong mi mo mi i bin tekem tufala twin apu boe blong mitufala i go long Ketlan, Ohaeo. Hem i bin wan spesel mo gudfala janis blong mitufala blong spendem taem wetem tufala apu boe ia bifo tufala i go long ol misin blong tufala.
Long taem blong visit blong mifala longwe ia, mifala i bin lanem blong andastanem gud ol situesen we Profet Josef Smit mo ol Sent we oli bin stap long Ketlan long bifo. Long taem blong Jos histri ia oli bin save long hem olsem wan taem blong ol rabis hadtaem be hem i wan taem blong ol gudfala blesing tu.
Long Ketlan Lod i bin givim sam long ol gudfala saen blong heven mo ol presen long saed blong spirit we wol ia i save kasem. Sikisti-faef seksen blong Doctrine and Covenants oli bin kasem long Ketlan mo ol eria raon long hem—ol revelesen we i karem niufala laet mo save abaot ol topik olsem Seken Kaming, kea long olgeta we oli stap long nid, plan blong fasin blong sevem man, prishud atoriti, Tok blong Waes, taeting, tempol, mo loa blong konsekresen.1
Hem i bin wan taem blong defren gro long saed blong spirit. I tru, Spirit blong God i olsem wan faea we i stap laet. Moses, Elaeja, mo plante narafala man long heven oli bin kamaot long taem ia, iven Papa blong yumi long Heven mo Pikinini blong Hem, Sevya blong wol, Jisas Kraes.2
Wan long ol plante revelesen we Josef i bin kasem long Ketlan i wan revelesen we hem i singaotem wan olif tri we oli bin pulumaot long Tri blong Paradaes, mo mesej blong Lod blong pis long yumi (luk long fas toktok blong D&C 88). Naesfala revelesen ia i gat tu wan gudfala invitesen. Lod i bin talem long hem se yumi sud kam kolosap long Hem mo bae Hem i kam kolosap long yumi. Yumi sud wokhad blong lukaotem Hem oltaem mo bae yumi faenem Hem (luk longD&C 88:63). Taem ol Sent blong Ketlan oli bin kam kolosap long Lod, Hem i bin stap kolosap tru long olgeta, Hem i bin givim ol blesing blong heven long ol hed blong olgeta we oli fetful.
Wan Bigfala Kamdaon long Saed blong Spirit
Ating long en blong ol saen long saed blong spirit ia oli bin kamaot long taem blong dedikesen blong Ketlan Tempol long 27 Maj, 1836. Wan long olgeta we i bin stap long taem ia hem i Wiliam Drapa we i bin gat 28 yia long taem ia, we i bin tokbaot dei ia olsem wan “dei blong Pentekos.” Hem i bin raetem: “I bin gat wan taem we Spirit blong Lod i bin kamdaon bigwan, mekem se pen blong mi i no inaf blong raetem daon wanem i bin hapen o tang blong mi i save talemaot wanem i bin hapen. Be bae mi save talem se Spirit i bin kam daon mo i bin kam olsem wan bigfala strong win mo i bin fulumap haos, mekem se plante we oli bin stap long taem ia oli bin toktok long ol narafala lanwis mo oli bin gat ol visen mo oli bin luk ol enjel mo oli bin profesae, mo oli bin gat wan jeneral eksperiens blong glad bitim wan long jeneresen ia i bin gat.”3
Ol saen ia long saed blong spirit oli no blong olgeta we oli stap insaed long tempol nomo, from “ol pipol we oli stap kolosap long tempol long taem ia oli bin ron i kam tugeta (oli bin harem wan defren saon i kamaot insaed long tempol, mo oli bin luk wan laet i saen olsem wan bol blong faea i stap antap long Tempol), mo oli bin sapraes long wanem i stap tekem ples.”4
Lorenso Sno (1814–1901), we i jes kam Presiden blong Jos afta, i bin stap long Ketlan long impoten taem ia. Hem i bin talem, “Wan bae i stap tingting se afta we oli bin kasem ol naesfala saen ia bae temtesen i no save winim ol Sent.”5
Be, i tru, wan bigfala eksperiens long saed blong spirit i no mekem yumi fri long ol samting long fasin blong go agens mo ol hadtaem. Sam manis nomo i jes pas afta long dedikesen blong tempol, wan bigfala trabol long saed blong mane we i bin kam antap bigwan mo i bin spolem Yunaeted Stet, mo Ketlan i bin filim bigfala paoa blong trabol ia. Ol bang oli no moa open, mo oli bin livim plante man long ol hadtaem long saed blong mane. Blong mekem ol situesen i kam had moa, plante Sent we oli bin stap muv i kam long Ketlan oli bin kam wetem sam samting nomo, oli no save wanem bae oli mekem taem oli kasem Ketlan o olsem wanem blong oli stap laef.
I no longtaem, ol hadtaem oli stap kam antap mo ol grup blong ol rabis man oli kam antap blong go agensem ol Sent. Ol memba blong Jos—iven sam we oli gud fren wetem Profet, plante long olgeta we oli bin stap long dedikesen blong tempol—oli bin lego bilif blong olgeta mo oli bin tok agensem Josef se hem i no wan tru profet.
Taem mi stap wokbaot kolosap long Ketlan Tempol wetem waef blong mi mo tufala apu boe blong mi, mi tingting hevi long olsem wanem hem i bin nogud se sam oli no save stap fetful iven afta long ol saen ia long saed blong spirit we oli bin witnesem. Olsem wanem hem i sore blong luk se oli no bin save stanap strong long ol krangke toktok blong olgeta we oli no biliv. Olsem wanem hem i nogud, taem oli bin fesem hadtaem long saed blong mane o ol narafala hadtaem, oli no save pusum han i go insaed long olgetawan mo faenem paoa blong stap fetful. Olsem wanem hem i no stret we oli bin fogetem ol bigfala saen long saed blong spirit long dedikesen blong tempol.
Ol Lesen
Wanem nao yumi save lanem long impoten taem ia long histri blong Jos?
Wan long ol bigfala, lesen we i save stap longtaem long taem blong Ketlan hem i we ol spirit blong yumi oli nidim kea oltaem. Olsem Presiden Harol B. Li (1899–1973) i bin tijim: “Testemoni hem i no wan samting we yu gat tedei mo bae yu stap kipim oltaem. Testemoni bae i mas gro mo i mas gro long ful paoa blong biliv, o hem i save lus long nating, hem i dipen nomo long wanem yumi mekem wetem. Mi talem, testemoni we yumi rinium evri dei hem i samting we i stap sevem yumi long ol trap blong enemi.”6 Yumi nid blong stap kolosap long Lod evri dei sapos yumi mas stanap strong long ol hadtaem we bae yumi evriwan i mas fesem.
Long sam wei wol blong yumi tedei hem i semmak olsem long taem blong Ketlan long ol yia 1830. Yumi tu yumi stap laef long ol taem blong ol harem nogud long saed blong mane. I gat olgeta we oli stap givim hadtaem mo agensem Jos mo ol memba blong hem. I gat wanwan hadtaem o ol grup blong ol hadtaem we samtaem oli had tumas blong yumi winim.
Hemia nao taem we yumi nidim, moa bitim eni nara taem, blong kam kolosap long Lod. Taem yumi mekem olsem ia, bae yumi kam blong save wanem hem i minim blong Lod i stap kolosap long yumi. Taem yumi lukaotem Hem wetem moa hadwok oltaem, bae yumi save faenem Hem. Bae yumi save luk klia se Lod i no livim Jos blong Hem o ol fetful Sent blong Hem. Ol ae blong yumi bae oli open, mo bae yumi lukim Hem i openem ol windo blong heven mo givim long yumi moa laet blong Hem. Bae yumi faenem paoa long saed blong spirit blong yumi save laef iven long ol rabis hadtaem o problem.
Nomata sam long ol Sent long Ketlan oli bin fogetem ol eksperiens we oli bin gat long saed blong spirit, plante oli no bin fogetem. Plante long olgeta ia,wan long olgeta hem i Wiliam Drapa, we oli bin holem strong save long saed blong spirit we Lod i bin givim long olgeta mo i bin gohed blong folem Profet. Be iven long rod ia oli bin eksperiensem moa rabis hadtaem be oli bin kasem tu ol swit gro long saed blong spirit kasem, long en, olgeta we oli bin stanap strong kasem en oli bin “kasem olgeta … long wan ples blong hapi we i no gat en” (Mosaea 2:41).
Yu Save Holem Taed
Sapos yu bin gat temtesen blong lusum tingting o blong lusum fet, tingbaot ol fetful Sent we oli bin stap fetful long Ketlan. Stap fetful blong wan smol taem moa.Yu save mekem samting ia! Yu yu pat blong wan spesel jeneresen. Oli bin mekem yu rere mo oli bin kipim yu blong stap long laef long impoten taem ia blong stap long naesfala wol ia. Yu gat wan selestial famle histri mo mekem se yu gat evri talen we yu nidim blong mekem laef blong yu i kam wan gudfala stori we i no save finis.
Lod i bin blesem yu wetem wan testemoni blong trutok. Yu bin filim paoa blong Hem mo yu bin witnesem paoa blong Hem. Mo sapos yu gohed blong lukaotem Hem, bae Hem i gohed blong givim long yu ol tabu eksperiens. Wetem ol presen ia mo ol narafala presen long saed blong spirit, bae yu no save jenisim laef blong yuwan nomo blong i kam moa gud be bae i blesem tu ol hom blong yu, wod o ol branj, ol komuniti, ol siti, ol stet, mo ol nesen wetem gudfala fasin blong yu.
Ating bae i had blong luk long sam taem, be stap fetful blong wan smol taem moa, from “God i putumgud plante samting oli rere finis blong ol man we oli lavem hem. Ol man oli no luk ol samting ya long ae blong olgeta, oli no harem tok blong olgeta long sora blong olgeta, mo oli no tingbaot olgeta long tingting blong olgeta, be olgeta oli rere i stap” mo oli wet long Hem (1 Korin 2:9; luk tu long D&C 76:10; 133:45).
Mi serem witnes long trutok blong gospel blong Jisas Kraes we i bin kambak mo trutok blong hemia, Jos blong Hem. Mi testifae wetem evri hat mo sol blong mi se God i stap laef, se Jisas Kraes i Pikinini blong Hem mo i stanap long hed blong bigfala Jos ia. Yumi gat wan profet long wol bakegen, iven Presiden Tomas S. Monson.
Letem yumi stap tingbaot oltaem lesen blong Ketlan mo stap fetful blong wan smol taem moa—iven long taem we ol samting oli had. Save mo tingbaot hemia: Lod i lavem yu. Hem i tingbaot yu. Mo bae Hem i sastenem olgeta we oli stanap strong long fet kasem en (luk long D&C 20:25).
© 2009 i kam long Intellectual Reserve, Inc. Oli holem evri raet. Oli Printim long YSA. Oli letem long Inglis: 6/09. Oli letem translesen: 6/09. Translesen blong First Presidency Message, January 2010. Bislama. 09361 852