Visiting Tijing Mesej, Jenuware 2010
Kam Self-Rilayan
Tijim ol skripja mo ol toktok ia o, sapos i gat nid, tijim wan narafala prinsipol we bae i save blesem ol sista we yu stap visitim. Serem testemoni blong yu abaot doktrin ia. Invaetem olgeta we yu stap visitim blong serem wanem oli bin filim mo lanem.
Wanem Hem I Self-Rilayan?
“‘Self-rilayan (fasin blong stap dipen long yuwan) i minim blong yusum evri blesing blong yumi we i kam long Papa long Heven blong kea long yumiwan mo ol famle blong yumi mo blong faenem ol ansa long ol problem blong yumiwan.’ Wanwan long yumi i gat wan responsabiliti blong traem blong stap longwe long ol problem bifo ol problem ia oli hapen mo blong lanem blong winim ol jalenj taem oli hapen. …
“Olsem wanem nao yumi save kam self-rilayan? Yumi kam self-rilayan taem yumi kasem inaf save, edukesen, mo fasin blong save rid mo raet; taem yumi manejem gud mane mo yusum gud ol risos blong yumi, taem yumi stap strong long saed blong spirit, taem yumi stap rere from ol imejensi mo ol problem we bae oli kam; mo taem yumi gat gudfala helt long saed blong bodi, mo sosol mo long tingting.”1
Juli B. Bek, Rilif Sosaeti jeneral presiden.
Wan Responsabiliti blong Gospel
“Taem yumi stap laef wetem tingting long fiuja mo yumi kam antap long ol presen mo ol talen blong yumi, yumi stap kam moa self-rilayan. Self-rilayan hem i tekem responsabiliti long saed blong spirit blong yumiwan mo welfea blong yumi long wol ia mo blong olgeta we Papa long Heven i bin putum olgeta i stap long kea blong yumi. Taem yumi kam self-rilayan nomo, bae yumi jes save folem tru Sevya blong sev mo blesem ol narafala man.
“Hem i impoten blong andastanem se self-rilayan hem i wan tul blong kasem wan gol. Impoten gol blong yumi hem i blong kam olsem Sevya, mo gol ia i save kam moa gud tru long fasin blong stap givim seves blong yumi we i no selfis long ol narafala man. Paoa blong yumi blong sev i kam antap o i lus tru long level blong self-rilayan blong yumi.”2
Elda Robet D. Hels blong Kworom blong olgeta Twelef Aposol.
“Self-rilayan hem i wan risal blong wok blong yumi mo i sapotem evri narafala praktis blong welfea. Hem i wan impoten pat long saed blong spirit blong yumi mo tu welfea blong yumi long wol ia. Folem prinsipol ia, Presiden Marion G. Romni [1897–1988] i bin talem: ‘Letem yumi wok from wanem yumi nidim. Letem yumi wok blong kam self-rilayan mo blong kam independen. Fasin blong sevem man i no save kam tru long eni narafala prinsipol. Fasin blong sevem man hem i wan samting blong wanwan man, mo yumi mas wokemaot fasin blong sevem man blong yumiwan long wol ia mo tu long ol samting long saed blong spirit.’ …
“Presiden Spensa W. Kimbol [1895–1985] i bin tijim moa abaot self-rilayan: ‘Responsabiliti blong welfea blong wanwan man long saed blong sosol, tingting, spirit, bodi, o mane i stap fastaem long hemwan, nambatu, responsabiliti ia i stap long famle blong hem, mo nambatri, responsabiliti ia i stap long Jos sapos hem i wan fetful memba blong Jos.’”3
Presiden Tomas S. Monson.
© 2009 i kam long Intellectual Reserve, Inc. Oli holem evri raet. Oli Printim long YSA. Oli letem long Inglis: 6/09. Oli letem translesen: 6/09. Translesen blong Visiting Teaching Message, January 2010. Bislama. 09361 852