Mensahe sang Unang Panguluhan, Enero 2010
Indi Magpangampo
Isa sang nagapadayon nga mga leksyon sadtong panahon sa Kirtland amo nga ang aton mga espiritu nagakinahanglan sang dalayon nga pag-atipan. Kinahanglan naton sundon ang mga pinanudlo sang Ginuo adlaw-adlaw kon gusto naton malampuwasan ang mga pagtilaw nga kinahanglan naton tanan atubangon.
Sang nagligad nga tig-ilinit, gindala namon sang asawa ko ang amon kapid nga apo sa Kirtland, Ohio. Yadto isa ka espesyal kag bilidhon nga oportunidad para sa amon nga maghinguyang sang tion upod sa ila antes sila naglakat sa ila mga misyon.
Sa amon pagbisita didto, natun-an namon nga mahangpan sing mas maayo ang mga sirkumstanya sang Propetang si Joseph Smith kag sang mga Santos nga nag-istar sa Kirtland. Yadtong panahon sa kasaysayan sang Simbahan nabantugan nga isa ka panahon sang sobra-sobra nga mga pagtilaw apang sobra-sobra man nga mga bugay.
Sa Kirtland ginhatag sang Ginuo ang pila sa labing talalupangdon nga langitnon nga mga pagpakita kag espirituhanon nga mga dulot nga naeksperiyensyahan sining kalibutan. Sisenta’y-singko ka mga seksyon sang Doctrine and Covenants ang nabaton sa Kirtland kag sa nagapalibot nga mga lugar—mga rebelasyon nga nagdala sang bag-o nga kasanag kag ihibalo parte sa mga topiko pareho sang Ika-duhang Pagkari, pagtatap sang mga nagakinahanglan, ang plano sang kaluwasan, awtoridad sang priesthood, ang Pulong sang Kaalam [Word of Wisdom], ika-pulo, ang templo, kag ang layi sang pagkonsagrar.1
Isa yadto ka panahon sang indi matupungan nga espirituhanon nga pagtubo. Matuod gid nga ang Espiritu sang Dios daw pareho sang kalayo nga nagadabadaba. Sanday Moises, Elias kag madamo nga iban pa nga langitnon nga mga tinuga nagpakita sa sining panahon, lakip na ang aton Amay nga Langitnon kag ang Iya Anak, ang Manluluwas sang kalibutan nga si Jesucristo.2
Isa sa madamo nga mga rebelasyon nga nabaton ni Joseph sa Kirtland amo ang rebelasyon nga iya gintawag nga “olibo nga dahon … nga ginpuksi gikan sa Kahoy sang Paraiso, kag ang iya sang Ginuo nga mensahe sang paghidaet sa aton” (tan-awa sa pauna sang D&C 88). Ining matahum nga rebelasyon nagalakip sang makatalandog nga pangagda, “Magpalapit sa akon kag ako magapalapit sa inyo; pangitaa ako sing may kaukod kag inyo ako makit-an” (tan-awa sa D&C 88:63). Sa pagpalapit sang mga Santos sa Kirtland sa Ginuo, matuod gid nga nagpalapit Sia sa ila nga ginabubo ang mga bugay sang langit sa mga ulo sang mga mainunungon.
Isa ka Pagbaha sang Espirituhanon nga mga Bugay
Ayhan ang pinakamataas sining espirituhanon nga mga pagpakita natabo sa tion sang pagpahanungod [dedication] sang Kirtland Temple sang Marso 27, 1836. Isa sa mga nagtambong amo ang 28-anyos nga si William Draper nga naglaragway sang adlaw bilang isa ka “adlaw sang Pentecostes.” Iya ginsulat: “May yara sina nga tion sang pagbaha sang Espiritu sang Ginuo, sa bagay nga indi ko mahunahuna ang mga pulong nga akon isulat ukon mahambal ang parte sa natabo. Apang akon karon ihambal nga ang Espiritu ginbubo sing dagaya kag nag-abot pareho sang isa ka mabaskog nga hangin kag nagpuno sang templo, nga madamo sa nagtalambong ang naghambal sa mga dila kag nakaangkon sang mga palanan-awon kag nakakita sang mga anghel kag nagpanagna, kag may tuman nga tiempo sa pagpangalipay nga wala pa gid maeksperiyensyahan sa sining henerasyon.”3
Ining espirituhanon nga mga pagpakita indi lamang limitado para sa sadtong yara sa sulod sang templo, bangod “ang mga tawo sa palibot nagdinalagan (sang mabatian ang di-kinaandan nga gahod sa sulod, kag sang makita ang masilaw nga kasanag nga daw haligi sang kalayo nga nagahulon sa Templo), kag natingala sa kon ano ang nagakinatabo.”4
Si Lorenzo Snow (1814–1901), nga sang ulihi nangin Pangulo sang Simbahan, nagaistar sa Kirtland sadtong balaan nga panahon. Sia nagsiling, “Ang isa makapanghunahuna nga pagkatapos nga mabaton ining matahum nga mga pagpakita wala sang tentasyon nga sarang makadaug sang mga Santos.”5
Apang, siyempre, ang dalagko nga espirituhanon nga mga eksperiyensya wala nagaluwas sa aton gikan sa oposisyon kag mga pagtilaw. Pila lamang ka bulan pagkatapos sang pagpahanungod sang templo, isa ka malapnagon nga krisis pang-ekonomiya nag-apekto sang Estados Unidos, kag ginbatyag gid sang Kirtland ang mga epekto sini. Ang mga bangko nagkalaputo, nga nagbilin sang kadam-an sa mabudlay nga mga sitwasyon-pinansyal. Nagpalubha pa gid sang madamo sa mga Santos nga nagabalhin sa Kirtland nag-alabot nga may tuman ka diutay nga mga pagkabutang, nga wala nakahibalo kon ano ang ila himuon sa ila pag-abot ukon paano sila mabuhi.
Wala madugayi, ang mga pagdaug-daug nagluntad kag ang mga tulisan nagtilingob batok sa mga Santos. Ang mga miyembro sang Simbahan—bisan ang pila sadtong pinakasuod nga abyan sang Propeta, nga madamo sini sa ila yara man sa pagpahanungod sang templo—nagtalikod sa simbahan kag ginsumpa si Joseph nga isa ka di-matarong nga propeta.
Samtang nagalakat ako malapit sa Kirtland Temple upod ang akon asawa kag mga apo, ginabinagbinag ko kon ano kasubo nga ang iban wala magpadayon nga tampad bisan pa pagkatapos sadtong espirituhanon nga mga pagpakita nga ila nasaksihan. Daw ano kasubo nga indi nila masarangan nga batason ang mga pagpasipala kag kritisismo sang mga wala nagatuo. Daw ano kasubo nga, kon nagaatubang sang pinansyal nga pagtilaw ukon iban pa nga mga kabudlayan, indi nila masarangan nga magdab-ot sa sulod sang ila mga kaugalingon kag masalapuan ang kusog agud magpadayon nga tampad. Daw ano ka subo nga bisan magkainano ginkalimtan nila ang milagroso nga espirituhanon nga ani sa pagpahanungod sang templo.
Mga Leksyon
Ano ang aton matun-an gikan sining talalupangdon nga panahon sa kasaysayan sang Simbahan?
Isa sa dalagko, nagapadayon nga mga leksyon sadtong panahon sa Kirtland amo nga ang aton mga espiritu nagakinahanglan sang dalayon nga pag-atipan. Subong nga gintudlo ni Pangulong Harold B. Lee (1899–1973): “Ang panaksihon indi isa ka butang nga may yara ka karon nga adlaw kag padayon mo nga taguon. Ang panaksihon magatubo kag magatubo tubtob sa kasanagon sang kapat-uran, ukon ini magatahaw padulong sa kawala, depende sa kon ano ang aton himuon sini. Akon ginasiling nga ang panaksihon nga ginapabakod naton sing amat-amat ang butang nga nagaluwas sa aton gikan sa mga siod sang mga kaaway.6 Kinahanglan naton sundon ang mga pinanudlo sang Ginuo adlaw-adlaw kon gusto naton malampuwasan ang mga pagtilaw nga kinahanglan naton tanan atubangon.
Sa pila ka mga pamaagi ang aton kalibutan karon nga panahon nagaanggid man sa Kirtland sang mga 1830. Kita man nagapangabuhi sa tinion sang pinansyal nga kabudlayan. May yara sadtong mga nagadaug-daug kag nagakontra sang Simbahan kag sang mga miyembro sini. Ang indibidwal kag pangkabilugan nga mga pagtilaw mahimo nga kon kaisa daw indi mapunggan.
Diri sina kita kinahanglan, labaw sa tanan, nga magpalapit sa Ginuo. Sa aton paghimo sini, aton mahibaloan kon ano kaimportante nga magpalapit ang Ginuo sa aton. Sa aton pagpangita sa Iya sing mas maukod, pat-od gid nga makit-an naton Sia. Aton makita sing mas maathag nga ang Ginuo wala nagapabaya sang Iya Simbahan ukon sang Iya mainunungon nga mga Santos. Ang aton paghangop mangin bug-os, kag makita naton Sia nga nagabukas sang mga bintana sang langit kag nagahatag sa aton sing dugang sang Iya kasanag. Aton masalapuan ang espirituhanon nga kabakod sa paglampuwas bisan sa pinakamabudlay nga mga pagtilaw.
Bisan ginkalimtan sang pila ka mga Santos sa Kirtland ang espirituhanon nga mga eksperiyensya nga ila naagom, ang kalabanan sa ila wala nagkalipat. Ang kalabanan, lakip na si William Draper, nagkapot sing hugot sa espirituhanon nga ihibalo nga ginhatag sang Dios sa ila kag padayon nga nagsunod sa Propeta. Samtang nagapadayon sa ila pagpangabuhi, nakaeksperiyensya sila sang mas mapait nga mga pagtilaw apang mas matam-is man nga espirituhanon nga pagtubo tubtob, sang ulihi, yadtong mga nagpadayon tubtob sa katapusan “pagabatunon … sa isa ka kahimtangan sang di-matapos nga kalipayan” (Mosias 2:41).
Sarang Kamo nga Indi Magpangampo
Sa tion nga matentar kamo nga mangluya ukon madulaan sang pagtuo, dumduma yadtong mainunungon nga mga Santos nga nagpabilin nga tampad sa Kirtland. Indi magpangampo. Mahimo ninyo ini! Kabahin kamo sang isa ka pinasahi nga henerasyon. Ginhanda kamo kag natalana nga magkabuhi sa sining importante nga panahon sa pagpadayon sang aton matahum nga planeta. May yara kamo sang selestiyal nga kaliwatan kag gani may yara sang tanan nga kinahanglanon nga mga talento agud himuon ang inyo kabuhi nga isa ka wala’y katapusan nga kasaysayan sang kadalag-an.
Ang Ginuo nagbugay sa inyo sang panaksihon parte sa kamatuoran. Inyo nabatyagan ang Iya impluwensya kag nasaksihan ang Iya gahum. Kag kon padayon kamo nga magpangita sa Iya, padayon Sia nga magahatag sa inyo sang sagrado nga mga eksperiyensya. Upod sini kag sang iban pa nga espirituhanon nga mga dulot, indi lamang ninyo mabag-o ang inyo kaugalingon nga kabuhi para sa kaayuhan kundi mapakamaayo man ang inyo mga puluy-an, mga ward ukon mga branch, mga komunidad, mga siyudad, mga estado, kag mga nasyon paagi sa inyo kaayo.
Mahimo nga mabudlay makita ina kon kaisa, apang indi magpangampo, bangod “ang wala makit-i sang mata, kag wala mabatii sang dulunggan, ukon wala mapainoino sa hunahuna sang tawo, ini gin-aman sang Dios sa nagahigugma sa iya” kag nagahulat sa Iya (1 Mga Taga-Corinto 2:9; tan-awa man sa D&C 76:10; 133:45).
Nagapamatuod ako sa kamatuoran sang ginpanumbalik nga ebanghelyo ni Jesucristo kag sang kamatuoran sini, ang Iya Simbahan. Nagasaksi ako sa bug-os ko nga tagipusuon kag kalag nga buhi ang Dios, nga si Jesucristo amo ang Iya Anak kag nagatindog sa ulohan sining halangdon nga Simbahan. May propeta na kita liwat sa kalibutan nga si Pangulong Thomas S. Monson.
Kabay nga aton gid dumdumon ang leksyon sa Kirtland kag indi magpangampo—bisan pa nga nagaatubang kita sang daw mabudlay nga mga pagtilaw. Hibaloa kag dumduma ini: palanggga kamo sang Ginuo. Ginadumdom Niya kamo. Kag Iya pagasakdagon ang yadtong “nagapadayon nga may pagtuo tubtob sa katapusan” (tan-awa sa D&C 20:25).
© 2009 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Pagtugot sa Ingles: 6/09. Pagtugot sa paglubad: 6/09. Linubad sang First Presidency Message, January 2010. Hiligaynon. 09361 861