Mensahe sa Visiting Teaching
Pagsandig-sa-Kaugalingon
Itudlo ining balaan nga mga kasulatan kag sinambit nga mga pulong ukon, kon kinahanglanon, isa pa ka prinsipyo nga magabugay sa mga utod nga babayi nga inyo ginabisita. Magpanaksihon parte sa doktrina. Agdaha ang inyo mga ginabisita nga magpaambit sang ila nabatyagan kag natun-an.
Ano ang Pagsandig-sa-Kaugalingon?
“‘Ang pagsandig-sa-kaugalingon nagakahulugan sang paggamit sang tanan naton nga mga bugay gikan sa Amay nga Langitnon sa pagtatap sang aton mga kaugalingon kag sang aton mga pamilya kag sa pagpangita sang mga solusyon sa aton kaugalingon nga mga problema.’ Ang tagsa sa aton may responsibilidad sa pagtinguha nga likawan ang mga problema antes ini matabo kag sa pagtuon nga malampuwasan ang mga hangkat kon matabo ang mga ini. …
“Paano kita magsandig-sa-kaugalingon? Kita nagasandig-sa-kaugalingon paagi sa pag-angkon sang bastante nga ihibalo, edukasyon, kag kaalam; paagi sa pagdumala sang kuwarta kag mga pagkabutang sing maayo, pagkamabakod sa espirituhanon, paghanda para sa mga emerhensya kag posible nga mga problema; kag paagi sa pag-angkon sang maayong lawas kag pang-sosyedad kag emosyunal nga kaayuhan.”1
Julie B. Beck, pangkabilugan nga pangulo sang Relief Society.
Isa ka Pang-Ebanghelyo nga Responsibilidad
“Sa aton pagpangabuhi nga nagaplano para sa palaabuton kag nagapatin-ad sang aton mga dulot kag mga talento, nagadugang pa gid ang aton pagsandig-sa-kaugalingon. Ang pagsandig-sa-kaugalingon amo ang pagkaresponsable para sa aton kaugalingon nga espirituhanon kag temporal nga kaayuhan kag para sadtong gintugyan sang Amay nga Langitnon sa aton nga pag-atipan. Sa pagsandig-sa-kaugalingon gid lamang naton sarang masunod gid ang ehemplo sang Manluluwas sa pag-alagad kag pagpakamaayo sa iban.
“Importante nga mahangpan nga ang pagsandig-sa-kaugalingon isa ka pamaagi sa paglab-ot sang isa ka tinutuyo. Ang aton labing mataas nga katuyuan amo ang mangin pareho sa Manluluwas, kag inang katuyuan ginapatin-ad sang aton di-maiyaiyahon nga pag-alagad sa iban. Ang aton ikasarang sa pag-alagad nagadugang ukon nagabuhin depende sa lebel sang aton pagsandig-sa-kaugalingon.”2
Elder Robert D. Hales sang Korum sang Napulo’g Duha ka mga Apostoles.
“Ang pagsandig-sa-kaugalingon produkto sang aton obra kag ginapabakod sini ang tanan nga iban nga mga ginahimo para sa kaayuhan. Isa ini ka importante nga elemento sa aton espirituhanon kag sa aton temporal nga kaayuhan. Parte sining prinsipyo, si President Marion G. Romney [1897–1988] nagsiling: ‘Mag-obra kita para sa kon ano nga aton kinahanglanon. Magsandig kita sa kaugalingon kag magmangin independyente. Ang kaluwasan indi sarang maagom sa iban pa nga prinsipyo. Ang kaluwasan isa ka pang-indibidwal nga responsibilidad, kag kinahanglan naton hikuton ang aton kaugalingon nga kaluwasan sa temporal kag sa espirituhanon nga mga butang.’ …
“Si Pangulong Spencer W. Kimball [1895–1985] dugang nga nagtudlo parte sa pagsandig-sa-kaugalingon: “Ang responsibilidad para sa tagsa ka tawo sa pang-sosyedad, pang-emosyunal, pang-espirituhanon, pang-pisikal, ukon pang-ekonomiya nga kaayuhan nasandig una sa iya kaugalingon, ika-duha sa iya pamilya, kag ika-tatlo sa Simbahan kon tampad sia nga miyembro sini.’”3
President Thomas S. Monson.
© 2009 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Pagtugot sa Ingles: 6/09. Pagtugot sa paglubad: 6/09. Linubad sang Visiting Teaching Message, January 2010. Hiligaynon. 09361 861