Enaan eo an Būreejtōnji eo Kein kajuōn, Jānwōde 2010
Kaitokļo̧k Jidik Dāpiji
Juōn iaan katak in niknik ko ilo tōre eo ilo Kirland ej bwe jetōb ko ad rej aikuji najdik eo ej aolep iien kōm̧m̧an. Jej aikuj in pād epaakļo̧k Irooj aolep raan eļan̄n̄e jej kōņaan anjo ilo apan̄ eo me jej aolep aikuj in jelm̧ae.
Jōmmar eo ļo̧k kōrā eo ippa im N̄a kōmro kar bōk boo ro jibūm̧ro n̄an Kirtland, Ohio. Eaar juōn iien em̧m̧an im aorōk im ejeno̧lo̧k n̄an kōm n̄an joļo̧k iien ippāer m̧okta jān aer ilo̧k n̄an mijen ko aer.
Ilo tōre in loļo̧k eo am̧ n̄an ijo, kōm ar ekkatak n̄an wājepedik ļo̧k meļeļe kōn jōkjōk ko an Rikanaan Joseph Smith im armej ro rekwojarjar ro raar joke ilo Kirtland. Iien eo kōn bwebwenato an Kabun̄ in kar jeļā kake āinwōt juōn iien mālijjon̄ ko repen bōtaab barāinwōt iien kōjeram̧m̧an ko reļļap.
Ilo Kirtland Irooj eaar leļo̧k jet iaan loļo̧k ko jān lan̄ eļap aer kabwilōn̄lōn̄ im menin leļo̧k ko an jetōb laļ in ejjan̄in kar iooni. Jiljinon̄oul-ļalem section in Doctrine im Covenants raar būki ilo Kirtland im ijōko ipeļakin—mandenļo̧k ko me raar bōktok meram eo ekāal im jeļāļo̧kjeņ eo kōn wunin kōnono ko āinwōt Itok eo Kein Karuo, kōjparok riaikuj, karōk in ļomo̧o̧r eo, mālim eo an priesthood, Naan in Māletlet, juōn m̧ōttan jōn̄oul, tampeļ, im kien ekwojarjar eo.1
Eaar juōn tōre in eddōkļo̧k ilo jetōb eo jab maron̄ keidi n̄an e. Ilo m̧ool, Jetōb eo an Anij āinwōt juōn kijeek eaar bwil. Moses, Elijah, im elōn̄ bar armej ro jet jān lan̄ raar waļo̧k ilo iien in, ekoba Jemedwōj Ilan̄ im Nejin, RiLo̧mo̧r eo an laļ in, Jisōs Kraist.2
Juōn iaan m̧andenļo̧k ko rellōn̄ Joseph eaar būki ilo Kirtland eaar juōn m̧andenļo̧k eaar ņa etan “būlkōn olive … m̧wijit ļo̧k jān Wōjke an Paradise, im ennaan in aenōm̧m̧an eo an Irooj n̄an kōj” (kōmeļeļe eo n̄an D&C 88). Madenļo̧k in ekabwilōn̄lōn̄ ekoba kūr eo ekōpakak, “Epaake tok eō im Inaaj epaake waj eok; pukōt eō ilo niknik im kwōnaaj lo eō” (D&C 88:63). Ilo an Armej ro rekwojarjar ilo Kirtland epake ļo̧k Irooj, E eaar lukkuun epaake ļo̧k er, lutōkleplep kōjeram̧man ko an lan̄ ioon pōran ro rej tōmak.
Juōn Lutōkleplep in Jetōb
Bōlen jem̧ļo̧k eo an loļo̧k kein ilo jetōb raar waļo̧k ilo iien aje eo an Kirtland Tampeļ eo ilo Maaj 27, 1836 eo. Juōn iaan ro raar pād eaar 28-iiō-dettan William Draper, eo eaar kōmeļeļeik raan eo āinwōt “raan in Pentecost eo.” Eaar jei: “Eaar wōr juōn iien kōn lutōkleplep an Jetōb eo an Irooj, jon̄an pen eo aō eaar jab bwe n̄an jei likio in ak tiō n̄an kwaļo̧k e. Bōtaab Inaaj pād ijin n̄an ba bwe Jetōb eo eaar lukōtleplep im kar itok kōto eo ekajoor an waļo̧ktok im kar kobrak m̧weo, jon̄an elōn̄ ro me raar pād raar kōnono ilo kajin ko im elolo ko im kar loi enjeļ ro im kanaan ko, im wōr juōn iien lan̄lōn̄ eļap āinwōt kar jab jeļā kake ilo epepen in.”3
Waļo̧ktok kein ilo jetōb raar jab wōr wōt jon̄aer n̄an ro raar pād ilowaan tampeļ eo, bwe “armej ro ipeļakier raar bar ilo̧k ippān doon ļo̧k (ron̄jake ainikien eo ejeja ilowaan, im lo juōn meram erabōlbōl āinwōt juōn joor in kijeek ej pād ioon Tampeļ eo), im raar ļo̧kjeņ aer ilo ta eo eaar bōk jikin.”4
Lorenzo Snow (1814–1901), tok ālik erom̧ Būreejtōn an Kabun̄ in, eaar joke ilo Kirtland ilo tōren jeram̧m̧an in. Eaar loe, “Juōn emaron̄ kar pijaik ļo̧k bwe ālkin bōk waļo̧k ļo̧k kein raiboojoj ejjeļo̧k kapo ekar maron̄ in kapo Armej ro Rekwojarjar.”5
Bōtaab, ilo m̧ool, en̄jake ko reļļap ilo jetōb raar jab kōm̧m̧an bwe kōm en rōļo̧k jān jum̧ae im mālijjon̄ ko. Jet wōt allōn̄ ālkin an kōjeram̧m̧an tampeļ eo, ajeded in apan̄ in menin jeram̧m̧an ko kar im̧we Amedka, im Kirtland kar lukkuun ļap an jelete. Jikin kakkoņ jāān ko kar jorrāān, kōm̧m̧an bwe elōn̄ ren pād ilo apan̄ ilo jāān. N̄an kōm̧m̧an bwe aorōk ko ren lukkuun jorrāān, elōn̄ iaan Armej ro rekwojarjar me raar pejpetok n̄an Kirtland kar itok kōn wōt jet m̧weuk ko m̧weier, jab jeļā ta eo renaaj kar kōm̧m̧ane ilo aer tōkeak ļok ak ekōjkan aer naaj maron̄ mour.
Ejjab etto, kain̄tanan ko raar waļo̧k im rinana ro raar ejaak ņae Armej ro rekwojarjar. Ro uwaan Kabun̄ in—men̄e jet iaer raar lukkuun epaak ļo̧k Rikanaan eo, elōn̄ ro me raar pād ilo aje eo an tampeļ eo—raar wōtļo̧k jān tōmak im kar liakeļo̧k Joseph āinwōt juōn rikanaan riab.
Ke Iaar etetal turin Kirtland Tampeļ eo ippān kōrā eo ippa im ļaddik ro jibū, Ij kejōkļo̧kjeņ ewi jon̄an an kar kabūrom̧ōjmōj bwe jet raar jab maron̄ tōmak wōt men̄e ālkin an waļo̧k ļo̧k ko ilo jetōb raar kam̧ool kaki. Ewi jon̄an an kar kabūrom̧ōjm̧ōj bwe raar maron̄ jab niknik n̄an jem̧ļo̧k in ilo kajirere im kōnana eo an ro rejjab tōmak. Ewi jon̄an an kabūrom̧ōjm̧ōj, ke raar jelm̧ae mālijjon̄ kōn jāān ak apan̄ ko jet, raar jab maron̄ in kake n̄an er make im kar lo kajoor eo n̄an pād wōt ilo tōmak. Ewi jon̄an kar jab jeram̧m̧an bwe er ilo juōn jōkjōk raar jerwane ettōņak eo kōn iien m̧admōd eo ekabwilōn̄lōn̄ ilo jetōb ilo aje eo an tampeļ eo.
Katak Ko
Ta eo jemaron̄ ekkatak jān tōre in ekabwilōn̄lōn̄ ilo bwebwenato eo an Kabun̄ in?
Juōn iaan men ko reļļap, katak ko an niknik ilo tōre eo ilo Kirtland ej bwe jetōb ko ad rej aikuj mōn̄ā eo ejjab ukoktak. Āinwōt an Būreejtōn Harold B. Lee (1899–1973) kar katakin: “Naan in kam̧ool ejjab juōn men eo me ewōr ippam̧ rainin im kwōj kōjparoke aolep iien. Naan in kam̧ool ej jim̧or eddōkļo̧k im eddōkļo̧k n̄an meram eo em̧ool, ak enaaj jako n̄an n̄e ejjeļo̧k, ej pedped ioon ta eo jej kōm̧m̧ane n̄an e. Ij ba, naan in kam̧ool eo me jej bar bōke raan n̄an raan ej men eo me lo̧mo̧ren kōj jān aujiid ko an rikōjdāt.”6 Jej aikuj in pād epaake ļo̧k Irooj aolep raan eļan̄n̄e jej aikuj in eļļā ioon apan̄ eo me jej aolep aikuj in jelm̧ae.
Ilo jet wāween ko laļ in ad rainin ej āinļo̧k wōt Kirtland ilo 1830 ko. Jej barāinwōt mour ilo iien ko liaajļo̧ļ ikijien jāān. Elōn̄ ro me rej kaen̄taan im jōkpen ņae Kabun̄ in im ro uwaan. Mālijjon̄ ko an kajjojo im aolep remaron̄ jet iien āinwōt reļļap.
En̄in ej iien eo jej aikuj, eļap jān m̧okta, n̄an epaakļo̧k Irooj. Ilo ad kōm̧m̧ane, jenaaj jeļā ta meļeļe in n̄an an Irooj epaak tok kōj. Ilo ad bukōt E ilo niknik eļap jān jon̄an, jenaaj lukkuun loe E. Enaaj alikkar ad loe bwe Irooj ejjab kowaan Kabun̄ eo An ak Armej ro rekwojarjar An rej tōmak. Māj ko mejād renaaj peļļo̧k, im jenaaj lo E ej kōpeļļo̧k wūntō ko ilan̄ im kōļapļo̧k an katutuik kōj kōn meram eo An. Jenaaj lo kajoor ilo jetōb n̄an anjo jekdoon ilo iien ko reppen tata.
Men̄e jet iaan Armej ro rekwojarjar ilo Kirtland raar jerwane erreim̧aanļo̧k eo kōn en̄jake ko ilo jetōb eaar wōr ippāer, elōn̄ raar jab. Kumi ko elōn̄ uwaaer, ekoba William Draper, kar dim wōt n̄an jeļāļo̧kjeņ eo ilo jetōb Anij eaar leļo̧k n̄an er im kar wōnmaanļo̧k wōt im ļoor Rikanaan eo. Ilo iaļ eo raar ioon eļapļo̧k mālijjon̄ ko relukkuun kōmetak bōtaab eaar barāinwōt ļapļo̧k eddōk eo aer em̧m̧an ilo jetōb m̧ae iien eo, ilo jem̧ļo̧kin, ro raar nikinik n̄an jem̧ļo̧k in raar “bōk er … ilo wāween m̧ōņōņō eo ejjeļo̧k jem̧ļo̧kin” (Mosaia 2:41).
Komaron̄ in Dāpiji
Eļan̄n̄e kwōj poo n̄an erom̧ ebbeer ak jako tōmak, kememej Armej ro rekwojarjar ro me raar tōmak me raar pād wōt ilo m̧ool ilo Kirtland. Kaitokļo̧k Jidik Dāpiji Komaron̄ kōm̧m̧ane men in! Kwōj m̧ōttan juōn epepen eo eaorōk. Kar kōpooj eok im kōjparok eok n̄an mour ilo iien in aorōk ilo kōm̧anm̧an in an laļ in ad aiboojoj. Ewōr juōn am̧ kadkad in aiboojoj in aļ ippam̧ im kōn menin ewōr aolep tōļan ko remenin aikuj n̄an kōm̧m̧an bwe mour eo am̧ en juōn bwebwenato indeeo eo ewejāpādik.
Irooj eaar kōjeram̧m̧an eok kōn juōn naan in kam̧ool kōn m̧ool eo. Em̧ōj am̧ kar en̄jake kajoor in kareel eo An im kar kam̧ool kajoor eo An. Im eļan̄n̄e kwōj wōnmaanļo̧k wōt n̄an pukōt E, E enaaj wōnmaanļo̧k wōt im lewaj n̄an eok en̄jake ko rekwojarjar. Ippān menin im menin letok ko jet ilo jetōb, kwonaaj maron̄ in ejjab wōt ukōt mour eo am̧ n̄an em̧m̧anļo̧k ak barāinwōt n̄an kōjeram̧m̧an im̧ōko imōm̧, ward ko ak branch ko, jukjukinped ko, jikin kweilo̧k ko, bukōn ko, im laļ ko kōn em̧m̧an eo am̧.
Emaron̄ pen n̄an lo menin ilo jet iien ko, bōtaab kaitokļo̧k jidik dāpiji, bwe “mej ear jab loi, im lo̧jilin̄ ear jab ron̄jake, im re jan̄in deļo̧n̄ ilo būruon armej, men ko jabdewōt Anij e ar kapojak n̄an ro rej yokwe E.” im kōttar E (1 Korint 2:9; bar lale D&C 76:10; 133:45).
Ij kwaļo̧k kam̧ool kōn m̧ool eo kōn gospel eo an Jisōs Kraist eaar jepļaktok im m̧ool eo kōn men in, Kabun̄ in An. Ij kam̧ool kōn aolepen būruwō im aō bwe Anij emour, bwe Jisōs Kraist ej Nejin im ej jutak im̧aan Kabun̄ in eļap. Ewōr juōn ad rikanaan ioon laļ in bar juōn alen, Būreejtōn Thomas S. Monson.
Jān maron̄ kememej wōt katak eo an Kirtland im kaitokļo̧k jidik dāpiji—jekdoon n̄e men ko āinwōt reppen. Jeļā im kememej menin: Irooj ej iakwe kwe. E ej kememej kwe. Im E enaaj ļapļo̧k an rie ro me rej “niknik ilo tōmak n̄an jem̧ļo̧kin” D&C 20:25).
© 2009 by Intellectual Reserve, Inc. Aolep jim̧we ko rej an. Kar jeje ilo USA. Kōmālim kajin Pālle eo: 6/09. Kōmālim ukok eo: 6/09. Ukok in First Presidency Message, January 2010. Marshallese. 09361 874