Parau poro‘i na te Peresideniraa Matamua, Tenuare 2010
A mau maite â
Hoê o te mau haapiiraa i te tau no Kirtland oia ïa te hinaaroraa ia faaamu-pinepine-hia to tatou varua E mea ti‘a ia tatou ia faae‘a piri noa i te Fatu i te mau mahana atoa mai te mea te hinaaro nei tatou ia upooti‘a i te mau ati e faaruruhia nei e tatou.
I te tau ve‘ave‘a i ma‘iri a‘e nei ua rave mai maua to‘u hoa faaipoipoi i ta maua na mootua maehaa tamaroa i Kirtland, Ohio. O te hoê rave‘a taa-ê e te faahiahia mau na maua i te farereiraa ia raua hou raua a haere atu ai no ta raua tau misioni.
I te roaraa o to matou tere i reira, ua haapii mai matou i te auraa mau o te mau ati o te peropheta Iosepha Semita e o te feia mo‘a i parahi na i Kirtland. Ua itehia te reira tau no te aamu o te Ekalesia ei tau no te mau tamataraa e rave rahi, tera râ ei mau haamaitairaa hanahana atoa râ.
I Kirtland ua horo‘a te Fatu i te tahi o te mau faaiteraa faahiahia mau o te ra‘i e te mau horo‘araa pae varua o tei ore i itehia e to te ao nei. E ono ahuru ma pae tuhaa no Te Parau Haapiiraa e Te Mau Parau Fafau tei fariihia i Kirtland e i te mau oire ati noa‘e – e mau heheuraa o tei horo‘a mai i te maramarama e i te ite apî no ni‘a i te mau tumu parau mai te tae-piti-raa mai, te aupururaa i tei veve, te faanahonahoraa no te faaoraraa, te mana no te autahu‘araa, te parau paari, te tuhaa ahuru, te hiero, e te ture no te haamo‘araa.1
O te hoê tau no te tupuraa pae varua faito ore. Oia ho‘i, te Varua o te Atua mai te hoê auahi ama ra. I taua tau ra ua fâ mai o Mose, Eliaha, e e rave rahi atu feia no te ao ra, e tae noa’tu i to tatou Metua i te Ao ra e Ta’na Tamaiti, te Faaora o te Ao nei, o Iesu Mesia.2
Hoê o te mau heheuraa e rave rahi i fariihia e Iosepha i Kirtland o te hoê ïa heheuraa tei piihia e ana te « rauere olive… tei pafa‘ihia mai i ni‘a i te tumu raau o te Parataiso, e te parau poro‘i no te hau a te Fatu no tatou » (omuaraa o te PH&PF 88) Teie heheuraa faahiahia tei roto atoa te aniraa manihini hanahana, « a haafatata mai ia‘u nei e haafatata atu ïa vau ia outou na ; a imi itoito noa mai ia‘u nei e ite mai ho‘i outou ia‘u » (PH&PF 88:63) A haafatata ai te feia mo‘a no Kirtland i te Fatu, ua haafatata mau atu Oia ia ratou, ma te niniiraa i te mau haaamaitairaa o te ra‘i i ni‘a i te upoo o te feia haapa‘o.
Hoê niniiraa pae varua
Penei a‘e te tumu mau o teie mau faaiteraa pae varua ua tupu mai i te taime a haamo‘ahia ai te hiero no Kirtland i te 27 no mati 1836 Hoê o te mau taata i reira e 28 matahiti o William Draper, o tei faaite i taua mahana ra ei « mahana o te Penetetote ». Ua papa‘i oia : « O te hoê taime te reira no te niniiraa o te Varua o te Atua, o te ore roa i ta‘u peni e ti‘a ia papa‘i i te taatoaraa o te reira e aore râ i to‘u arero i te parau i te reira. Tera râ e parau atu vau i te reira e ua niniihia te Varua e ua tomo mai te hoê mata‘i puai e ua faaî i te fare, e e rave rahi te feia i reira tei parau i te mau reo e tei farii i te mau orama e tei ite i te mau melahi e tei tohu, e ua farii i te hoê iteraa taatoa no te oaoa mai tei ite-ore-hia i roto i teie u‘i ».3
Aita teie mau faaiteraa pae varua i taoti‘a-noa-hia no te feia i roto i te hiero, no te « feia tapiri mai ua haere amui mai (e faaroo i te hoê maniania mataro-ore-hia i reira, e a ite ai i te hoê maramarama anaana mai te hoê hihi auahi i te pouraa i ni‘a i te hiero) e ua maere roa ratou i te mea i tupu ».4
Lorenzo Snow(1814-1901), o tei riro mai i muri iho ei peresideni no te Ekalesia, tei ora na i Kirtland i te reira tau haamaitaihia. Ua faaite oia e, « e nehenehe e mana‘ohia e i muri iho i te fariiraa i teie mau faaiteraa hanahana e eita roa te faahemaraa e faaturori i te feia mo‘a ».5
Tera râ, e oia mau, eita te mau iteraa rau rarahi pae varua e faaatea-ê ia tatou i te ati e i te mau tamataraa. Te tahi tau ava‘e noa i muri iho i te haamo‘a-raa-hia te hiero, ua tupu te hoê ati rahi no te faarava‘iraa faufaa tei faaaueue i te Mau Hau Amui no Marite, e tei farii-atoa-hia e to Kirtland. Ua topa tari te mau fare moni, na te reira i haafifi roa i te rahiraa i te pae moni. No te faarahi atu â i te mau mea, e rave rahi feia mo‘a tei haere e faaea i Kirtland ua tae mai e te tahi maa tauihaa rii, ma te ite ore eaha ta ratou e rave ia tae atu ratou, e aore râ e nahea ratou i te faarava‘i ia ratou.
E mea maoro, te mau haamani-ino-raa e te mau taata iino i te aroraa i te feia mo‘a. Te mau melo o te Ekalesia – tae noa’tu te tahi o ratou tei piri roa i te peropheta, e te rahiraa o ratou i tae i te haamo‘araa i te hiero – tei taiva e tei faautu‘a ia Iosepha ei peropheta faufaa ore.
A hahaere ai au na piha‘iho i te hiero no Kirtland e to‘u hoa faaipoipo e ta maua na mootua tamaroa, ua feruri au i te huru fifi no te tahi o ratou tei ore i faaea parau ti‘a noa i muri a‘e i te mau faaiteraa pae varua o ta ratou i ite mau. Eaha râ te huru mauiui, o ta ratou i ore i faaoroma‘i no te faaooraa e no te faainoraa a te mau taata iino. Aue te oto, i te faarururaa i te ati i te pae moni e aore râ te tahi atu mau aroraa, i ore te reira i faatae roa’tu i roto ia ratou e ua farii i te puai no te faaea parau-ti‘a noa. Aue te mauiui, mai te mea ra ua morohi roa ia ratou te auhune semeio pae varua i te haamo‘a-raa-hia te hiero.
Te mau haapiiraa
Eaha ta tatou e haapii mai no te reira tau faahiahia mau i roto i te aamu o te Ekalesia ?
Hoê o te mau haapiiraa rahi roa a‘e i te tau no Kirtland oia ïa te hinaaroraa ia faaamu-pinepine-hia to tatou varua. Mai ta te peresideni Harold B. Lee (1899-1973) i haapii mai : « e ere te iteraa papû i te hoê mea e vai ra ia outou i teie mahana e o ta outou e tape‘a noa ra. E nuu te iteraa papû i mua ia faarahihia e ia faahotuhia i te maramarama o te haapapûraa, e aore râ e faaiti mai i te aore, no roto i te mau ohipa ta tatou e rave ra. Te parau nei au e, te iteraa papû o ta tatou e faaapî nei i te mau mahana atoa o te mea ia o te faaora ia tatou i te mau herepata a te enemi ».6 E mea ti‘a ia tatou ia pee i te mau haapiiraa a te Fatu i te mau mahana atoa mai te mea te hinaaro nei tatou ia upooti‘a i te mau ati o ta tatou paatoa e faaruru nei.
E au ra, ua tuaea noa to tatou ao i teie mahana mai to Kirtland i te matahiti 1830. Te ora atoa nei tatou i roto i te mau tau arepurepu i te pae faufaa. Te vai ra te feia te haamani ino e te orure hau nei i te Ekalesia e to’na mau melo. I te tahi mau taime e au ra e ore te mau tamataraa no te taata iho e no te taatoaraa e au ia faaoroma‘ihia.
I te reira taime e hinaaro hau atu to tatou, i te haafatata roa’tu i te Fatu. A na reira ai tatou, e noaa ia tatou te iteraa i te auraa mau te haafatataraa mai te Fatu ia tatou. A imi ai tatou Ia’na ma te tuutuu ore, e ite-mau-hia Oia e tatou. E ite maramarama maitai tatou e aita te Fatu e faaru‘e i Ta’na Ekalesia e aore râ i Ta’na feia mo‘a haapa‘o. E araara to tatou mau mata, e e ite atu tatou Ia’na ia iriti i te mau maramarama o te ra‘i e ia ninii-hau-hia i ni‘a ia tatou To’na maramarama. E itehia ia tatou te puai pae varua no te upooti‘araa, e tae noa’tu i te mau tau ati.
Noa’tu e e rave rahi o te feia mo‘a no Kirtland ua morohi ïa ratou to ratou mau iteraa rau pae varua, no vetahi ra aita roa ïa. Te rahiraa, mai ia William Draper, o tei tape‘a maite noa i te ite pae varua ta te Atua i horo‘a ia ratou e o tei tamau noa i te pee i te peropheta. I te roaraa o to ratou haere‘a, ua faaruru ratou te mau ati e rave rahi oia atoa te mau tupuraa pae varua mâru tae roa’tu, i te hopearaa, te feia atoa i faaoroma‘i e tae roa’tu i te hopea « e fariihia ïa… i roto i te oaoa hope ore ra » (Mosia 2:41).
E nehenehe ia tatou e mau maite
Mai te mea e faahemahia outou ia haaparuparu e aore râ ia faaru‘e i te faaroo, a haamana‘o i te feia mo‘a haapa‘o o tei faaea parau-ti‘a noa i Kirtland. A mau maite â E nehenehe ia outou ia na reira ! Ua riro outou ei tuhaa no te hoê ui taa-ê. Ua faaineinehia e ua faataahia outou no te ora i teie tau faufaa rahi o te oraraa nei no to tatou paraneta fenua nehenehe. Ua farii outou i te hoê ti‘araa tiretiera e no reira te fariiraa i te mau tareni atoa e titauhia no te faariroraa i to outou oraraa ei manuïaraa mure ore.
Ua haamaitaihia outou e te Fatu i te hoê iteraa papû no te parau mau. Ua farii outou i Ta’na faaururaa e ua ite i To’na puai. E mai te mea e tamau â outou i te imi Ia’na, e tamau noa â Oia i te horo‘a mai ia outou i te mau iteraa rau hanahana. Ia teie e te tahi atu mau horo‘araa pae varua, e nehenehe ia outou eiaha noa e taui i to outou iho oraraa ia maitai roa’tu, tera râ no te haamaitai atoa i to outou mau fare, mau paroita e aore râ mau amaa, mau mataeinaa, mau oire, mau tuhaa oire e te mau nunaa i to outou maitai.
E nehenehe te reira e riro ei mea fifi ia hi‘ohia i te tahi mau taime, tera râ ia mau maite â, no reira « aore i hi‘ohia e te mata ra, aore i faaroohia e te tari‘a ra, aore ho‘i i ô i roto i te aau o te taata ra, o ta te Atua ïa i vaiiho no te feia i hinaaro ia’na ra » e tei tia‘i Ia’na ra (1 Korinetia 2:9 ; a hi‘o atoa PH&PF 76:10 ; 133:45).
Te faaite papû nei au no te parau mau no te evanelia i faaho‘i-faahou-hia mai a Iesu Mesia e te parau mau no te reira, Ta’na Ekalesia. Te faaite papû nei au ma to‘u aau atoa e te varua te ora nei te Atua, e o Iesu Mesia Ta’na Tamaiti e te ti‘a nei ei upoo faatere no teie Ekalesia rahi. Te vai faahou nei ta tatou te hoê peropheta i ni‘a i te fenua nei, oia ho‘i te peresideni Thomas S. Monson.
Ia haamana‘o noa tatou i te haapiiraa no Kirtland e ia mau maite no te hoê taime rii – noa’tu eaha te mau mea fifi e tupu mai. Ia ite e ia haamana‘o noa i teie : Ua here te Atua ia outou. Te haamana‘o nei Oia ia outou. E e paturu tamau noa Oia i te feia e « tapea maite ho‘i i te faaroo e tae noa’tu i te hopea » (PH&PF 20:25).
© 2008 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/09. Parau faati‘a no te iritiraa : 6/09. Iritiraa no First Presidency Message, January 2010. Tahitian. 09361 895