Parau poro‘i na te mau Tuahine Hahaere, TENUARE 2010
Te faarava‘iraa ia’na iho
A haapii i teie mau papa‘iraa mo‘a e te mau faahitiraa parau e aore râ, mai te mea e hinaarohia, a haapii i te tahi atu parau tumu o te haamaitai i te mau tuahine o ta outou e hahaere ra. A faaite i to outou iteraa papû no te parau haapiiraa. A ani manihini i te feia o ta outou e haapii ra ia faaite atoa i te mea o ta ratou i farii e i haapii mai.
Eaha te faarava‘iraa ia’na iho ?
« Te auraa o te parau faarava‘iraa ia’na iho oia ïa, te faaohiparaa i te taato‘araa o ta tatou mau haamaitairaa no ô mai i to tatou Metua i te Ao ra no te utuutu ia tatou iho e i to tatou mau utuafare e ia imi i te mau rave‘a no to tatou iho mau fifi ».’ E hopoi‘a na tatou tata‘itahi ia tinai i te mau fifi hou te reira a tupu ai e ia haapii nahea ia tatara i te mau tamataraa ia tupu mai te reira. …
Nahea tatou ia riro ei feia faarava‘i ia tatou iho ? E riro tatou ei feia faarava‘i ia tatou iho na roto i te ite, te haapiiraa, te piapa, te ‘ea i te pae tino, te taraniraa ma te paari i te moni e te mau faufaa, te haapuairaa i te pae varua, te faaineineraa no te mau taime rû e te tahi mau ohipa e tupu e te oraraa maitai i te pae totiare e te pae o te feruriraa.1
Julie B. Beck, Peresideni rahi no te Sotaiete Tauturu
Hoê hopoi‘a evanelia
« Ia ora ana‘e tatou i te oraraa tarani e ia faarahi ana‘e tatou i ta tatou mau horo‘a e ta tatou mau taleni, e rahi atu ïa to tatou aravihi i te haapa‘oraa ia tatou iho. Te haapa‘oraa ia tatou iho o te raveraa ïa i te hopoi‘a no to tatou iho oraraa pae varua e te oraraa pae tino e no te feia ta to tatou Metua i te Ao ra i tuu i raro a‘e i ta tatou tiaauraa. Ia noaa ana‘e ia tatou i te haapa‘o ia tatou iho e nehenehe mau ai ia tatou ia pee i te Faaora i te taviniraa e te haamaitairaa ia vetahi ê.
« E mea faufaa rahi ia ite e ua riro te haapa‘oraa ia’na iho ei rave‘a no te tapae i te hoê vahi. Ta tatou fâ hopea o te riroraa ïa mai te Faaora ra te huru, e e faarahihia taua fâ ra na roto i to tatou taviniraa ia vetahi ê ma te ore e haapa‘o noa ia tatou iho. E faarahihia aore râ e faaitihia to tatou aravihi no te tavini ia au i te faito o to tatou haapa‘oraa ia tatou iho.2
Elder Robert D. Hales no te Pŭpŭ no te Tino Ahuru Ma Piti Aposetolo
« Te faarava‘iraa ia’na iho o te hoê ïa hotu no ta tatou ohipa e ia ore e mo‘ehia te tahi atu mau raveraa atoa no to tatou maitai. O te hoê tuhaa faufaa roa te reira i roto i to tatou oraraa pae varua e tae noa’tu no to tatou maitai i te pae tino. No ni‘a i teie parau tumu, ua parau te peresideni Marion G. Romney [1897-1988] e : ‘A vaiiho ia matou ia ohipa no to matou mau hinaaro. Ia faarava‘i tatou ia tatou iho e ia vai ti‘amâ. E ore roa te faaoraraa e roaa i ni‘a i te tahi atu parau tumu. Te faaoraraa e ohipa na te taata tata‘itahi, e mea ti‘a ia tatou ia ohipa no to tatou iho faaoraraa i roto i te pae tino e tae noa’tu i roto i te mau mea pae varua’.
« Ua haapii na te peresideni Spencer W. Kimball [1895-1985] no ni‘a i te faarava‘iraa ia’na iho : ‘Te hopoi‘a a te taata tata‘itahi i te pae totiare, te pae aroha, te pae varua, te pae tino e aore râ te pae faufaa tei ni‘a na mua roa ia’na iho, te piti i ni‘a i to’na utuafare e te toru i ni‘a i te Ekalesia mai te mea e melo haapa‘o oia i reira.’”3
Peresideni Thomas S. Monson.
© 2009 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo Peretane : 6/09. Parau faati‘a no te iritiraa : 6/09. Iritiraa no Visiting Teaching Message, January 2010. Tahitian. 09361 895