iVaqa ni Veisiko, JANUERI 2010
Yaco mo Bula Rawati Iko
Vakavuvulitaka na ivolanikalou kei na vosacavuti se, kevaka e gadrevi, e dua tale na ivakavuvuli ka na vakalougatataki ira na marama o dau sikova.Wasea na nomu ivakadinadina me baleta na ivunau. Sureti ira ko vakatavulica tiko me ra wasea mai na veika era sa vakila ka vulica.
Na Cava na Bula Rawati Koya?
“‘Na bula rawati koya e kena ibalebale na noda vakayagataka na veivakalougatataki kece sara mai vei Tamada Vakalomalagi me da qaravi keda kina kei na noda matavuvale ka me da kunea kina na iwali ni noda dui leqa.’ Sa noda itavi yadua me da tovolea me da levea na leqa ni se bera ni yaco ka me da vulica me da lako sivita na veibolebole eso ena gauna e yaco kina. …
“Eda na bula rawati keda vakacava? Eda na bula rawati keda mai na noda rawata na kila ka, na vuli, na wilivola kei na volavola e veiganiti; ena noda lewa vakavuku na ilavo kei na ivurevure tale eso, ena noda tudei tu vakayalo, na noda vakarautaki keda tu ki na veileqa tubukoso kei na veika e dau yaco mai; kei na noda bulabula ena bula vakayago, veimaliwai kei na lomada.”1
Julie B. Beck, peresitedi raraba ni iSoqosoqo ni Veivukei.
E Dua na iTavi Vakosipeli
“Ni da bula rawati keda ka vakaikuritaka na isolisoli kei na taledi e dui tu vei keda, sa na yaco me da rawati keda vakalevu cake. Na bula rawati keda sai koya na noda colata vakataki keda na icolacola me da tiko vinaka kina o keda ka vakakina o ira era sa nuitaki keda kina na Tamada Vakalomalagi. Eda na qai rawa walega ni vakamurimuria na iVakabula ena nodra vakalougatataki ka qaravi na tani kevaka eda sa bula rawati keda tiko.
“Sa ka bibi me da kila tiko ni bula rawati koya e iyaya ni cakacaka me rawati kina na noda sasaga. Na ulu ni noda sasaga sai koya me da yaco me vaka na iVakabula, na sasaga oqori ena vukei mai na noda dauveiqaravi sega kina na nanumi koya ga, vei ira na tani. Na noda kaukauwa ni veiqaravi ena rawa ni vakalevutaki cake se vakalailaitaki sobu mai na ivakatagedegede ni noda bula rawati keda.”2
Elder Robert D. Hales ena Kuoramu ni iApositolo Le Tinikarua.
“Na bula rawati koya e vua ni noda cakacaka ka conaki kina na veicakacaka kece sara ni welefea. Oqo e dua na tiki yaga sara ni noda tiko vinaka vakayalo ka vakakina na tiko vinaka vakayago. Me baleta na ivakavuvuli oqo, e kaya kina o Peresitedi Marion G. Romney [1897–1988]: ‘Me da cakacakataka na veika eda gadreva. Me da bula rawati keda ka tu vakataki keda. E sega tale ni dua na ivakavuvuli eda na vakabulai kina. Na vakabulai e ka ni tamata yadua, sa dodonu me da cakacakataka na noda dui vakabulai yadua ena veika vakayago ka vakakina ena veika vakayalo.’ …
“E vakuria o Peresitedi Spencer W. Kimball [1895–1985] ena nona vakavuvulitaka me baleta na bula rawati koya: ‘Na itavi me baleta na nona tiko vinaka vakaveimaliwai, tiko vinaka ni lomana, tiko vinaka vakayalo, vakayago, se ena veika vakailavo sa koto, taumada vua, tarava ena nona matavuvale, qai muri ena Lotu kevaka e lewenilotu yalodina.’”3
Peresitedi Thomas S. Monson.
© 2009 mai na Intellectual Reserve, Inc. Dodonu kece e taqomaki. Tabaki e Amerika.Vakadonui me Vakavalagi: 6/09. Vakadonui me vakadewa: 6/09. iVakadewa ni Visiting Teaching Message, January 2010. Fijian. 09361 858