Mensahe iti Visiting Teaching, ENERO 2010
Panagbalin a Managpannuray iti Bukod a Kabaelan
Isuroyo dagitoy a nasantuan a kasuratan ken naadaw a sao, no kasapulan, sabali pay a pagbatayan a mangbendision kadagiti kakabsat a babbai a sarungkaranyo. Iburayyo ti pammaneknek maipapan iti doktrina. Awisenyo dagiti sarungkaranyo nga iburayda no ania ti narikna ken nasursuroda.
Ania ti Panagpannuray iti Bukod a Kabaelan?
“‘Ti panagpannuray iti bukod a kabaelan ket kaipapananna ti panangusar iti amin a parabur a naggapu iti Nailangitan nga Ama a pangasikaso iti bagbagitayo ken kadagiti pamiliatayo ken mangsapul kadagiti pangrisut para iti amin a parikut wenno problematayo.’ Addaan ti tunggal maysa kadatayo iti pagrebbengan a mangpadas a mangliklik kadagiti parikut sakbay a mapasamakda ken mangsursuro a mangparmek kadagiti karit no tumpuarda. …
“Kasano ti panagbalintayo a mapagpannuray iti bukod a kabaelan? Agbalintayo a mapagpannuray iti bukod a kabaelan babaen ti pananggun-od iti umdas a pannakaammo, edukasion, ken kabaelan nga agbasa ken agsurat; panangimaton a nainsiriban iti kuarta ken kinabaknang, panagbalin a napigsa iti kinaespirituan, panagsagana kadagiti di mapakpakadaan a pasamak ken dagiti mabalin a parikut; ken babaen ti kaadda ti salun-at ti bagi ken pagimbagan iti pannakipulapol ken iti rikna.”1
Julie B. Beck, sapasap a presidente ti Relief Society.
Maysa a Pagrebbengan iti Ebanghelio
“Bayat ti panagbiagtayo nga addaan iti panangibilang iti masakbayan ken panangpadur-astayo kadagiti sagut ken talentotayo, agbalintayo nga ad-adda a mapagpannuray iti bukodtayo a kabaelan. Ti panagpannuray iti bukod a kabaelan ket panangawat iti pagrebbengan para iti naespirituaan ken naindagaan a pagimbagantayo ken para kadagitay intalek kadatayo ti Nailangitan nga Ama nga aywanantayo. No mapagpannuraytayo iti bukodtayo a kabaelan laeng a sipupudno a matuladtayo ti pagwadan ti Mangisalakan iti panagserbi ken panangbendision kadagiti sabali.
“Napateg a maawatan a ti panagpannuray iti bukod a kabaelan ket maysa a pamuspusan wenno ramit tapno magun-od ti panggep a tun-oyen. Ti kangrunaan a panggep a tun-oyentayo ket ti panagbalintayo a kas iti Mangisalakan, ken mapadur-as dayta a panggep a tun-oyen babaen ti saan a managimbubukod a panagserbitayo kadagiti sabali. Ti kabaelantayo nga agserbi ket dumakkel wenno bumassit babaen ti tukad ti panagpannuray iti bukodtayo a kabaelan.”2
Ni Elder Robert D. Hales ti Korum dagiti Sangapulo-ket-dua nga Apostol.
“Ti panagpannuray iti bukod a kabaelan ket maysa a bunga ti aramidtayo ken mangipaay iti pundasion wenno mangpapigsa iti amin a dadduma pay nga aramid a pagimbagan. Maysa daytoy a napateg nga elemento iti naespirituan kasta met iti temporal a pagsayaatantayo. Maipanggep iti daytoy a pagbatayan, kinuna ni Presidente Marion G. Romney [1897–1988]: ‘Agtrabahotayo koma para iti no ania ti kasapulantayo. Agbalintayo koma a mapagpannuray iti bukod a kabaelan ken saantayo nga agpannuray iti sabali. Saan a magun-od ti pannakaisalakan babaen ti sabali pay a pagbatayan. Ti pannakaisalakan ket pakaseknan ken pagrebbengan ti maysa a tao, ket nasken nga itrabahotayo ti bukodtayo a pannakaisalakan a mainaig kadagiit temporal kasta met kadagiti naespirituan a banag.’ …
“Innayon pay nga insuro ni Presidente Spencer W. Kimball [1895–1985] maipanggep iti panagpannuray iti bukod a kabaelan: “Ti pagrebbengan para iti pagsayaatan wenno pagragsakan ti tunggal tao a mainaig iti pannakilangen, rikna, kinaespirituan, bagi, wenno ekonomia ket agpannuray nga umuna iti bagina mismo, maikadua iti pamiliana, ken maikatlo iti Simbaan no la ket napudno a miembro isuna.’”3
Presidente Thomas S. Monson.
© 2009 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti Visiting Teaching Message, January 2010. Ilokano. 09361 864