Mensahe ti Umuna a Panguluen, Enero 2010
Agtultuloykayo iti Kinapudnoyo
Maysa kadagiti napaut nga adalen ti panawen ti Kirtland ket ti panagkasapulan dagiti espiritutayo iti agtultuloy a pannakataraon. Masapul a surotentayo dagiti pannursuro ti Apo no nasken a maisalakantayo iti rigat a nasken a lasatentayo amin.
Itay napalabas a kalgaw impasiarmi nga agassawa dagiti singin nga appokomi a lallaki iti Kirtland, Ohio. Daytoy ket maysa a naisangsangayan ken napateg unay a gundaway para kadakami tapno mangbubos iti orasmi kadakuada sakbay a pumanawda a mapan kadagiti misionda.
Kabayatan ti isasarungkarmi idiay, nasursuromi ti nasaysayaat a pannakaawat kadagiti pasamak a nakaipasanguan ni Propeta Joseph Smith ken dagiti Santo a nagnaed idi iti Kirtland. Maam-ammo dayta a panawen ti pakasaritaan ti Simbaan a kas maysa a panawen dagiti nakaro a pannubok ngem kaindaklananda met a bendision.
Iti Kirtland impaay ti Apo ti sumagmamano kadagiti nakaskasdaaw unay a nailangitan a parangarang wenno manipestasion ken naespirituan a sagsagut a napasaranen daytoy a lubong. Ti innem a pulo-ket-lima a benneg ti Doktrina ken Katulagan ket naawat iti Kitland ken kadagiti masakupan a lugar iti aglawlaw—dagiti paltiing a nangisangbay iti baro a lawag ken pannakaawat maipapan kadagiti topiko a kas iti Maikadua a Yaay, panangtaripato kadagiti agkasapulan, ti plano ti pannakaisalakan, turay ti priesthood, ti Word of Wisdom wenno Nainsiriban a Balikas, apagkapullo, ti templo, ken ti linteg ti konsekrasion.1
Daytoy ket maysa a panawen ti naidumduma a naespirituan a panagdur-as. Kinapudnona, kasla apuy a gumilgil-ayab ti Espiritu ti Dios. Nagparang da Moises, Elias, ken dagiti adu a dadduma pay a nailangitan a parsua kabayatan daytoy a panawen, agraman ti Nailangitan nga Ama ken ti Anakna, ti Mangisalakan ti lubong, a ni Jesucristo.2
Maysa kadagiti adu a paltiing nga inawat ni Joseph iti Kirtland ket ti paltiing nga inawaganna iti “bulong ti olibo … a naala manipud iti Kayo ti Paraiso, ken ti mensahe ti Apo iti kappia kadatayo” (pakauna iti DkK 88). Daytoy nakaskasdaaw a paltiing iramanna ti naindaklan nga awis, “Umasidegkayo kaniak ket umasidegakto kadakayo; sapulendak a sireregta ket masapulandakto” (DkK 88:63). Bayat ti yaasideg dagiti Santo ti Kirtland iti Apo, sipupudno nga immasideg Isuna kadakuada, nga imbukbokna dagiti bendision ti langit kadagiti ulo dagiti napudno.
Maysa Naepirituan a Panangibukbok
Nalabit a napasamak dagitoy a naespirituan a parangarang wenno manipestasion kabayatan ti dedikasion ti Templo ti Kirtland idi Marso 27, 1836. Maysa kadagiti nakaimatang ket ti agtawen iti 28 a ni William Draper, a nangiladawan iti aldaw a kas maysa nga “aldaw ti Pentecostes.” Insuratna: “Adda kasta a panawen ti panangibukbok ti Espiritu ti Apo, a diak kabaelan a panunoten dagiti balikas tapno isuratko daytoy wenno diak kabaelan nga iladawan ti napasamak. Ngem sawekto ditoy a ti Espirituna ket naibukbok iti kasta unay ken immay a kasla nabileg a dumardarasudos nga angin ket pinunnona ti balay, tapno dagiti adu nga adda idiay ket nagsaritada kadagiti sabali a pagsasao ken naaddaanda kadagiti parmata ken nakakitada kadagitri anghel ket nagipadtoda, ken naaddaanda iti sapasap a padas ti kasta a panagrag-o a di pay napadasan idi iti daytoy a kaputotan.”3
Dagitoy a naespirituan a parangarang ket saan laeng a para kadagiti adda iti uneg ti templo, gapu ta “naggigiddan a nagtataray nga immay dagiti tao iti sangakaarrubaan (a dimngeg iti karkarna nga uni iti uneg, ken nakitada ti maysa a naraniag a silaw a kasla adigi ti apuy a nagdisso iti Templo), ket nasdaawda iti no ania ti mapaspasamak idiay.”4
Ni Lorenzo Snow (1814–1901), nga idi agangay nagbalin a Presidente ti Simbaan, ket agnanaed iti Kirtland kabayatan daytoy a nagasat a panawen. Napaliiwna, “Mapanunot koma ti tunggal maysa a kalpasan ti panangawat kadagitoy a nakskasdaaw a parangarang wenno manipestasion awan ti pannulisog a makaparmek koma kadagiti Santo.”5
Ngem, kinapudnona, dagiti naindaklan a naespirituan a padas ket saan a makailiklik kadatayo kadagiti pannuppiat ken pannubok. Sumagmamano a bulan laeng kalpasan ti dedikasion ti templo, ti sapasap a krisis iti ekonomia ti namagkintayeg wenno nangapekto iti Estados Unidos, ket narikna unay ti Kirtland dagiti bunga daytoy. Nagserra dagiti bangko, nga ad-adda pay a nangpakaro iti kasasaad iti pakaseknan iti kuarta ti kaaduan. Ti ad-adda pay a nangpakaro kadagiti banag, adu kadagiti Santo a napan nagindeg iti Kirtland ti simmangpet a bassit laeng dagiti inkuyogda a kuarta ken sanikuada, a dida ammo no ania ti aramidenda apaman a makasangpetda wenno no kasano a makapagbiagda.
Idi agangay, nagraira dagiti pammarparigat ket nabuangay dagiti grupo ti managdakdakes a maibusor kadagiti Santo. Dagiti miembro ti Simbaan—uray pay dagiti sumagmamano a nasinged unay idi iti Propeta, adu kadagitoy ti nakaimatang iti dedikasion ti templo—ket timmallikud iti kinapudno ket kinondenada ni Joseph a kas natnag wenno nagbasol a propeta.
Kabayatan ti pannagnak iti asideg ti Templo ti Kirtland a kaduak ti asawak ken dagiti appokok a lallaki, inutobko nga anian a nakabutbuteng gapu ta adda dagiti saan a makapagtalinaed a napudno uray kalpasan dagiti naespirituan a parangarang wenno manipestasion a nasaksiandan. Anian a nakaladladingit gapu ta saanda a nakapagibtur iti panangumsi ken panagdillaw dagiti awanan iti pammati. Anian a nagliday gapu ta, idi maipasangoda iti pannubok iti pakaseknan iti kuarta wenno dadduma pay a panagkarigatan, saanda a natukod iti kaungganda ken nasarakan ti pigsa tapno agtalinaedda a napudno. Anian a nagdaksanggasat gapu ta no kaskasano nalipatandan ti namilagruan ken naespirituan nga apit iti dedikasion ti templo.
Dagiti Adalen
Ania dagiti masursurotayo manipud iti daytoy nakaskasdaaw a panawen iti pakasaritaan ti Simbaan?
Maysa kadagiti naindaklan, napaut nga adalen ti panawen ti Kirtland ket ti panagkasapulan a kanayon a pannakataraon dagiti espiritutayo. Kas iti insuro ni Presidente Harold B. Lee (1899–1973): “Ti pammaneknek ket saan a maysa a banag nga adda kenka ita ket pagtalinaedem a kanayon. Ti pammaneknek ket dumakkel a dumakkel agingga iti tukad a di pulos mapagduaduaan, wenno bumassit a bumassit agingga nga umawan a maminpinsan, agpannuray iti no ania ti aramidentayo maipapan iti daytoy. Kunak, ti pammaneknek a pabaruentayo iti inaldaw ket ti banag a mangisalakan kadatayo kadagiti palab-og wenno panangallilaw ti kabusor.”6 Nasken a surotentayo dagiti pannursuro ti Apo iti inaldaw no nasken a maandurantayo ti rigat a nasken a mapasarantayo amin.
Iti sumagmamano a wagas maipada ti lubongtayo iti agdama iti Kirtland idi panawen ti 1830. Agbibiagtayo met kadagiti panawen ti rigat iti pakaseknan iti kuarta. Adda dagitay mangidadanes ken mangriribuk a maibusor iti Simbaan ken kadagiti miembrona. Dagiti bukod ken sapasap a pannubok ket mabalin a kasla makarimbaw no dadduma.
Dayta ti panawen a kasapulantayo, nga ad-adda pay, ti umasideg iti Apo. Bayat ti panangaramidtayo, maammuantayonto no ania ti kayat a sawen ti panangpaasidegtayo iti Apo kadatayo. Bayat ti napaspasnek a panangsapultayo Kenkuana, awan duadua a masarakantayonto Isuna. Makitatayonto a silalawag a saan a baybay-an ti Apo ti Simbaanna wenno dagiti napudno a Santona. Naan-anayto ti pannakaawattayo, ket makitatayonto Isuna a manglukat kadagiti tawa ti langit ket isagutannatayo iti ad-adu pay a lawagna. Masarakantayonto ti naespirituan a pigsa tapno agbiag uray kabayatan dagiti karirigatan a panawen.
Nupay sumagmamano kadagiti Santo iti Kirtland ti nakalipat kadagiti naespirituan a padasda, kaaduan ti saan. Ti kaaduan, a pakaibilangan ni William Draper, ket kimpet a naimbag iti naespirituan a pannakaammo nga inted ti Dios kadakuada ket intultuloyda a sinurot ti Propeta. Iti nagnaanda napadasanda dagiti ad-adu pay a napapait a pannubok ngem ad-adu met a naespirituan a panagdur-as agingga nga, iti kamaudiananna, dagiti nagibtur agingga iti panungpalan ket “maawatdanto …iti kasasaad nga awan ti gibusna a kinaragsak” (Mosiah 2:41).
Makapagtultuloykayo
No man masulisogkayo a maawanan iti namnama wenno mapukawan iti pammati, laglagipenyo dagidi napudno a Santo a nagtalinaed a pudno iti Kirtland. Itultuloyyo ti kinapudnoyo. Maaramidyo daytoy! Pasetkayo ti maysa a naisangsangayan a kaputotan. Naisagana ken nataginayonkayo tapno agbiag iti daytoy a napateg a panawen iti kaadda ti napintas a daga a planetatayo. Addaankayo iti listaan ti kapuonan iti langit ket ngarud addaankayo iti amin a kasapulan a talento a mangaramid iti biagyo a maysa nga agnanayon a pakasaritaan ti balligi.
Pinaraburannakayo ti Apo iti maysa a pammaneknek maipapan iti kinapudno. Nariknayon ti impluwensiana ket nasaksianyon ti bilegna. Ket no itultuloyyo ti mangsapul Kenkuana, itultuloynanto nga ikkannakayo kadagiti sagrado a padas. Addaan kadagitoy ken iti dadduma pay a naespirituan a sagut, kabaelanyonto saan laeng a mangbalbaliw iti bukodyo a biag para iti pagsayaatan no di ketdi pay maparaburanyo dagiti pagtaenganyo, ward ken branchyo, siudad, estado, ken pagilianyo babaen iti kinaimbagyo.
Mabalin a narigat a kitaen a no dadduma, ngem agtultuloy nga agbalin a napudno, gapu ta “saan a nakita ti mata, ket saan a nangngeg ti lapayag; ket saan a simrek iti puso ti tao, dagiti banbanag nga insagana ti Dios kadagiti agayat kenkuana” ken agur-uray Kenkuana (1 Taga-Corinto 2:9; kitaen met iti DkK 76:10; 133:45).
Paneknekak ti kinapudno ti naisubli nga ebanghelio ni Jesucristo ken ti kinapudno daytoy, a Simbaanna. Paneknekak iti amin a pusok ken kararuak a sibibiag ti Dios, a ni Jesucristo ti Anakna ken agtakder nga ulo daytoy a naindaklan a Simbaan. Addaantayo manen iti maysa a propeta iti daga, a kas ken ni Presidente Thomas S. Monson.
Laglagipentayo koma a kanayon ti adalen maipapan iti Kirtland ket agtultuloytayo iti kinapudnotayo —uray no kasla naladingit dagiti banag. Ammuen ken laglagipen daytoy: ay-ayatennakayo ti Apo. Laglagipennakayo. Ken kanayon a tulongannanto dagitay “agtalinaed a napudno iti pammati agingga iti panungpalan” (DkK 20:25).
© 2009 ti ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, January 2010. Ilokano. 09361 864