Agtutubo

Ti Bendisionmo iti Patriarka

Inladawan ni Presidente Monson ti bendision ti patriarka a kas “bukod a Liahona a mangiturong ken mangtarabay kenka iti dalanmo.” Ngarud, ania daytoy a bendision, ken kasano a makatulong daytoy a mangtarabay iti biagmo?

Ania ti bendision ti patriarka?

Ti bendisionmo ket addaan iti dua a kangrunaan a panggep. Umuna, ibunannagnanto ti nagtaudam a puli, wenno ania a tribu iti balay ti Israel ti pakaibilangam. Maikadua, aglaonto daytoy iti pakaammo a tumulong a mangtarabay kenka. Ti bendisionmo ket mabalin nga aglaonto kadagiti kari, pammagbaga, ken ballaag.

Mano ti nasken a tawenko nga umawat iti bendisionko?

Awan ti naituding a tawen, ngem nasken nga addaanka iti naan-anay a nakem a mangipateg iti sagrado a kasasaad ti bendision. Adu a miembro ti mangrugi a mangpanunot maipapan iti panangawat kadagiti bendisionda kadagiti nasapa a tawen ti kinaagtutuboda.

Kasano nga awatek ti bendision?

Umuna, kasaritam ti bishop wenno branch presidentmo. No nakasagana ken maikarika, awatemto ti maysa a rekomenda. Kalpasan dayta, mabalinmo ti mangiskediul iti pannakipagkita iti patriarka iti lugaryo.

Ania ti aramidek iti bendisionko?

Idulinmo daytoy iti natalged a lugar, ken masansan a basaem daytoy. Laglagipem, sagrado ken bukodmo ti bendisionmo. Mabalinmo nga isarita daytoy kadagiti asideg a miembro ti pamilia, ngem nsken a saanmo nga isarita daytoy iti kaaduan. Kasta met, nga amin a bendision a nadakamat iti bendisionmo iti patriarka ket maibatay iti kinapudnom ken iti panawen ti Apo.