Mensahe ti Umuna a Panguluen, Pebrero 2010
Maipapan iti Panagbalin a Naespirituan a Nakasagana
Balakad manipud iti Propetatayo
Maysa a Pundasion ti Pammati
“No awanantayo iti nauneg a pundasion ti pammati ken natibker a pammaneknek iti kinapudno, mabalin a marigatantayo a mangsarked kadagiti narungsot a bagyo ken nalam-ek nga angin ti rigat nga umay a di mapakpakadaan iti tunggal maysa kadatayo.
“Ti mortalidad wenno ti panagbiag iti daga ket maysa a panawen ti pannubok, maysa a panawen tapno paneknekantayo ti bagbagitayo a maikaritayo nga agsubli iti imatang ti Nailangitan nga Amatayo. Tapno masuboktayo, nasken a mapadasantayo dagiti pannubok ken pagrigatan. Dagitoy ti mabalin a mangdadael kadatayo, ket mabalin a maupay ken agsisina dagiti kararuatayo—, dayta ket , no dagiti pundasion ti pammatitayo, dagiti pammaneknektayo iti kinapudno ket saan a nauneg ti pannakaipasdekda iti kaunggantayo.”1
Agsursuro kadagiti Adalen ti Napalabas
“Iti panagsapsapul iti kasaayatan a bagitayo, sumagmamano a saludsod ti mangtarabay iti panagpanunottayo: Siak kadi ti kayatko a pagbalinan? As-asidegak kadi iti Mangisalakan ita ngem idi kalman? As-asidegakto ngata inton bigat? Addaanak kadi iti tured nga agbalbaliw para iti nasaysayaat? …
“Dimtengen dagiti tawen ket naglabasen dagiti tawen, ngem ti panagkasapulan iti maysa a pammaneknek maipapan iti ebanghelio ket nasken nga agtultuloy. Bayat ti panagaddangtayo nga agturong iti masakbayan, nasken a ditay liplipatan dagiti adalen ti napalabas.”2
Ti Bukodmo a Liahona
“Ti bendisionmo iti patriarka ket kukuam ken sika laeng ti akinkukua. Mabalin a daytoy ket ababa wenno atiddog, simple wenno nauneg. Ti kaatiddog ken lengguahe ket saan a makaaramid iti bendision ti patriarka. Ti Espiritu ti mangipakaammo iti pudno a kaipapanan. Nasken a saan a makulpi ken maidulin ti bendisionmo. Nasken a saan a maikuadro wenno maipablaak daytoy. Ngem ketdi, nasken a basaen daytoy. Nasken nga ipateg daytoy. Nasken a suroten daytoy. Ti bendisionmo iti patriarka ti mangtulongto kenka kadagiti karigatan a pannubokmo. Daytoy ti mangtarabayto kenka kadagiti pagpeggadan ti biag. …Ti bendisionmo iti patriarka ti bukodmo a Liahona a mangidalan ken mangtarabay kenka iti pagnaam.
“Mabalin a kasapulan ti anus bayat ti panagbantay, panaguray, ken panagtrabahotayo para iti pannakatungpal ti naikari a bendision.”3
Umasidegka Kenkuana
“Laglagipem a dika magmagna nga agmaymaysa. …Bayat ti pannagnam iti biag, kanayon a magnaka nga agturong iti lawag, ket agtinnagto dagiti anniniwan ti biag iti likudam. …
“Bayat ti pananglukibko kadagiti nasantuan a kasuratan para iti pammaregta, maysa a naisalsalumina a balikas ti naulit-ulit a nakita. Ti balikas [ket] ‘umay.’ Kinuna ti Apo, ‘Umaykayo kaniak.’ Kinunana, ‘Umaykayo agsursuro kaniak.’ Kinunana pay, ‘Umaykayo, surotendak.’ Kayatko dayta a balikas, umay. Ti pakaasik ket umaytaytayo koma iti Apo.”4
© 2009 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti First Presidency Message, February 2010. Ilokano. 09362 864
Panangisuro manipud iti Daytoy a Mensahe
Ti Teaching, No Greater Call ipalawagna: “Ti nalaing a mannursuro saanna a pampanunoten, … Ania ti isurok ita nga aldaw?’ ngem ketdi, ‘Kasano a matulongakto dagiti sursuruak a mangtakuat iti no ania ti nasken a maammuanda?’” ([1999], 61). Tapno matulongan dagiti indibidual a makasursuro manipud iti daytoy nga artikulo, ibilangmo ti panangted kadakuada iti papel ken lapis ken panangted kadakuada iti panawen a mangbasa kadagiti balikas ni Presidente Monson ken mangisurat kadagiti kinapudno a matakuatanda maipapan iti panagbalin a naespirituan a nakasagana. Mabalin dagiti in-inaudi nga ubbing ti agdrowing kadagiti ladawan maipapan iti sursuruenda. Ibilang ti panangpaibinglay kadakuada iti no ania ti insurat wenno indrowingda.