Mensahe iti Visiting Teaching, Pebrero 2010
Nainsiriban a Panangtarawidwid kadagiti Sanikuatayo ken Panangliklik iti Panagutang
Isuroyo dagitoy a nasantuan a kasuratan ken naadaw a sao, no kasapulan, sabali a pagbatayan a mangbendision kadagiti kakabsat a babbai a sarungkaranyo. Iburayyo ti pammaneknek maipapan iti doktrina. Awisenyo dagiti sarungkaranyo nga iburayda no ania ti narikna ken nasursuroda.
Panangtarawidwid kadagiti Sanikua
“‘Ti nasaluad ken nasalimetmet a panagbiag’…kaipapananna ti [panangtaginayon] kadagiti sanikuatayo, ti nasirib a panagplano kadagiti banag a pakaseknan iti kuarta, naan-anay a gastosen para iti bukod a salun-at, ken naan-anay a panagsagana para iti edukasion ken panangpadur-as iti karera, panangted iti maitutop nga atension iti panagpataud ken panagurnong iti pagtaengan kasta met ti panangpasaayaat iti simbeng ti panagrikna. …No agbiagtayo a nasayaat ken nasaluad, natalgedtayonto a kas iti kaadda iti dakulap ti imana.”1
Presidente Spencer W. Kimball (1895–1985).
“Ania dagiti paglaingan a kasapulantayo a makatulong kadatayo nga agbalin a mapagpannuray iti bukod a kabaelan? …Kadagiti nagkauna nga aldaw ti Simbaan, impakaasi ni Brigham Young kadagiti kakabsat a babbai a sursuruenda ti manglapped iti sakit kadagiti pamilia, mangipatakder kadagiti industria iti pagtaengan, ken agadal maipapan iti panagaywan iti kuarta ken panangimaton kadagiti libro ti negosio ken dadduma pay a mausar a paglaingan. Maus-usar pay laeng ita nga agdama dagita a prinsipio. Agtultuloy ti kinapateg unay ti edukasion.
“Sinaludsodko ti sumagmamano a bishop no ania dagiti paglaingan ti panagpannuray iti bukod a kabaelan a kasapulan unay dagiti kakabsat a babbai kadagiti wardda, ket kinunada a daytoy ket panagbadyet. Nasken a maawattan dagiti babbai dagiti implikasion ti panaggatang babaen ti utang ken saan a panagbiag iti uneg ti badyet. Ti maikadua a paglaingan nga inlista dagiti bishop ket panagluto. Dagiti taraon a maisagana ken makan iti pagtaengan ket gagangay a nalaklaka ti gatadda, nasalsalun-at, ken makatulong a mangpapigsa kadagiti relasion ti pamilia.”2
Julie B. Beck, sapasap a presidente ti Relief Society.
Panangliklik iti Panagutang
“Mangisingasingak man iti lima a kangrunaan nga addang iti wayawaya iti pakaseknan iti kuarta. …
“Umuna, bayadam ti apagkapullom.
“Maikadua, aggastoska iti basbassit ngem ti matgedam
“Maikatlo, sursuruem ti agurnong (iti kuarta).
“Maikapat, dayawen dagiti obligasionmo iti pakaseknan iti kuarta.
“Maikalima, suruam dagiti annakmo a mangsurot iti pagwadam.”3
Elder Joseph B. Wirthlin (1917 – 2008) ti Korum dagiti Sangapulo-ket-dua nga Apostol.
“No agutangtayo, ipadawattayo ti sumagmamano a napateg, di magatadan a kinawaya a panagpilitayo ken ipasangotayo dagiti bagitayo iti impataytayo mismo a pannakaadipen. Yobligatayo ti panawen, pigsa, ken pamuspusantayo tapno mabayadantayo ti binulodtayo—dagiti sanikua a mabalin a maaramat tapno makatulong iti bagbagitayo, kadagiti pamiliatayo, ken kadagiti dadduma.
“Tapno mabayadan dagiti utangtayo itan ken tapno maliklikan ti panagutang kasapulantayo nga ipakita ti pammatitayo iti Mangisalakan —saan langa agaramiditi nasaysayaat ngem ketdi tapno agbalin a nasaysayaat. Kasapulan ti napigsa a pammati tapno baliksen dagidiay simple a balikas, ‘Saanmi a kabaelan daytoy.’ Kasapulan ti pammati tapno agtalek nga agbalinto a nasaysayaat ti panagbiag bayat ti panangisakripisiotayo kadagiti tartarigagayantayo tapno mapaaddatayo dagiti kasapulantayo ken dagiti kasapulan dagiti dadduma.”4
Elder Robert D. Hales ti Korum dagiti Sangapulo-ket-dua nga Apostol.
© 2009 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/09. Pannakaanamongna a maipatarus: 6/09. Pannakaipatarus ti Visiting Teaching Message, February 2010. Ilokano. 09362 864
Dagiti Tulong para kadagiti Visiting Teacher
Agbinnalakadkayo iti kaduam maipapan iti no kasano nga ibagay a siririkna daytoy a mensahe kadagiti kasasaad ti tunggal kabsat a babai. Ania dagiti paglaingan iti panagpannuray iti bukod a kabaelan ti mabalinmo nga ibinglay kenkuana?
Bukod a Panagsagana
Para iti ad-adu pay a paakaammo, kitaen iti All Is Safely Gathered in Family Finances (aytem blg. 04007)