Rengeasek

Klengeltengat er kau er a Patriarch

A President Monson a mesaod er a klengeltengat er a patriarch el “el kerbai er a rolem el moltirakl er ngii eng omekrael er kau.” Me tiang ngerang el klengeltengat e ngmekerang e olngeseu el omekrael er a klechad er ngak?

Ngerang a klengeltengat er a patriarch?

A klengeltengat er kau a ngarngii a erung el moktek er ngii. A kot, eng oterkeklii a kebliil er kau, malechub eng ngerang el telungalk el ngara blai er a Israel el mchad er ngii. A ongerung, eng ngarngii a tekoi er ngii el olngeseu el omekrael er kau. A klengeltengat er kau a diak el okor el ngarngii a iaksok, a uleklatk me a chais er a kengaol.

Ngkirek el uangerang a klungek e nguu a klengeltengat el kirek?

Ngdiak el ulterkokl a rekil a chad, ngdi kirel mla mo klou el sebechel mtebengar a cheledolel tiang el klengeltangat. Te betok el chedal a Ikelesia a omuchel el melatk er a ngeiul a klengeltengat er tir sel ngara teruich me a derngel a rekrir.

Ak mekerang e nguu a klengeltengat er ngak?

A kot eng kirem el mengedecheduch er a bisob malechub eng president er a branch. Alsekum e ke keldmokl e klikiid, ke mo nguu a babier el olecholt el kmo ngsebechem el nguu. A uriul er tiang eng sebechem el oterkeklii a taem el bo mesang a patriarch er a basio er kau.

A klengeltengat er ngak el blak nguu ak mekerang er ngii?

Mnguu el kudmeklii meng diak el riid e di blechoel menguiu er ngii. Di mletkii el kmo, tiang el klengeltengat er kau a kmal edaol e di kirem e merkong. Ngsebechem el ouchais er ngii er tirkei el kmal kmeed er kau er a telungalk, ngdi diak el kirem el ouchais er ngii er a rechad er a rael. A rokui el klengeltengat el mngai er a klengeltengat er a patriarch a di ultuil er a klaumerang er kau me a temel a Rubak.