Mensahe sang Unang Panguluhan, Pebrero 2010
Parte sa Espirituhanon nga Kahanda
Laygay gikan sa Aton Propeta
Isa ka Pundasyon sang Pagtuo
“Kon wala kita sang madalum nga pundasyon sang pagtuo kag mabakod nga panaksihon sang kamatuoran, ayhan mabudlayan kita sa pag-agwanta sang grabe nga mga bagyo kag makakulurog nga mga hangin sang pagtilaw nga sa indi malikawan nagaabot sa tagsa sa aton.
“Ini nga kabuhi isa ka tion sang pagtilaw, isa ka tion agud pamatud-an ang aton mga kaugalingon nga takos sa pagbalik sa presensya sang aton Amay nga Langitnon. Agud kita matilawan, dapat kita magpangatubang sang mga hangkat kag mga kabudlayan. Ang mga ini sarang magguba sa aton kag ang aton mga kalag sarang madulaan sang paglaum kag magkalisud, ina, kon ang aton mga pundasyon sang pagtuo, ang aton mga panaksihon sang kamatuoran wala nagtudok sing madalum sa aton mga kaugalingon.”1
Tun-i ang mga Leksyon sang Nagliligad
“Sa aton pagtinguha para sa pinakamaayo naton nga mga kaugalingon, pila ka mga pamangkot ang magagabay sang aton panghunahuna: Ang akon bala pagkatawo suno sa gusto ko? Mas malapit bala ako sa Manluluwas karon sangsa kahapon? Mangin mas malapit pa gid bala ako sa iya sa palaabuton? May kaisog bala ako sa pagbag-o para sa labing maayo? …
“Ang mga tinuig nag-abot kag nagligad, pero ang pagkinahanglan sang isa ka panaksihon sa ebanghelyo nagapadayon nga tuman ka importante. Sa aton pagpadayon pakadto sa palaabuton, indi naton dapat pagbale-walaon ang mga leksyon sang nagliligad.”2
Ang Imo Personal nga Liahona
“Ang imo patriarchal blessing imo kag imo gid lang. Ayhan ini malip-ot ukon malaba, simple ukon madalom. Ang kalabaon kag lenggwahe indi importante sa isa ka patriarchal blessing. Ang Espiritu amo ang nagapabutyag sang matuod-tuod nga kahulugan.. Ang imo blessing indi dapat pagpil-on sing mahipid kag taguon. Indi ini dapat ipakwardro ukon ibantala. Sa baylo, dapat ini basahon. Dapat ini pakamahalon. Dapat ini sundon. Ang imo patriarchal blessing magabulig sa imo sa paglampuwas sa pinakabudlay nga pagtilaw. Magagiya ini sa imo sa paglampuwas sa mga peligro sang kabuhi. … Ang imo patriarchal blessing isa ka personal nga Liahona para sa imo sa pagplano sang imo alagyan kag paggiya sang imo pagpanglakaton. …
“Ang pagpasensya ayhan kinahanglanon samtang kita nagabantay, nagahulat, kag naga-obra para sa ginpromisa nga bugay nga matuman.”3
Magkari sa Iya
“Dumduma nga wala ka nagalakat sing isahanon. … Sa imo pagpanglakaton sa kabuhi, maglakat pirme pakadto sa kasanag, kag ang mga landong sang kabuhi madula sa imo atubangan …
“Sa akon [padayon nga] pagdangop sa balaan nga mga kasulatan para sa inspirasyon, isa ka tinaga ang [padayon nga] nagapangibabaw sa tagsa ka tion. Ang tinaga [amo ang] ‘kari.’ Ang Ginuo nagsiling, ‘Kari sa akon.’ Sia nagsiling, ‘Kari magtuon kamo sa akon.’ Sia nagsiling man, ‘Kari, magsunod sa akon.’ Luyag ko ina nga tinaga, kari. Ang akon pangamuyo amo nga magkari kita sa Ginuo.”4
© 2009 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang First Presidency Message, February 2010. Hiligaynon. 09362 861
Pagtudlo gikan sa Sining Mensahe
Ang Teaching, No Greater Call nagasiling: “Ang isa ka maayo nga manunudlo wala nagapamensar, … ‘Ano ang itudlo ko karon?’ kundi, ‘Paano ko buligan ang akon mga estudyante sa pagdiskubre kon ano ang kinahanglan nila mahibaloan?’”([1999], 61). Agud buligan ang mga indibidwal nga makatuon gikan sa sining artikulo, tilawi nga hatagan sila sang papel kag mga lapis kag hatagan sila sang tion agud mabasa ang mga pulong ni Pangulong Monson kag isulat ang mga kamatuoran nga ila nadiskubrehan parte sa espirituhanon nga pagkahanda. Ang mas magagmay nga kabataan sarang magdrowing sang mga larawan parte sa kon ano ang ila natun-an. Tilawi nga pangabayon sila nga ipaambit ang kon ano ang ila ginsulat ukon gindrowing.