Mensahe sa Visiting Teaching, Pebrero 2010
Husto nga Pagdumala sang Ikasarang kag Paglikaw sa Utang
Itudlo ining balaan nga mga kasulatan kag sinambit nga mga pulong ukon, kon kinahanglanon, isa pa gid ka prinsipyo nga magabugay sa mga sister nga inyo ginabisita. Magpanaksihon parte sa doktrina. Agdaha yadtong inyo ginabisitahan nga ipaambit ang ila nabatyagan kag natun-an.
Pagdumala sang Ikasarang
“‘Ang makinuton nga pagginawi’ … nagakahulugan sang [pagtipig] sang aton mga ikasarang, maayo nga pagplano sang mga butang nga may kaatangtanan sa kwarta, lubos nga pagpanigana para sa personal nga ikaayong lawas, kag nagakaigo nga pagpanghanda para sa pagpatin-ad sang edukasyon kag karera, paghatag sang nagakabagay nga pagtamod sa pagpatubas kag pagtipon sang pagkaon sa puluy-an kag subong man sang pagpasanyog sang emosyonal nga kabakod. … Kon maggawi kita sing husto kag makinuton, mangin luwas kita kasubong nga ara kita sa Iya mga palad.”1
Pangulong SpencerW. Kimball (1895–1985).
“Ano nga mga abilidad ang aton kinahanglanon agud magbulig sa aton nga makasarang magsalig sa aton kaugalingon? … Sang bag-o pa lang ang Simbahan, si Brigham Young nagpangabay sa mga sister nga magtuon sa pagtapna sang balatian sa mga pamilya, magpasad sang mga kabuhian pangpuluy-an (home industries), kag magtuon sang accounting, bookkeeping kag iban pa nga praktikal nga mga abilidad. Inang mga prinsipyo nagakadapat pa gihapon sa karon. Ang edukasyon nagapadayon nga tuman ka importante. …
“Ginpamangkot ko ang pila ka mga bishop kon ano nga mga abilidad sa ikasarang sa pagsalig sa kaugalingon (self-reliance skills) ang pinakakinahanglanon sang mga sister sa mga ward, kag siling nila amo ang pagbadyet. Ang kababayin-an kinahanglan makahangop sang mga resulta sang pagpamalaklon nga ginautang kag indi paggawi sing nagakaigo sa badyet. Ang ika-duha nga abilidad nga ginlista sang mga bishop amo ang pagpangluto. Ang mga pagkaon nga ginhanda kag ginakaon sa puluy-an sa kabilugan mas barato, mas makapaayo sa lawas, kag nagabulig nga mas mapabakod ang mga relasyon sa pamilya.”2
Julie B. Beck, pangkabilugan nga pangulo sang Relief Society.
Paglikaw sa Utang
“Luyag ko magpanugyan sang lima ka importante nga mga tikang pakadto sa pinansyal nga kahilwayan
“Una, magbayad sang inyo ika-pulo …
“Ika-duha, maggasto sing diutay sangsa inyo ginakita. …
“Ika-tatlo, magtuon sa pagsupot …
“Ika-apat, bayaran ang inyo mga utang kag iban pa nga pinansyal nga mga obligasyon …
“Ika-lima, tudloi ang inyo kabataan nga magsunod sa inyo ehemplo”3
Elder Joseph B. Wirthlin (1917–2008) sang korum sang Napulo’g Duha ka mga Apostoles.
“Kon magpangutang kita, ginapanghatag naton ang kabahin sang aton malahalon, indi mabakal nga pagbuot (agency) kag ginabutang ang aton kaugalingon sa hungod nga pagpakaulipon. Ginahigot naton ang aton tinion, kusog, kag ikasarang sa pagbayad sang kon ano ang aton ginhulam—mga ikasarang nga sarang kuntani magamit sa pagbulig sa aton mga kaugalingon, aton mga pamilya, kag sa iban. …
“Agud mabayaran ang aton kautangan karon kag malikawan ang palaabuton nga utang nagakinahanglan nga kita magtuo sa Manluluwas—indi lang maghimo sing mas maayo kundi ang magmangin mas maayo. Ginakinahanglan ang dalayawon nga pagtuo sa pagmitlang sinang simple nga mga pulong, ‘Indi kita makasarang sini.’ Ginakinahanglan ang pagtuo agud magsalig nga ang kabuhi mangin mas maayo sa aton pagsakripisyo sang aton mga luyag agud masabat ang aton kaugalingon nga mga panginahanglan kag ang iya sang iban.”4
Elder Robert D. Hales sang Korum sang Napulo’g Duha ka mga Apostoles.
© 2009 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang Visiting Teaching Message, February 2010. Hiligaynon. 09362 861
Mga Bulig para sa Mga Visiting Teacher
Magkonsulta sa imo kaupod [sa visiting teaching] kon paano mahinalungon nga mapasibo ining mensahe sa sirkumstansya sang tagsa ka sister. Ano nga mga abilidad para sa ikasarang nga magsalig sa kaugalingon ang puwede ninyo mapaambit sa iya?
Personal nga Pagpanghanda
Para sa dugang nga impormasyon, tan-awa sa All Is Safely Gathered In: Family Finances (item no. 04007).