Visiting Tijing Mesej, Febwari 2010
Lukaotem, Yusum Gud Ol Risos mo No Stap Mekem Kaon
Tijim ol skripja mo ol toktok ia o, sapos i gat nid, tijim wan narafala prinsipol we bae i save blesem ol sista we yu stap visitim. Serem testemoni blong yu abaot doktrin ia. Invaetem olgeta we yu stap visitim blong serem wanem oli bin filim mo lanem.
Stap Yusum Gud Ol Risos
“‘Winim inaf samting long laef’ … i minim blong [holem taet] gud ol risos blong yumi, mekem waes plan long saed blong mane, lukluk gud mo mekem gud plan blong lukaot gud long helt blong yuwan, mo mekem rere ol samting inaf long edukesen mo karia divelopmen, mo stap spendem stret taem mo tingting blong mekem samting long hom mo storem kaekae mo semtaem, developem fasin blong gat gud tingting blong kam gud bakegen afta long hadtaem. … Sapos yumi laef wetem waes mo fasin blong winim inaf samting, bae yumi save sef long han blong Hem.”1
Presiden Spensa W. Kimbol (1895–1985).
“Wanem skil nao yumi nidim blong helpem yumiwan blong save dipen long yumiwan? … Long ol eli taem blong Jos, Brigam Yang i bin askem strong ol sista blong lanem blong blokem ol sik long ol famle, bildimap wan hom bisnis, mo lanem akaonting mo buk kiping mo nara fasin we i save givim help. Ol prinsipol ia oli aplae yet long yumi tedei. Edukesen i gohed blong kam wan impoten samting long laef. …
“Mi bin askem sam bisop se wanem nao skil blong dipen long olgetawan we ol sista oli nidim plante long ol wod blong olgeta, mo oli talem se bajet. Ol woman oli nidim blong andastanem wanem nao risal blong kaon blong pem samting mo risal blong no laef folem wan bajet. Seken skil we ol bisop oli listim hem i kuk. Ol kaekae we yumi kukum mo kakae long hom oli no sas, oli helti moa, mo oli givim wan strong famle rilesensip.”2
Juli B. Bek, Rilif Sosaeti jeneral presiden.
Stap Longwe long Kaon
“Bae mi givim faef step blong givim fridom long saed blong mane. …
“Faswan, pem taeting blong yu. …
“Nambatu, no spendem mane bitim mane we yu kasem long salari blong yu. …
“Nambatri, lanem blong save sevem mane. …
“Nambafo, pem ol bil o narafala samting we yu mas pem. …
“Nambafaef, tijim ol pikinini blong yu blong folem ol eksampol blong yu.”3
Elda Josef B. Witlin (1917–2008) blong Kworom blong Olgeta Twelef Aposol.
“Taem yumi stap mekem kaon, yumi stap givimaot sam long ol naesfala ejensi we i no gat praes mo putum yumiwan long wan fasin blong kam slef. Yumi spendem taem, paoa, mo evri samting blong yumi blong pembak wanem we yumi bin kaon long hem—ol risos ia, sapos i no bin gat kaon, bae yumi bin save yusum blong helpem yumiwan, ol famle blong yumi, mo ol narawan. …
“Blong pem kaon blong yumi naoia mo nomo mekem kaon long fiuja i nidim yumi blong yusum fet long Sevya—i no blongmekemgud nomo be blong kam gud moa evriwan. Hem i tekem bigfala fet blong obei long ol simpol toktok ia, ‘Yumi no gat inaf blong save pem.’ Hem i tekem fet blong trastem se laef bae i kam gud taem yumi stap sakrifaes from wanem yumi wantem blong i save mitim ol nid blong yumi mo ol narawan.”4
Elda Robet D. Hels blong Kworom blong Olgeta Twelef Aposol.
© 2009 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/09. Oli letem translesen long: 6/09. Translesen blong Visiting Teaching Message, February 2010. Bislama. 09362 852
Ol Help blong Ol Visiting Tija
Toktok wetem kompanion blong yu blong olsem wanem yutufala i save tijim gud mesej ia folem nid blong ol sista we yu visitim. Wanem skil blong fasin blong dipen long yuwan we yu gat nao we yu save serem wetem hem?
Rere blong Yuwan
Blong kasem moa infomesen, luk long All Is Safely Gathered In: Family Finances (item no. 04007).