Fas Presidensi Mesej, Febwari 2010
Stap Wok Finis blong Rere long Saed blong Spirit
Kaonsel we I Kam long Profet blong Yumi
Wan Fandesen blong Fet
“Sapos yumi no gat wan strong fandesen blong fet mo wan strong testemoni blong trutok, bae yumi gat hadtaem blong save stanap agensem ol strong hariken mo ol kolkol win blong denja we oli stap kam long wanwan long yumi.
“Laef tedei hem i taem blong fesem ol tes, wan taem blong pruvum yumiwan se yumi klin inaf blong gobak long ples blong Papa long Heven. Blong yumi stap fesem ol tes ia, yumi mas fesem ol jalenj mo ol hadtaem. Oli save brekem yumi, mo sol blong yumi i save brok mo foldaon—hemia, sapos fandesen blong fet blong yumi, ol testemoni blong ol trutok blong yumi oli no bildap strong insaed long yumi.”1
Lanem Ol Lesen blong Taem Bifo
“Blong lukaot ol gudfala samting long yumiwan, sam kwestin bae i gaedem tingting blong yumi: Mi mi kam olsem we mi wantem kam? Mi mi stap klosap long Sevya tedei bitim yestedei? Bae mi stap kolosap moa long Hem tumoro? Yu ting se mi gat strong paoa long tingting blong jenis i kam gud moa? …
“Ol yia oli bin kam mo ol yia oli bin go, be nid blong wan testemoni blong gospel i stap yet olsem wan impoten samting. Taem yumi stap muv i go long fiuja, yumi no mas fogetem ol lesen blong taem bifo.”2
Liahona blong Yuwan
“Petriakel blesing blong yu, hem i blong yu, mo yuwan nomo. Ating bae i sot o i longfala, i simpol o i strong. Hamas hem i longfala mo hamas lanwis blong hem i saon gud, hemia i no mekem wan gudfala petriakel blesing. Spirit nao i talemaot tru mining. Blesing blong yu i no blong foldem gud mo putum gud i stap. Hem i no blong putum long wan foto frem o yu pablisim. Be, hem i blong ridim. Hem i blong lavem. Hem i blong folem. Petriakel blesing blong yu bae i gaedem yu blong yu go tru long naet we i tudak evriwan. Bae i gaedem yu blong yu go tru long ol denja blong laef. … Petriakel blesing hem i blong yu, olsem wan Liahona blong yuwan, blong i soem mo i gaedem rod blong yu. …
“Ating bae yumi nidim tingting blong save wet long taem, taem yumi stap lukluk gud, stap wet, mo wok from wan blesing blong promes blong bae i kamtru.”3
Kam long Hem
“Tingbaot se yu no wokbaot yuwan. … Taem yu stap wokbaot tru long laef, oltaem yu wokbaot stret from laet, mo ol sado blong laef ia bae oli foldaon biaen long yu. …
“Taem mi [stap] tanem i go long skripja blong kasem insperesen, wan toktok [i stap] kamaot bakegen mo bakegen. Toktok ia [i] ‘kam.’ Lod i bin talem, ‘Yufala i kam long mi.’ Hem i bin talem, ‘Mo yufala i kam lan long mi.’ Hem i bin talem tu, ‘Kam, folem mi.’ Mi laekem toktok ia, kam. Rikwes blong mi, se bae yumi mas kam long Lod.”4
© 2009 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/09. Oli letem translesen long: 6/09. Translesen blong First Presidency Message, February 2010. Bislama. 09362 852
Stap Tij Wetem Mesej Ia
Buk ia Teaching, No Greater Call i talem: “Wan gudfala tija i no gat tingting ia se, … ‘Wanem nao bae mi tijim tedei?’ be i talem, ‘Olsem wanem nao bae mi save helpem ol studen blong mi blong oli faenemaot wanem nao oli nidim blong save?’”([1999], 61). Blong helpem olgeta wanwan i lanem samting long atikol ia, gat tingting blong givim long olgeta ol pepa mo ol pensel mo givim taem long olgeta blong ridim toktok blong Presiden Monson mo raetem daon ol trutok we oli faenemaot abaot wok blong stap rere long saed blong Spirit. Ol yangfala pikinini oli save dro long ol pikja abaot wanem nao oli lanem. Gat tingting blong mekem olgeta oli serem wanem nao oli bin raetem o droem.