Blong ol yut
I Nogat Wan I Stret Evriwan
Oltaem mi wantem blong kam olsem Nifae: stap obei oltaem, fetful oltaem, stap strong long saed blong spirit. Long ol ae blong mi, Nifae i bin wan gudfala eksampol blong mekem gud fasin. Sam samting oli kam long mi bitim wanem mi stap tingting long hem blong gro kam antap blong kam semmak olsem hem—o blong iven save stat blong gat wan smol pat blong gudfala fasin blong hem.
Wan dei mi bin gat wan smol problem, from ol filing se mi no inaf. Mi bin gat plante gudfala tingting mo plante gol. Be mi luk olsem se mi no save kasem wanem we mi stap go from. Tru long wota blong ol ae we i no gat hop, mi talemaot ol filing blong mi long papa blong mi. Hem i stanap hariap nomo, i wokbaot i go long sef blong ol buk, mo pulumaot wan long ol kopi blong Buk blong Momon blong hem. Hem i no talem wan toktok, hem i openem i go long 2 Nifae 4 mo i stat blong ridim ves 17.
Kolkol i kavremap bodi blong mi olsem lektrik taem mi stap lisin long ol strong toktok ia: “O, mi mi wan man we mi no hapi tumas!” Ol tingting blong mi oli stap wok. Olsem wanem nao Nifae, jampion mo eksampol blong mi, i talem se hem i “no wan hapi man”? Sapos hem i no bin wan hapi man, bae mi mi kam olsem wanem?
Bakegen, letrik i pas tru long mi taem papa blong mi i stap ridim ves 28: “Wekap, sol blong mi! Nomo stap harem nogud long sin.” Mi bin filim olsem se ol dak klaod long maen blong mi oli lus mo maen blong mi i kam klia blong soemaot wom mo wan naes blu skae mo san we i stap saen strong. Hem i had blong tokbaot fasin we ves ia i givim laet long sol blong mi. Sam long ol ves long skripja oli bin fulumap mi wetem plante hop, insperesen, mo glad olsem we ves ia i bin mekem.
Long ves 30, Nifae i bin talem stret wanem we mi bin stap tingting long hem, be hemia nomo long ol strong toktok we i moa klia: “Sol blong mi bae i hapi long yu, God blong mi, mo ston we bae i sevem mi.” Ves ia i karem i kam wetem hem ol filing blong pis mo tankyu from gudfala sore mo lav blong Lod.
Papa blong mi i klosem buk mo i bin eksplenem se ol ves ia samtaem oli singaotem ol sam blong Nifae. Afta hem i tijim mi long kwaet fasin se iven ol bigfala man long wol ia oli no stret evriwan, mo ol man ia oli mas luksave fasin blong olgeta we i no stret evriwan sapos no bae oli gat hae tingting mo, taswe, oli no save kam bigwan.
Mi bin andastanem. Jes from mi bin gat wiknes nomo, i no minim se mi no save kam olsem Nifae. Taem mi luksave ol wiknes blong mi, i karem mi kam kolosap long level blong Nifae. Nifae i kam wan bigfala man from, hem i stap obei mo fetful mo tu from, hem i bin gat tingting we i stap daon mo gat strong tingting blong talemaot ol rong blong hem.
Stat long taem we mi bin kasem eksperiens ia, mi bin putum long hat blong mi ol toktok blong Nifae. Evritaem mi ridim olgeta, mi eksperiensem ol sem glad mo insperesen olsem fastaem we mi bin ridim olgeta. Ol ves ia oli talemaot strong long mi se mi mi wan gel blong God, we mi gat moa paoa bitim wanem we mi save tingbaot. Mi save se sapos mi stap fetful mo go fored, bae mi kasem plante blesing.