Fas Presidensi Mesej, Maj 2010
Gudfala Strong Tingting
Wan long olgeta stamba tingting long laef long wol ia hem i blong pruvum long God se bae yumi kipim ol komanmen blong Hem, taem yumi gat strong tingting. Yumi pasem tes ia long spirit wol. Be moa bitim haf long ol man we oli stap long heven oli bin tok agensem tingting ia se bae evriwan oli mas pas tru long tes long laef long wol ia, ples we i gat denja se bae yumi no save mekem.
Bifo yumi bon, yumi bin save God Papa mo Pikinini blong Hem, Jisas Kraes, yumiwan. Yumi bin luk Tufala mo lesin long Tufala taem Tufala i bin stap tij mo leftemap tingting blong yumi. Nao wan vel i bin blokem ol maen mo ol memori blong yumi. Setan, papa blong ol giaman, i gat wan janis from yumi mas luksave huia yumi tru long ol ae blong fet, taem ol bodi blong yumi i mekem yumi foldaon long ol temtesen long wol ia mo wiknes long saed blong bodi.
Yumi gat ol bigfala help i stap blong givim yumi strong tingting long laef ia. Bigfala help ia nao hem i Atonmen blong Jisas Kraes. From samting we Hem i bin mekem, yumi save kam klin long ol sin long ol wota blong baptaes. Yumi save riniu blesing ia taem yumi kakae sakramen wetem fet mo wetem wan hat blong sakem sin.
Ol presen long saed blong spirit oli ol narafala help. Yumi kasem Spirit blong Kraes long taem we yumi bon. Hemia i givim long yumi paoa blong save taem wan joes we i stap long fored blong yumi bae i lid i go long laef we i no save finis. Ol skripja oli wan stret gaed taem yumi ridim olgeta wetem Tabu Spirit olsem kompanion blong yumi.
Tabu Spirit i letem yumi soemaot ol tangkyu mo askem help long prea wetem klia mo bilif we yumi bin filim glad long hem wan taem finis wetem Papa blong yumi long Heven mo bae yumi gat glad ia bakegen taem yumi gobak long Hem. Komiunikesen ia wetem God i helpem blong ronemaot fraet long ol hat blong yumi be semtaem hem i stap bildim fet mo lav blong Papa long Heven mo Jisas Kraes.
Tabu prishud i givim long yumi strong tingting long ol seves blong yumi. Long ol odinens blong hem yumi kasem paoa blong sevem ol pikinini blong God mo stanap strong agensem ol paoa blong ivel. Taem Hem i singaotem yumi blong sev, yumi gat promes ia se huia man bae i akseptem yumi, bae Hem tu i stap longwe, from Hem bae i stap long fored blong yumi mo bae Hem i kam raet han mo lef han blong yumi, mo Spirit blong Hem bae i stap long ol hat blong yumi, mo ol enjel blong Hem bae oli raonem yumi, blong leftemap yumi (luk long D&C 84:88).
Long seves blong Profet Josef Smit i gat risen blong hem i stap fraet. Be God i bin givim long hem strong tingting wetem promes ia long eksampol blong Masta:
Hem i bin talem se sapos oli bin sakem Josef long wan hol blong graon, o long ol han blong ol man blong kilimded man, mo putum oda se hem i mas ded; o sapos oli sakem hem i go long dip solwota; o sapos ol strong wef i kam agensem hem; o sapos ol strong win oli kam enemi blong hem; o sapos tudak i kavremap ol heven, mo evri samting oli kam tugeta blong blokem rod; mo antap long evri samting ia, sapos ol bigfala faea blong hel oli openem ol maot blong olgeta afta long hem, hem i sud save se ol samting ia oli kam blong givim eksperiens long hem, mo bae oli kam from gud blong hem.
Lod i bin talem long hem se Pikinini blong Man i bin kam daon bitim olgeta evriwan, mo i bin askem sapos hem i moa impoten bitim Hem? (luk long D&C 122:7–8).
God i bin givim long yumi plante help inaf blong ronemaot fraet mo givim strong tingting long yumi, long wanem samting yumi fesem long laef. Taem yumi askem help blong Hem, Hem i save leftemap yumi go kasem laef we yumi stap lukaotem we hem i laef we i no save finis.
© 2009 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/09. Oli letem translesen long: 6/09. Translesen blong First Presidency Message, March 2010. Bilama. 09363 852
Yusum Mesej ia blong Tij
Jisas Kraes, we i Masta Tija, oltaem i stap askem kwestin ia blong leftemap tingting blong ol pipol blong oli tingting hevi mo yusum ol prinsipol we Hem i bin tijim. … Ol kwestin blong Hem, i bin givim ol tingting, i lukaotem sol, mo komitmen” (Teaching, No Greater Call [1999], 68). Tingting blong krietem mo stap askem sam kwestin blong helpem wanwan man blong andastanem mo folem olgeta trutok we oli bin tijim long mesej ia. Olsem eksampol, yu save askem, “Wanem help nao God i bin givim long yu blong ronemaot fraet mo i givim long yu strong tingting?” o “Olsem wanem nao God i bin helpem yu blong winim ol fraet blong yu?” Leftemap tingting blong wanwan man blong tingting hevi long ol ansa blong olgeta bifo oli ansabak.