Visiting Tijing Mesej, Maj 2010
Mekem Fet long God Papa mo Jisas Kraes I Kam Moa Strong Tru long long Skripja Stadi blong Yuwan
Tijim ol skripja mo ol toktok ia o, sapos i gat nid, tijim wan narafala prinsipol we bae i save blesem ol sista we yu stap visitim. Serem testemoni blong yu abaot doktrin ia. Invaetem olgeta we yu stap visitim blong serem wanem oli bin filim mo lanem.
“Taem mi jes mared nomo, … oli bin invaetem mi long wan lanj blong evri Rilif Sosaeti sista long wod blong mi we oli bin ridim wan long ol tufala buk ia; Buk blong Momon o wan sot Jos histri buk. Mi bin stap ridim ol skripja blong mi evritaem, mekem se mi bin kwalifae blong atendem lanj ia taem mi ridim sot buk ia from hem i isi mo i tekem smol taem nomo. Taem mi stap kakae lanj blong mi, mi bin gat wan strong filing se nomata histri buk ia hem i wan gudwan, mi mas stap ridim Buk blong Momon. Tabu Spirit i stap toktok long mi blong mi jenisim ol fasin blong ridim ol skripja blong mi. Long sem dei ia mi stat blong ridim Buk blong Momon, mo mi neva stop. … From mi bin stat blong ridim ol skripja evri dei, mi bin lanem abaot Papa blong mi long Heven, Pikinini blong Hem Jisas Kraes, mo wanem mi save mekem blong kam olsem Tufala. …
“… Evri woman i save kam wan gospel doktrin tija long hom blong hem, mo evri sista insaed long Jos i nidim blong save gospel olsem wan lida mo wan tija. Sapos yu no bin developem fasin blong stadi skripja evri dei, stat nao ia mo gohed blong stadi blong yu save rere from ol responsabiliti blong yu long laef ia mo long laef we i no save finis.”1
Juli B. Bek, Rilif Sosaeti jeneral presiden.
“Stadi long ol skripja bae i save helpem ol testemoni blong yumi mo ol testemoni blong ol famle memba blong yumi. Tedei ol pikinini blong yumi oli gro kam antap long ples we plante voes i stap fosem olgeta blong lego ol samting we oli stret blong folem, mo blong folem ol samting blong wol. Be nomo, sapos oli gat wan strong fandesen long gospel blong Jisas Kraes, wan testemoni blong trutok, mo wan strong tingting blong laef stret mo gud, bae oli save stanap strong agensem ol paoa ia. Hem i responsabiliti blong yumi blong helpem mo protektem olgeta.”2
Presiden Tomas S. Monson.
“Yumi wantem ol sista blong yumi oli kam ol bes tija blong ol skripja. … Yu nidim blong save gud olgeta trutok blong hem we i no save finis blong gud blong yuwan, mo ol stamba tingting blong tijim ol pikinini blong yuwan mo ol narawan we oli stap long responsabiliti blong yu.”3
“Yumi wantem ol hom blong yumi oli gat ol blesing blong ol sista we oli save gud ol skripja—nomata yu singgel o yu mared, yang o olfala, wido o stap wetem wan famle. … Blong kam ol tija blong ol skripja—i no blong putum daon ol narawan, be blong leftemap olgeta!”4
Presiden Spensa W. Kimbol (1895–1985).
© 2009 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/09. Oli letem translesen long: 6/09. Translesen blong Visiting Teaching Message, March 2010. Bislama. 09363 852
Ol Help blong Ol Visiting Tija
Taem yu stap mekem visit blong yu, ansarem ol kwestin mo serem ol eksperiens blong yu wetem ol skripja. Serem testemoni long olsem wanem skripja stadi i mekem fet blong yu i kam moa strong. Askem sista we yu stap visitm blong i serem olsem wanem stadi blong hem long ol skripja i mekem hom mo famle blong hem oli kam moa strong.
Rere Yuwan