Lamharon
Wala sing Perpekto
Luyag ko gid nga mangin kasubong ni Nefi: tuman ka masinulundon, labi ka matinuohon, kag lubos ka espirituhanon. Sa akon panulok si Nefi amo ang pinakamataas nga halimbawa sang kaayo. Pila gid lang ka mga butang ang nagakuha sang akon atensyon sangsa pagpanumdom nga magdako nga kasubong sa iya—ukon bisan man lang sa pag-angkon sang isa ka bahin sang iya kaperpekto.
Isa ka adlaw nakaangkon ako sing isa ka diutay nga krisis, nga gintuga sang mga balatyagon sing kakulangan. Subong sini ang akon ambisyon kag may madamo kaayo nga mga lalab-uton. Pero daw wala man lang ako sing may nalab-ot. Sa tunga sang mga luha sang kapaslawan, ginpahayag ko ining mga balatyagon sa akon amay. Maabtik sia nga nagtindog, nagpadulong sa estante sang mga libro, kag ginkuha ang isa sang iya mga kopya sang Ang Libro ni Mormon. Nga wala sing hulohambal, ginbuksan niya ini sa 2 Nefi 4 kag nagsugod sa pagbasa sang bersikulo 17.
Ang hinali nga kahadlok naglapta sa akon lawas nga daw kuryente samtang nagapamati ako sa sining gamhanan nga mga pulong: “O, kailo ako nga tawo!” Naglibog ang akon hunahuna. Paano si Nefi, ang akon idolo kag halimbawa, makasiling nga sia “kailo”? Kon kailo sia, ano ako ‘ya?
Sa liwat, ang kuryente nagpanalaytay sa akon samtang ginabasa sang akon amay ang bersikulo 28: “Magbugtaw, kalag ko!” Indi na magduyo sa sala. Sa akon pamatyag daw pareho yadto nga ang madulom nga mga panganod sa akon kaisipan nagbukas kag naghawan agud ipakita ang kaalabaab kag katahum sang malapad nga asul nga langit kag masanag nga adlaw. Mabudlay kaayo ilaragway ang paagi nga ginpasanagan sining bersikulo ang akon kalag. Pila lang ka bersikulo sa balaan nga mga kasulatan ang nagpuno sa akon sing subong kasobra nga paglaum, inspirasyon, kag kasadya nga ginhatag sining bersikulo.
Sa bersikulo 30, si Nefi nagsiling sang kon ano mismo ang akon ginapamensar, lamang sa mas gamhanan nga mga pulong: “Ang akon kalag magakasadya sa imo, Dios ko, kag ang bato sang akon kaluwasan.” Ining bersikulo nagdala upod sa iya sing mga balatyagon sing kalinong kag kapasalamatan para sa malulo nga kaluoy kag pagpalangga sang Ginuo.Gintakop
sang akon amay ang libro kag ginpaathag nga ining mga bersikulo kon kaisa ginatawag nga salmo ni Nefi. Dayon malulo niya nga gintudlo sa akon nga bisan ang pinakabantog nga mga tawo sa kalibutan indi perpekto, kag ining mga tawo kinahanglan nga magkilala sang ila mga kakulangan kay kon indi magmangin bugalon sila kag, gani, indi na bantog.
Nahangpan ko. Indi tungod nga may mga kahuyang ako indi ko na masarangan nga mangin kasubong ni Nefi. Ang pagkilala sang akon mga kahuyang nagdala sa akon nga mas malapit sa kalidad ni Nefi. Bantog si Nefi tungod, lakip na sa pagkamasinulundon kag matinuohon, mapainubuson sia kag handa sa pag-ako sang iya mga kapaltahan.
Sumugod sadtong eksperiyensya, ginpalangga ko ining mga pulong ni Nefi. Sa tagsa nga mabasa ko ang mga ini, mabatyagan ko ang pareho nga kakunyag kag inspirasyon subong sang primero ko ini ginbasa. Ang mga bersikulo nagakanta sa akon nga ako anak sang Dios, nga may ikasarang sang masobra pa sangsa akon mahunahuna. Nakahibalo ako nga kon ako mainunungon kag magpadayon pasulong, indi matakos nga mga bugay ang nagahulat.