Mensahe sang Unang Panguluhan, Marso 2010
Moral nga Kaisog
Isa sa mga katuyuan sang mortal nga kabuhi amo ang pamatud-an sa Dios nga sundon naton ang Iya mga kasuguan kon nagakinahanglan ina sing kaisog. Napasaran naton ini nga pagtilaw sa kalibutan sang mga espiritu. Pero may ikatlo nga bahin sa langit nga nagrebelde batok sa panugyan nga pagatilawan sila sa mortal nga kabuhi sa diin may risgo nga indi sila magmadinalag-on.
Antes kita matawo, nakilala naton ang Dios nga Amay kag ang Iya Anak, nga si Jesucristo, sing personal. Makita naton Sila kag mabatian Sila samtang Sila nagatudlo kag nagapaisog sa aton. Karon isa ka tabon ang ginbutang sa aton mga kaisipan kag handurawan. Si Satanas, ang amay sang tanan nga kabutigan, may bentaha tungod kinahanglan naton nga makita ang realidad kon sin-o kita paagi sa mga mata sang pagtuo, samtang ang aton mga lawas naghimo sa aton nga bukas sa lawasnon nga tentasyon kag sa pisikal nga kahuyang.
May dalagko kita nga mga bulig sa paghatag sa aton sing kaisog sa sining kabuhi. Ang pinakadako amo ang Pagbayad-sala ni Jesucristo. Tungod sa Iya ginhimo, ang mga sala sarang mahugasan paagi sa mga tubig sang pagbunyag. Sarang naton mabag-o inang bugay kon mag-ambit kita sang sakramento nga may pagtuo kag may mahinulsulon nga tagipusuon.
Ang espirituhanon nga mga dulot isa pa gid ka bulig. Ginabaton naton ang Espiritu ni Cristo sa pagkabun-ag. Ina nagahatag sa aton sing gahum nga mahibaluan kon bala ang pagpili nga yara sa aton atubang magadala padulong sa kabuhi nga wala’y katapusan. Ang balaan nga mga kasulatan mga sigurado nga giya kon basahon naton ang mga ini nga kaupod ang Balaan nga Espiritu.
Ang Balaan nga Espiritu nagatugot sa aton sa pagpahayag sang pagpasalamat kag sa pagpangayo sing bulig sa pangamuyo nga may kaathag kag pagsalig nga aton sadto ginatagamtam upod sa aton Amay nga Langitnon kag aton maangkon kon magbalik kita sa Iya. Ina nga komunikasyon upod sa Dios nagabulig sa pagpadula sang kahadlok sa aton mga tagipusuon samtang nagapabaskog ini sang pagtuo kag paghigugma sa Amay nga Langitnon kag kay Jesucristo.
Ang balaan nga priesthood nagahatag sa aton sing kaisog sa aton pag-alagad. Sa iya sini nga mga ordinansa nagabaton kita sing gahum sa pag-alagad sa mga anak sang Dios kag sa pagpakigbato sa impluwensya sang malain. Kon tawgon Niya kita sa pag-alagad, may yari kita sining saad nga ang sin-o man nga magbaton sa aton, mangin yara man Sia, tungod mangin yara Sia sa aton atubang. Kag mangin yara sa aton natuo nga kamot kag sa aton nawala, kag ang Iya Espiritu mangin yara sa aton tagipusuon, kag ang Iya nga mga angheles sa aton palibot, sa pagtib-ong sa aton (tan-awa sa D&C 84:88).
Ang Propetang si Joseph Smith may rason nga magkahadlok sa iya pag-alagad. Pero ang Dios naghatag sa iya sing kaisog kaupod sining pagpasalig sa halimbawa sang Manunudlo:
Nagsiling Sia nga kon ginhulog si Joseph Smith sa bubon, ukon sa mga kamot sang mga manugpatay-tawo, kag ginsentensyahan nga mapatay; kon gintagbong sia sa kaidadalman; kon ang nagahuganas nga baha maghimbon batok sa iya; kon ang mabaskog nga unos mangin iya kaaway; kon ang langit nagtipon sing kadulom, kag ang mga elemento magbaral sa alagyan; kag labaw sa tanan, kon ang mismo mga baba sang impiyerno magnganga sing dako sa paglamon sa iya, dapat niya nga mahibaluan nga ining tanan nga mga butang magahatag sa iya sing eksperiyensya, kag ini mangin para sa iya kaayuhan.
Ang Ginuo nagsiling nga nag-agi sia sa mas ubos pa sining tanan, kag namangkot nga mas labaw pa bala sia sa iya? (tan-awa sa D&C 122:7–8).
Ang Dios naghatag sa aton sing masobra pa sangsa kinahanglanon nga bulig sa pagdula sing kahadlok kag sa paghatag sing kaisog, kon ano man ang aton atubangon sa kabuhi. Samtang nagadab-ot kita para sa Iya bulig, sarang niya Kita alsahon padulong sinang wala’y katapusan nga kabuhi nga aton ginahandum.
© 2009 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang First Presidency Message, March 2010. Hiligaynon. 09363 861
Pagtudlo gikan sa Sining Mensahe
Si Jesucristo, ang Punong Manunudlo, masami nga nagapamangkot sa pagpaisog sang mga tawo nga binagbinagon kag idapat ang mga prinsipyo nga Iya gintudlo. … ang Iya nga mga pamangkot nagapadasig sang pagpanghunahuna, pagpangita sang mga sabat, kag debosyon” (Teaching, No Greater Call [1999], 68). Panumduma nga maghimo kag magpamangkot sang pila ka mga pamangkot agud buligan ang mga indibidwal nga mahangpan kag madapat ang mga kamatuoran nga ginatudlo sa sining mensahe. Halimbawa, mahimo ka nga magpamangkot, “Ano nga bulig ang ginhatag sa inyo sang Dios agud dulaon ang kahadlok kag hatagan kamo sing kaisog?” ukon “Paano kamo ginbuligan sang Dios nga malampuwasan ang inyo mga kahadlok?” Paisoga ang mga indibidwal nga binagbinagon ang ila nga mga sabat antes magpaambit.