Mensahe sa Visiting Teaching, Marso 2010
Pagpabakod sang Pagtuo sa Dios nga Amay kag kay Jesucristo paagi sa Personal nga Pagtuon sang Balaan nga mga Kasulatan
Itudlo ining balaan nga mga kasulatan kag sinambit nga mga pulong ukon, kon kinahanglanon, isa pa ka prinsipyo nga magabugay sa mga utod nga babayi nga inyo ginabisita. Magpanaksihon parte sa doktrina. Agdaha ang inyo mga ginabisita nga magpaambit sang ila nabatyagan kag natun-an.
“Sang bag-o pa lang ako ginkasal,… gin-agda ako sa isa ka panyaga para sa tanan nga kauturan nga babayi sa Relief Society sa akon ward nga nakabasa sang Ang Libro ni Mormon ukon sang isa ka libro sang malip-ot nga kasaysayan sang Simbahan. Nangin pasapayan na ako sa akon pagbasa sang balaan nga mga kasulatan, gani nakapasar ako nga magtambong sang panyaga paagi sa pagbasa sang isa ka malip-ot nga libro tungod mas mahapos ini kag madali lang basahon. Sang nagakaon ako, may isa ako ka mabaskog nga pamatyagon nga bisan pa maayo nga balasahon ang libro sang kasaysayan, dapat ko kuntani ginbasa Ang Libro ni Mormon. Ang Balaan nga Espiritu nagapadasig sa akon nga bag-uhon ang akon pamatasan sa pagbasa sang balaan nga mga kasulatan. Sina mismo nga adlaw ginsugdan ko nga basahon Ang Libro ni Mormon, kag wala na ako mag-untat. … Tungod ginsugdan ko nga basahon ang balaan nga mga kasulatan adlaw-adlaw, natun-an ko ang parte sa akon Amay nga Langitnon, sa Iya Anak nga si Jesucristo, kag kon ano ang kinahanglan ko himuon agud mangin pareho sa Ila. …
Ang tagsa ka babayi sarang mangin isa ka manunudlo sang doktrina sang ebanghelyo sa iya puluy-an, kag ang tagsa ka utod nga babayi sa Simbahan nagakinahanglan sing ihibalo sa ebanghelyo bilang isa ka lider kag manunudlo. Kon wala mo pa maestablisar ang pamatasan sang adlaw-adlaw nga pagtuon sang balaan nga mga kasulatan, magsugod na subong kag magpadayon sa pagtuon agud magmangin handa para sa imo mga responsibilidad sa sining kabuhi kag sa mga wala’y katapusan.1
Julie B. Beck, pangkabilugan nga pangulo sang Relief Society.
“Ang pagtuon sang balaan nga mga kasulatan magabulig sa aton mga panaksihon kag sa mga panaksihon sang mga miyembro sang aton pamilya. Ang aton kabataan sa karon nga panahon nagadalagko nga ginapalibutan sang mga tingug nga nagaimpluwensya sa ila nga sikwayon ang inang matarong, kag sundon, sa baylo, ang mga kalingawan sang kalibutan. Magluwas kon may mabakod sila nga pundasyon sa ebanghelyo ni Jesucristo, isa ka panaksihon sang kamatuoran, kag isa ka determinasyon nga magpangabuhi sing matarong, mangin mahuyang sila sa sining mga impluwensya. Aton ang responsibilidad nga pabakuron sila kag protektahan.”2
Pangulong Thomas S. Monson.
“Luyag namon nga ang aton kauturan nga mga babayi magmangin mga mangin-alamon sa balaan nga mga kasulatan. … Kinahanglan ninyo sing ihibalo sang iya wala’y katapusan nga mga kamatuoran para sa inyo mismo nga kaayuhan, kag para sa katuyuan sa pagtudlo sang inyo kaugalingon nga kabataan kag sang iban pa nga malikupan sang inyo impluwensya.”3
“Luyag naton nga mabugayan ang aton mga puluy-an sang mga babayi nga mangin-alamon sa balaan nga kasulatan—bisan pa nga solo-lawas ukon kasado, lamharon ukon tigulang, balo ukon nagapuyo upod sa isa ka pamilya. Magmangin maalam sa balaan nga mga kasulatan—indi agud itamay ang iban, kundi agud itib-ong sila!”4
Pangulong Spencer W. Kimball (1895–1985).
© 2009 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang Visiting Teaching Message, March 2010. Hiligaynon. 09363 861
Mga Bulig para sa Visiting Teaching
Sa tion sang inyo pagbisita, sabta ang mga pamangkot kag magpaambit sang mga pagpasanag nga nagagamit sang balaan nga mga kasulatan. Magpaambit sang panaksihon kon paano ang pagtuon sang balaan nga mga kasulatan nagpabakod sang inyo pagtuo. Agdaha ang utod nga babayi nga inyo ginabisita nga magpaambit kon paano ang iya pagtuon sang balaan nga mga kasulatan nagpabakod sang iya puluy-an kag pamilya.
Personal nga Pagpanghanda