Rengeasek
Ng diak a chad el Klikiid
Ng meketeketang ra kblechoel el soak el mo uaia Nephi: el meral lolngesenges, kmal mui r a klaumerang, e dmolech ra chedaol tekoi. Osengek ea Nephi a kot el ngaruchei el okesiu ra klungiaol. Ngarngii a tekoi el lemuut el kmal soak ra di uldasou el mo uai ngii—malechub e dik nguu a telkib ra klungiolel.
A tara sils eng mlar ngii a kekerei el kerior el mer ngak, el ngii a kora diak el sebechek el mekerang. Ng mlarngii ra renguk el soak e mle betok a soak el meruul. Eng di ngkora dimlak a ngerang el mekedmokl. Meng lengelek el kora dikea kudengei el kmo mekerang, ea kuluuchais ra demak aikal kulmelchesiu. Ng milekiis el mo dechor, e merael mora blil a babier, e ngourang a Babier ra Mormon. Meng dimlak el dul mongerang, e mekengii el mora 2 Nephi 4 e mocha menguiiu ra teruich ma euid el bades.
Ng mlo mengesngasech a luchek el uaia kamik ra kurrenges aikaikid el mesisiich el tekoi: “Oi, ng mekngit a renguk er tial bedengek ra tech!” A uldesuek a mlo mediderurt. Ng mekerang a Nephi, ngkal kmal okesiu el mer ngak, e kmul kmo “ng mechitechut a bedengel ra tech”? Alsekum eng mle mechitechut, e tia ngerang rulii el mer ngak?
Meng liluut, el diuaia kamik el remurt ra bedengek ra demak a lechiuii a lluich ma ongeai el bades: “Bekiis e delbengek! E lak di mchebecheb el klengit a uchul.” Ak mlo omelchesiu ra uldasou el tial rrau reng el mlar ngak a ulebii el mlo dibus e ngak mlo melchesuar a mekekeald el reng ma eanged el mla obok ma dichel a sils. Ng kmal sebechek el smodii a teletael el tial bades a milklemesii a renguk. Ng kesai el bades ra chedaol llechukl a mla meskak a urungulek, chedaol uldasou, ma deoureng el uai tiaikid el bades.
Chelsel okedei el bades, ea Nephi a dillii sel kmal kulemdasou er ngii, eng di ng telkib el klebokel el tekoi: “Moldanges e renguk, kau el Dios er ngak, e beduk el uchul a kmo suobel.” Tial bades a milskak a budech ma omereng el saull el mora klechubechub ma beltik el reng ra Dios.
A demak a miltekii a babier e silodii el kmo aikal bades a lebebil ra taem eng okedongall el lengelel a Nephi. E mocha mekekokil losischeklak el kmo me tirkel tir a kmal mesisiich el chad ra beluulechad meng diak el cherrungel, e tirkal chad a kirir el mo medengei a chelitecheterir ele lak ete mo mekedidai a rengrir, ea bol uaisei, eng diak lemesisiich.
Ak mlo medengei. Meng diak dil chelitechetuch a uchul e bo lak el sebechek el mo uaia Nephi. Tia ra bo kudengei a chelitechetuk eng ngilikak lokedak ra teletelel ma blekerdelel a Nephi. A Nephi a mle mesisiich, el dirrek luldimukl ra blekongesenges ma klaumerang, e ngii a mle ngariou a rengul el mle sebechel locholt a chelitechetul.
Uriull er tiaikid el teletael, ea kmal di olab aikal tekingel a Nephi. Bekel taem el kunguiiu, eak mo omelchesuar osisiu el chedaol teletael el uai sera kot el taem el kulenguiiu. Aikal bades a uaia lechelitakl el kmo ngak a ngelekel a Dios, el sebechek a lmuut el betok el diak btab er chelechang. Ak medengei el kmo alsekum eak mesisiich ra klaumerang e omakes el mo ruchei, ea diak kudengei el klengeltengat a medechel.