Fal’ Yangaren
Dariy Bee’ ni Rib Man Gil
Gubin ngiyal’ ma guba adag ni nggu boed Nephi: ni rib ta fol, ni rib yul’yul’, ma rib thothup. U owcheg ma Nephi e ba kanawo’ ni rib mangil ko tin mangil ban’en. Boch’uw ban’en e ke yib ngog ko tin ni bay u lanin’ug u napan ni kug ilal ni kug boed ir fa boch’uw ni gube tabab nag u rarogon e tini rin’ nib fel’.
Reb e rran ma yib ban’en ngog nib tagan nib achig, nike yib ngog ko thamtham ko tin tagan. Bo’or e n’en ni guba adag ni ngug rrin’. Machane daryog ni ngug waen nga biyang. Fithik e yulu’ ko athep ni dariy, mu gog e pi thomthom rog ney ngak’ e chitmag. Ke sak’iy ngalang, me sor ko ba tafen e babyor, me girngiy reb e copi ko Fare Babyor ku Mormon. Dariy ban’en nibe yoeg, me pithig ko 2 Nephi 4 me tabab i bi’eg e verse 17.
Ke peth e ulum u fithik i dowag ni boed e gamig napan ni gu motoyil ko pi thin ney nib alamrin: “O karug gafgow!” Ke sagreng e tafney rog. Urogon ni Nephi, cha’ ni kanawo’, ni nge yoeg nib “gafgow”? Fa’anra ba gafgow, mang e ke rin’ ngoeg?
Biyay, ke mil fare gamig u rithik dowag napan ni bi’eg e chitmag e verse 28: “Mu od, o ya’el rog! Dab kum mul nga fithik’ e denen.” Ku thamiy rog ni ran ga’ar e ke chuw e maguleng nib tilmar u loelgeg me chuw me tomilang nag nib man gil ko lanelang nib blu nge yal’ nib ga’ ram’en. Rib momaw’ ni ngan weliy rogon nike tamilang nag e re verse ney e ya’el rog. Ri in e pi verse ko fare thin u babyor ku Got nib thothup nike suguyeg ko athap, llowan’, nge falfalen’ nike rin’ e biney ngog.
U lane verse 30, ma kari yoeg Nephi rogon ni gube lem, kemus ni ke yoeg nib sabathin nib gel: “Ya’el rog e ra falfalaen’, rom, o Got rog, nge fare war ko wo’en e thap rog.” Biney e verse e bay e thomthom riy ko gapas nge magar nifan ko runguy ku Somoel nge t’ufeg.
Ke uchmiy e chitmag fare ke babyor me weliy ni pi verse ney e bochi ngiyal’ ma kanoeg e psalm ngay. Me aram e fil ngog nib sowath ni mus ko gidii’ u fayleng ni rib falel’ e gathi rib mangil, ma pi gidii’ ney e ngar poyed e tin nib tagan roraed fa danga’ ma yad ra par ni yad ba tolngaen’, machane, dea mangil.
Kug nang fan. Gathi bachane bay e mo’waer rog arame be yip fan ni dabiyog ni ngug boed Nephi. Pi mo’waer rog ni kug nang e ke fekeg kug chuchgur ko fare n’en nib cheg Nephi riy. Nephi e ba mangil ni bachane, ma fol ma ba yul’yul’, ma ba sobutaen’ ma m’agaen’ ngay ni nge yoeg e pi kireb rok’.
Napan ni kug nang e binem, ma kug cha’riy e pi thin ney ku Nephi. Ra ngiyal’ ni kug bi’eg, ma guma thamiy ta’ab falfalaen’ nge nangaen’ u napan ni somm’on ni gu bi’eg. Pi verse ney e ke yoeg ngog ni gag e fak Got nib pin, bo’or ban’en ni rayog rog ko tin ni guma lem nag. Gumnang ni fa’anra gub yul’yul’ ma gube pi’eg nga m’on, ma bo’or e pi taw’ath ni ra yib.