Mulwol ko Bin Somm’on e Presidency, March 2010
Gelngiy Nib Mangil
Rebi fane yafos ni manemus e ngan dag ku Got ni gadaed ra rin’ e pi Motochiyel Rok u rogon gelngiy ni rayog. Kad pass niged e binem e sikeng u lane ginma paer e ya’el riy. Machane bin dalip ko fapi gidii’ u tempel e togopluw ko ran’em ni ngan sikeng nigey ko yafos ni manimus ya ri chey min waer.
U m’on ni ngad sum gaed, ma gadaed manang Got ni Chitamangiy nge Fak ni Pumo’on, Yesus Kristus, nib fel’ rogon. Rayog ni ngad guyed Row man motoyil Ngorow u napan ni Yow be sensey ma yow be ayuwegdaed. Chiney e ba lumor e ke ing lanyan’ daed nge n’en ni gadaed manang. Satan, chitamangin e baen, e ba’ gelngin ni bachan ni ngar da guyed e tin riyul’ ko gadaed mini’ u owchen e miich, napan ni sumniy daed nga fithik e tin tagan ban’en u fayleng nge tin mo’war ban’en.
Bay e ayuw rodaed ni ma ayuweg daed nge pi’ gelngin daed u lane biney e yafos. Bin th’abi mangil e fare N’en ni Rrin’ Yesus Kristus ni Bayuliydaed ko Denen. Bachan e n’en nike rin’, pi denen e rayog ni nge m’ay fan u fithik e raen ko tawfe. Rayog ni ngad bi’ech niged biyay fare taw’ath u napan ni gadaed ra fek fare sakrament u fithik e mich nge kalngan’ u gumircha’ey.
Pi taw’ath ni thothup e kureb e ayuw. Keyog fare Kan ni Thothup rok’ Kristus ngodaed ni kan gargeleg daed. Binem e ma pi’ gelingdaed ni ngad nanged e n’en ni ngad rin’ed um’on rodaed ni ra fek daed i yan ko yafos ni manemus. Fapi thin u babyor ku Got nib thothup e kanawo’ nib riyul’ u napan ni gadaed ra bi’eg u daken e Kan ni Thothup ma i un ngodaed.
Fare Kan ni Thothup e ma pagdaed ni ngad pininged e magaer man ning e ayuw u lane meybil ko n’en ni kad falfalen’ gaed riy ko Chitamangdaed u Tharmiy ni rayog ngodaed u napan ni gadaed ra sul Ngak. Binem e numon rodaed ngak Got e ma ayuweg e murus u gumircha’ daed ni nge chuw u napan nibe ilal e mich nge t’ufeg ku Chitamangiy nu Tharmiy nge Yesus Kristus.
Fare priesthood ni thothup e ma pi’ gelingdaed ko ayuw rodaed. U lane e pi gam’ing ni be yog gelngin daed ni ngad ayuweged pifak got man palog ko tin tagan ban’en. Napan ni ra pining daed ni ngad ayuw gaed, ma bay e biney e m’ag rodaed ko cha’an ni kad thap gaed ngak’, ma ku bay, i ire ra yaen u m’on rodaed. Me yaeni paer ko ba’an mat’aw i pa’ maed ma ba’an gilaey’ romaed, ma Kan ni Thothup Rok’ e ra yib i paer nga gumircha’ daed, ma pi angel nib liyeg daed, ninge ayuweg daed (muguy ko D&C 84:88).
U lan e muruwel rok fare Profet Josef Smith e bay fan ni rus. Machane Got e pii’ gelngin ko biney e sabathin ni be dag kanawo’en fare Masta:
Ke yoeg ni fa’anra noen’ Josef Smith nga lane loew, fa lan pa’ e gidii’ nib ta li’ e gidii’, ma kan noeg ni ngan li’ ngem’; fa’anra kan noen’ nga biyang nib to’ar; fa’anra gubin e tin tagan ma ke aw ngak’; fa’anra nifeng ni gel e ke magawon nag; fa’anra tharmiy e ke ulnguy gubin e tagan, ma gubin ban’en ma ke peth nga ta’abang ko kanawo’ nga lang, nge gubin ban’en, fa’anra mab langan e enfiyarno ngak’, ma thingari nang ni gubin e pin’ey nike buch rok’, ma bay fan ngak’.
“Fare Fak e Gidii’ e ke yib ngoraed nga but. Me fith fa’anra ba mangil Ngak’’ (Muguy ko D&C 122:7–8).
Ke pi’ Got gubin ban’en ngodaed ni ra ayuweg daed ni dab kud rus gaed me pi’ gelngin daed, ni demutrug ban’en ni ra buch u lane yafos. Napan ni gadaed ra ning e ayuw Rok, ma rayog ni nge chibiy daed ko yafos nib manemus ni gadaed be gay.
© 2009 by Intellectual Reserve, Inc. Gubin ni mat’won ma bay. © 2010 by Intellectual Reserve, Inc. Gubin ni mat’won ma bay. Kan micheg ko thin nu Ngalis: 6/09. Pilyeg kan fanay : 6/09. Ni pilyeg ko First Presidency Message, March 2010. Yapese. 09363 905
Tin ni yibe Fil ko Biney e Mulwol
Yesus Kristus, Sensey ni Cha’an nib Ga’, e ki i fithe pi duwer ni nge ayuweg e gidii’ ni ngan lem man rin’ e pi n’en nib ga’fan nike fil. … Pi duwer Rok’ e ma ayuweg e lem, ya’el nibe gay, nge n’en ni dabin thilyeg” (Teaching, No Greater Call [1999], 68). Mu tay ni sumneg nge duwer ni yibe fith e ma ayuweg e gidii’ ni ngan nang fan man rin’ e tin nib riyul’ ni kan fil u lane biney e mulwol. Boed ni, rayog ni ngam fith, “Mang e ke pi’ i got ngom ni dab kum rus me pi’ gelngim?” fa “Urogon nike ayuweg nem Got ni dab kum rus?” Ngan ayuweg e gidii’ ni ngar lem niged e fulweg um’on ni ngan pi’ e fulweg.