Poraus seni ewe Aewin Presetensi, March 2010
Pwara non Pekin Nimenimoch
Eu nein ekkewe popunapen manau won ei fonufan ina pwe sipwe pwäratä ngeni Kot pwe sipwe anneasosichi an kewe annuk nupwen mi namot pwara. Sia pasini ena tes non ewe nenien ngun. Nge eu ne unungatin ekkewe chon nang mi u ngeni ewe nongonong pwe repwe weri sossot non pekin manau won fonufan me mi wor eu tufichin ar repwe tur.
Me mwen sia uputiw, sia pwisin sinei Kot ewe Sam me Noun we, Jises Kraist. Sia tongeni kuner me aunsening ngenir nupwen ra aitikich me pesei kich. Iei mi wor eu epet mi nom non tupuach kewe me ach chechemeni. Mi wor an Setan, ewe semanapan chofona, pochokun pokiten mi namot sipwe kuna ennetin pwisin kich seni ekkewe mesen nuku, nupwen sia sossot non pekin inis.
Mi wor watte aninis mi awora ngeni kich ekkis pwara non ei manau. Ewe aninis mi napanap mi ewe Achasefan an Jises Kraist. Pokiten an kewe föfför, tipis mi tongeni totonuno non ewe konikin paptais. Sia tongeni asofosefanni ena efeioch nupwen sia angei ewe sakramen non nuku me ewe ekiekin aier.
Niffangen ngun mi pwan eu aninis. Sia angei ewe Ngunun Kraist nupwen sia uputiw. Iwe a ngeni kich ewe manaman ach sipwe sinei ika pwe sia fini eu mettoch ika pwe epwe emwenikich ngeni manau ese much. Ekkewe pukfel ra fakkun emwenochu kich nupwen sia anneanir ren ewe Ngun mi Fel a chiechi ngeni kich.
Ewe Ngun mi Fel a mutata ngeni kich pwe sipwe pwäratä ach kinisou me tingor ren aninis non iotek ren fatafatochun me sineinap sia fen weri nupwen sia nonnom ren Semach won Nang me pwan mine epwe nom rech nupwen sia niwinsefan ngeni I. Ena poraus fengen nefinach me Kot a aninis ne asueno niuokus seni netipach kewe me a apochokuna nuku me tong an Semach won Nang me Jises Kraist.
Ewe pristut mi pin a ngeni kich ewe pwara non ach angang. Non ekkewe efeioch sia angei ewe manaman ne angang ngeni noun Kot kewe semirit me pwan pochokun ngeni met mi ngaw. Nupwen a kokkorikich ngeni angang, mi wor ei pwon ngenikich pwe io mi etiwok, iwe Kot epwe pwan nonnom, me epwe feino mwom. Epwe nom won penie mwanin me peni fefinan, me Ngunun epwe nom non netipom, me noun kewe chon nang repwe nom unukum, ne apochokunok (nengeni D&C 84:88).
Mi wor popun an ewe Soufos Joseph Smith niuokus non an angang. Nge Kot a ngeni pwara me pwan ei pwon ren ewe nenien appiru an ewe Masta:
A apasa pwe ika Joseph epwe turunong me non ewe pwang, are me non poun chon nini, me ika pwe epwene mano; ika pwe a turunong non ewe annonnon; ika chommong mi u ngeni i; ika asepwan watte a tori; ika nang a winiti kiroch, me mettoch meinisin a u ngeni i; me pwan, ika enn a suki awan ngeni i, epwe sinei, nei at, pwe ekkei mettoch meinisin epwe kaeo seni, me ra fis fan iten ochun pwisin i.
Ewe Samon a ereni pwe ewe Noun Aramas a nom fan ir meinisin. Me a eisini ika pwe a nap seni I? (nengeni D&C 122:7–8).
Kot a ngeni kich watte aninis ne oturau niuokus me a ngenikich pwara, ren met chok sipwe weri non manauach. Nupwen sia eitau ren An aninis, a tongeni ekikicheta ngeni ena manau ese much mine sia kutta.
© 2010 seni Intellectual Reserve, Inc. Meinisin pung mi kawor. A för non Amerika. Kapungunon non fasun engenes: 6/09. Kapungunon chiakun: 6/09. Chiakun First Presidency Message, March 2010. Chuukese. 09363 901
Afanafan seni ei Poraus
Jises Kraist, ewe Masta Sense, a kapas eis fan chommong ne pesei ngeni aramas ne ekieki me aea ekkewe nongonong a afanafana. … Meinisin an kewe kapas eis mi efisata ekiek, kutta non pekin ngun, me pwon” (Teaching, No Greater Call [1999], 68). Kopwe ekieki me eisini ekkoch kapas eis epwe anisi aramas ne weweiti me aea ekkewe nongonong mi nom non ei poraus. Ren awewe, ka tongeni eisini, “Met pisekin aninis Kot a ngonuk ne asueno niuokus me awora ngonuk pwara?” are “Ifa usun Kot a anisuk ne pworacho ngeni om niuokus?” Pesei ngeni aramas repwe ekieki usun ponuan me mwen ra kapas.