Rongorongo man te Moan Beretitentii, Maati 2010
Aroaro n Ninikoria
Teuana mai ibuakon bukin te maiu n rabwata bwa ti na kakoaua nakon te Atua bwa ti kona ni kawakinii ana tua ngke e kainnanoa te ninikoria. Ti tokanikai iaon te kataaki anne n te aonaaba n tamnei. Ma te katenimwakoro n anera mai karawa a kakaitara te babaire n te aro are a kataaki n te maiu n rabwata ao e a karika te kangaanga ao a bwaka.
Imwain ae ti bungiaki, ti ataa te Atua ao Natina ae Iesu Kristo, i bon iroura. Ti kona n nooria ao n ongoraa Irouia ngkai a reireiniira ao a kaungaira. Ngkai te rabuna n ataibwai e a tia n rabuna ara iango ao ara ururing.Tatan, tamaia keewe, iai ana anga ibukina bwa ti riai ni kinaa raoi anuara rinanon ara taratara n onimaki, ngkai rabwatara a kairira nakon kaririin te aonaaba ao nakon mamaran te maiu n rabwata.
Iai buokara ae korakora are e anganira te ninikoria n te maiu aei.Te kabanea ni korakora bon Ana Mwakuri ni Kamaiu Iesu Kristo. Ibukin te bwai ae E a tia ni karaoia, buure a kona ni kabwaraaki inanon te ran ni bwabetito. Ti kona ni kabooua te kakabwaia anne ngkana ti butimwaea te toa n te onimaki ao te nano n rairannano.
Bwain tangira n te tamnei bon ngaia naba bwaai ni ibuobuoki. Ti karekea Tamnein Kristo ngke ti bungiaki. Are e anganira te konaa n ataa ara rinerine ni kataakira ae ti anganaki are e na kairira nakon te maiu are akea tokina. Booki aika a tabu ngaia kairara ni koaua ngkana ti wareki man raonaki iroun te Tamnei ae Raoiroi.
Te Tamnei ae Raoiroi e anganira te kona ni kakaitau ao ni bubuti buokara n te tataro ma te oota ae e itiaki ao te onimaki are ti a tia ngkoa ni karekea ni maiura ma Tamara are i Karawa ao are ti na manga karekea ngkana tia manga Okiria. Ara itoman ma te Atua e na boukira ni katoka te maaku mai inanora ngkai e karikirakea ara onimaki ao ara tangira iroun Tamara are i Karawa ao Iesu Kristo
Te nakoanibonga ae e tabu e anganira te ninikoria n ara mwakuri ni ibuobuoki. Inanon ana otenanti ti karekea te mwaaka ni beku ibukiia natin te Atua ao ni kona ni kaitara ana kaibwabwaru te buakaka. Ngkana e weteira bwa ti na beku, ti karekea te berita: Ao bwa are butimwaira, ao E na mena naba ikekei, E na nako n rimoara. E na mena i angataira ao i angamaingira, ao Tamneina e na mena inanora, ao ana anera ana katobibira, ao n tabekirarake (tara D&C 84:88).
Te Burabeti Iotebwa Timiti inanon ana mwakuri ni ibuobuoki iai ibukin maakuna. Ma te Atua E anganna te ninikoria ma te koaua raoi n ana katooto te Mataniwii.
E taku bwa ngkana e karenakoaki Iotebwa inanon te marua, ke n reke inanon baia taan tiritiri, ao ni motikaki taekana nakon te kamateaki; ke n karenakoaki n te kinono, man kaitaraaki ma angibuakan te maiu aei; ke ngkana te angbuaka e reke bwa kaitaraana, ao man rootongtong karawa, ao ngkana bwaai ni kabane a tuuka kawaina, ao iaon bwaai nako, ngkana mataroan moone e katangainaaki imwaina, kona riai n ataia natiu, bwa bwaai aikai anganiko bwa reireiam, ao n riki bwa kairam ae tamaroa.
Te Uea e tuangiia bwa Natin Te Aomata e ruorikaaki ni kamangoria riki nakoia, man titiraki ngkana a kakannato riki Nakoina (tara D&C 122:7–8).
Te Atua e a tia n anganiira ae e nang tau buokara ni katoka te maaku ao n anganira te ninikoria, n te bwai are ti kaitibo ma ngaia inanon maiura. Ngkana ti bubuti ibukin Ana ibuobuoki, E kona n tabekiira nakon te maiu are e aki toki are ti ukoukoria.
Reirei MAN TE RONGORONGO Aei
Iesu Kristo, te Tia Reirei ae Ataibwai, n tabetai e titirakinira titiraki ni kaungaia aomata bwa ana iangoa ao ni maiuakin taian reirei are E taekini. Ana titiraki a kamwakuri iango, ukoukori-maiura, ao motinnano” (Teaching, No Greater Call [1999], 68). Iangoa karaoan ao ni bubuti titiraki tabeua are e na buokiia aomata nako bwa ana matata ao ni maiuakin taian koaua ake a reiakinaki n te rongorongo.“N aron te katoto, ko kona n titiraki, Tera te buoka ae e anganiko te Atua ni katoka te maaku ao n anganiko te ninikoria?’’ke “E kanga te Atua ni buokiko n tokanikai iaon maakum?”Kaungaia aomata nako bwa ana iangoi raoi aia reke imwain aia kaeka.