Parau poro‘i na te Peresideniraa Matamua Mati 2010
Itoito Morare
Hoê o te mau tumu o te oraraa tahuti nei o te faaiteraa ïa i te Atua e e haapa‘o tatou i Ta’na mau faaueraa ia tae mai te itoito. Ua upooti‘a tatou i taua hi‘opo‘araa ra i roto i te ao varua. Area ra hoê i ni‘a i te toru o na varua o te ra‘i ra ua orure i te faaauraa e e hi‘opo‘ahia ratou i roto i te hoê oraraa tahuti tei reira te hoê fifi o te ore ratou e upooti‘a.
Hou to tatou fanau-raa-hia mai, ua ite mata tatou i te Atua te Metua e i Ta’na Tamaiti o Iesu Mesia. Ua nehenehe ia tatou ia ite ia Raua e ia faaroo ia Raua a haapii mai ai e a faaitoito mai ai Raua ia tatou. I teie nei ua tuuhia mai te hoê paruru i ni‘a i to tatou feruriraa e i to tatou haamana‘oraa. O Satane, te metua o te haavare, ua roaa ia’na te faufaa rahi no te mea e ite atu tatou i te parau mau i te mea o ta tatou e ite atu na roto i te mata o te faaroo, a vaiiho atu ai tatou i to tatou tino ia riro ei tufaa no te faahemaraa e no te paruparu i te pae tino.
E tauturu rahi ta tatou no te horo‘a ia tatou i te itoito i roto i teie oraraa. Te tauturu rahi roa a‘e o te Taraehara ia a Iesu Mesia. Na roto i te mea o Ta’na i rave, e nehenehe te mau hara e tamâhia i te pape no te bapetizoraa. E nehenehe tatou e faaapî i taua haamaitairaa ra a rave ai tatou i te oro‘a mo‘a na roto i te faaroo e ma te aau tatarahapa.
Te mau horo‘a pae varua o te tahi ïa tauturu. E farii tatou i te Varua o te Mesia i te fanauraa. Na te reira e horo‘a ia tatou i te mana no te ite e, eaha te taime te hoê maitiraa e arata‘i ai ia tatou i te ora mure ore. E arata‘i papû te mau papa‘iraa mo‘a a tai‘o ai tatou i te reira e te Varua Maitai ei hoa no tatou.
E faati‘a te Varua Maitai ia faaite tatou i to tatou mauruuru e ia ani i te tauturu na roto i te pure ma te maramarama e te ti‘aturi papû i fana‘ohia na e tatou i te taime a parahi ai tatou i piha‘i iho i to tatou Metua i te Ao ra e o te fana‘o-faahou-hia e tatou ia ho‘i faahou ana‘e tatou i piha‘i iho Ia’na. Na taua aparauraa i te Atua ra e tauturu ia tinai i te feaa i roto i to tatou aau e a patu ai i te faaroo e i te here o te Metua i te Ao ra e o Iesu Mesia.
E horo‘a te autahu‘araa mo‘a ia tatou te itoito i roto i ta tatou taviniraa. I roto i teie mau oro‘a e farii tatou i te mana no te tavini i te mau tamarii a te Atua e no te pato‘i i te mana o te diabolo. Ia ti‘aoro mai Oia ia tatou no te tavini, teie Ta’na e fafau mai ia tatou: « E o oia o te farii mai ia outou na, ei reira atoa ia vau, no te mea e haere au na mua i to outou mata. E vai ho‘i au i to outou pae atau e i to outou pae aui, e e i roto ho‘i to‘u Varua i to outou mau aau, e ta‘u mau melahi ho‘i e ati noa‘e ia outou na, ia haamaraa mai ia outou i ni‘a » PH&PF 84:88.
E tumu papû to te măta‘u o te Peropheta Iosepha Semita a tavini ai oia ra. Area râ, ua horo‘a te Atua ia’na i te itoito ma te faahi‘o ia’na i te hoho‘a o te Fatu:
« E mai te mea e hurihia’tu oe i roto i te aruâ, e aore râ i roto i te mau rima o te feia taparahi taata, e e tu‘uhia’tu te utu‘a pohe i ni‘a ia oe na; mai te mea e hurihia’tu oe i roto i te moana ra; mai te mea e tapoipoi mai te are tupaipai ia oe na; mai te mea e riro mai te vero puai ei enemi no oe na; mai te mea e haaputuputu mai te mau ra‘i i te pouri, e e amui mai te mea rii tumu no te faaapiapi i te e‘a; e tei hau roa’tu hoi, mai te mea e hamâmâ mai ai na taa no hade iho i te vaha i hamâmâ-roa-hia i te tituraa ia oe na, a ite mai oe, e ta‘u tamaiti nei e, e noa‘a ia oe te ite ite ohipa na roto i teie mau mea atoa nei, e e riro hoi ei maitai no oe na.
« Ua haere roa’tu te Tamaiti a te Taata i raro a‘e i teie mau mea atoa ra. Ua hau anei oe ia’na ra ? » (PH&PF 122:7–8).
Ua horo‘a rahi mai te Atua i te tauturu ia nehenehe tatou ia hamou i te pe‘ape‘a e ia horo‘a mai te itoito ia tatou, noa’tu eaha te mea e ti‘a mai i roto i te oraraa nei. A imi ai tatou i Ta’na tauturu, e nehenehe Oia e arata‘i ia tatou i tera ora mure ore o ta tatou e imi ra.
© 2009 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/09. Parau faati‘a no te iritiraa : 6/09. Iritiraa no First Presidency Message, March 2010. Tahitian. 09363 895
Haapiiraa mai roto mai i teie parau poro‘i
E mea pinepine to Iesu Mesia, te Orometua Haapii Rahi, aniraa i te mau uiraa no te faaitoito i te taata ia feruri hohonu e ia faaohipa i te parau tumu o Ta’na i haapii… Ua faatupu Ta’na mau uiraa i te feruriraa mana‘o, te varua ma‘imi e te fafauraa » (Te Haapiiraa, Aita e Piiraa Hau a‘e [1999], 68). A faanaho na e a ui e rave rahi mau uiraa no te tauturu i te taata ia maramarama e a faaohipa i te mau parau mau i haapiihia i roto i teie parau poro‘i. Ei hi‘oraa, e nehenehe ta outou e ui e, « Eaha te tauturu ta te Atua i horo‘a ia outou no te haamou i te măta‘u e no te horo‘a i te itoito i roto ia outou ? » e aore râ, « E mea nahea to te Atua tautururaa ia outou ia upooti‘a i ni‘a i to outou mau măta‘u ? » A faaitoito i te taata iho ia feruri i ta ratou mau pahonoraa hou a pahono ai.