bonana
Tekeletso ya Tumelo yame
Fa ke le 13, ke ne ka simolola go bala Buka ya ga Momne tsatsi le letsatsi, jalo ka segofadiwa malatsi otlhe go tsweng foo.
Borutelo jwa rona jwa Sekolo sa Tshipi jwa ba ba dingwaga tse 13 bo ne bo itsege ka go tlhoka tshisibalo. Le fa go ntse jalo, re ne re na le morutabana o o siameng yo a neng a leka ka bojotlhe jwa gagwe go ruta thuto nngwe le nngwe ka Mowa. Nngwe ya dithuto tseo e ne e le ka go bala lefoko le le boitshepo.
Kwa phelelong ya thuto o ne a re fa teko. E ne e direletswe mongwe le mongwe, mme ka lebaka lengwe o ne a lebagana le nna ka sebele fa a re, “Ke le gwetlha go bala go tsweng Buka ya ga Momone tsatsi le letsatsi!” Ke ne ka ithaya mo pelong ka re, “Ke tlaa go bontsha. Ke tlaa dira jalo!”
Ke ne ka simolola 1 Nephi kgaolo 1 jone bosigong joo ka ba ka tsweledisa go bala tsatsi le letsatsi. Gongwe ke ne ke sa simolola ka mowa o o leng one, mme fa nako e ntse e tsamaya ke ne ka simolola go rata ka fa go bala Buka ya ga Momone go neng go dira gore ke ikutlwe. Go bala bosigo le bosigo go ne ga nna mokgwa o o monate.
Morago ga dikgwedi ke ka tla go Alema 32 mme ka kgatlhwa ke mogopolo wa tekeletso ya tumelo. Kwa sekolong re ne re sa tswa go ithuta ka go tsamaisa ditekeletso tsa maranyane, ka jalo ke ne ka khubama ka bolelela Rraetsho kwa Legodimong gore ke simolola tekeletso. Ke ne ka kopa gore ke tle ke itse gore a Buka ya ga Momone ke nnete.
Fa ke lebela morago, ke itse gore Rraetsho kwa Legodimong o arabile dithapelo tsame gantsi. Go bala malatsi otlhe go tswa mo Buka ya ga Momone go mphile bokgoni jo bo oketsegileng go fenya bosula. Ke ne ka ikutlwa ke le gaufi le Rraetsho kwa Legodimong. Ke ne ka ikutlwa ke nonofaditswe ke maatla a Mowa yo o Boitshepo go fenya dikgwetlho. Se Alema a se buileng ka go dira tekeletso ka lefoko la Modimo ke nnete: “Le simolola go godisa mowa wame; ee, le simolola go sedimosa tlhaloganyo yame, ee, le simolola go nnatefelela” (Alema 32:28).