Ennaan eo an Būreejtōnji eo Kein Kajuōn, Juun 2010
Bao Jiddik ko Reiaļo kōn uno Kūre ioon Pā ko Peier
Enan̄in 60 iiō ko remootļo̧k, ke iaar jerbal āinwōt juōn bisop, Kathleen McKee, juōn kōrā eo ejako pāleen ilo ward eo aō, ekar mej. Ilubwilijen men ko m̧wein ewōr jilu nejin bao jiddik ko reiaļo. Ruo iaer, rej ippān kōļar iaļo ko rem̧m̧an, kar aikuj leļo̧k n̄an ro mōttan. Eo kein kajilu, ej Billie, ewōr māār in kōļar iaļo jen kūre ioon pā ko pein. Jejtōr McKee eaar je ilo peba in kakememj n̄an eō: “Kwe im baam̧le eo am̧ maron̄ ke kōm̧m̧an bwe en wōr im̧ōn? E ejjab lukkuun aiboojoj, bōtaab al eo an ej em̧m̧an tata.”
Jejtōr McKee eaar lukkuun āinwōt ļo̧k bao jidikdik eo eiaļo kōn uno kūre ioon pā ko pein. E eaar jab jeraam̧m̧an kōn aiboojoj, jenolo̧k kōn jeļā kōnono, ak kautiej e kōn ro ineen. Ak al eo an ekar jipan̄ ro jet m̧ōņōņō ļo̧k in ineek eddo ko aer im kōļap ļo̧k aer ineek jerbal ko aer.
Laļ in ej obrak kōn bao jiddik ko reiaļo uno kōn kūre ioon pā ko peier. Kaburom̧ōjm̧ōj eo in bwe jet wōt rekar maron̄ ekkatak n̄an al. Jet rej jodikdik ro im rej jab jeļā wōn ro er, ta eo remaron̄ erom ak aaet kōņaan erom; aolepen men eo rekōņaan ej erom juōn armej eļap an ebun̄bun̄. Ro jet rej kob dier kōn dettāer, eddodo kōn inepata, ak obrak kōn pere— mour kōn mour ko repād ilaļ kōn jon̄an maron̄ ko aer.
N̄an mour em̧m̧an ļo̧k, jej aikuj ejaake maron̄ eo n̄an jelm̧ae inepata kōn peran, eddodo in inepata kōn m̧ōņōņō, im anjo kōn ettā bōro. Kwōj kajjitōk, “Ewi wāween ad bōk kōttōpar kein?” Ij uwaak, “Ilo bōke juōn kōļmenļo̧kjeņ eo em̧ool kōn lukkuun in wōn kōj!” Kōj rej ļaddik im leddik ro nejin juōn Anij emour, eo ilo nememein jekar maron̄ kōm̧anm̧an. Ļōmņak kōn men en: kōm̧anm̧an ilo nememein Anij. Jejjab maron̄ lukkuun m̧ool n̄an dāpij tōmak in eļan̄n̄e jejjab mour kōn juōn ļōmņak eo em̧wilaļ kōn peran im kajoor.
Ilo laļ in ad, kadkad in m̧wil jet iien ej āinwōt edik aorōkōn jen deeo ak katōn̄tōn̄ Ak jān tōre ko etto kōkapilōklōk eo an Irooj n̄an Samual rikanaan eo ekar bar rooltok: “Kwōn jab lale turin mejān ak aetokōn, a Jeova ej lale būron” (1 Samuel 16:7).
Ke Rilo̧mo̧r eo eaar pukōt juōn em̧m̧aan in tōmak, E eaar jab kālete jān ilubwiljin ro ro rewānōk ro ekkā loe aolep iien ilo jikin im̧ōn kweilo̧k ko. Ak, E eaar kūr e jān ilubwiljin rieon̄ōd ro ilo Capernaum. Pere, kar jab jikuuļ, ejjab etto tokālik Simon eaar erom Pita, Rijjilōk in tōmak. Juōn bao jidikdik eiaļo kōn uno kūre ioon pā ko pein ekar ekkar kōn lōke im iakwe eo an M̧aajta eo.
Ke Rilo̧mo̧r eo ekar kālet juōn mijinede kōn itok limo im kajoor eo an, E ekar loe ej ilubwiljen rijipan̄ ro An ak ilubwilijen rijum̧ae ro An. Saul, rikakkure eo ekar erom Paul mijinede eo.
Ripinmuur eo ekar kālet armej ro rej jab wāppen n̄an katakin wāween eo n̄an wāppen. E eaar kōm̧m̧ane barāinwōt. Ej kōm̧m̧ane barāinwōt kiiō—jekdoon bao jiddik ko reiaļo kōn uno kūre ioon pā ko peier. Ej kūr kwe im n̄a n̄an jerbal Ippān ijin ioon laļ. Kalim̧m̧ur eo ad ej aikuj in jon̄e. Im ilo ad kakkōt, eļan̄n̄e jej wōtļo̧k, jen akweļap: “Tōl kōm̧, o tōl kōm̧, Rikōm̧anm̧an, jen bulōn maroklep n̄an am kajjieon̄ tōbrak bar juōn allen.”1
Jar eo aō ej bwe jen ļoor waanjon̄ak eo an Armej in Galilee eo, eo maron̄ loe emm̧akijkij an kobaļo̧k ippān rijjeram̧ōl ro, ro rettā tata, an Em̧m̧aan eo jān Galilee, eo kar loe ilubwiljin rijeramōl ro, ro rettā tata, ro rejjooļ, im ro renan̄inmej. Kōm̧m̧an bwe al eo em̧ool ej itok jān būrwer āinwōt ad kōm̧m̧ane.
© 2010 jen Intellectual Reserve, Inc. Aolep jim̧we rej pād ippān. Jeje ilo Amedka. Kōmālim ilo kajin English: 6/09. Kōmālim n̄an ukōte: 6/09. Ukook eo an First Presidency Messages, June 2010. Marshallese. 09366 874
Katakin jān Ennaan In
N̄e kwōj katakin … , ekkā an jipan̄ n̄e ewōr rikkatak ro rej lale ak ron̄jaake wōt juōn men im jab bar juōn” Teaching, No Greater Call [1999], 55). N̄an jipan̄ ro uwaan baam̧le ro meļeļe kōn ennaan eo an Būreejtōn Monson, ļōmņak n̄an kajjitikin er n̄an pojak in kwaļo̧k ta eo raar katak ālkin aer riiti ennaan eo ippāndoon. Kūr kajjojo n̄an aer kwaļo̧k ta eo ļeo ak lio ej en̄jaake ej juōn unin kōnono eaorōk ilo bwebwenato in. Kōjem̧ļo̧ke ilo am̧ kwaļo̧k am̧ naan in kam̧ool kōn ennaan eo an Būreejtōn Monson.
Katakin naan eo an Anij, āinwōt an itok jen Rikanaan ro, emaron̄ wōr juōn kareel in kajoor ioon mour ko an jabdewōt ro jej katakin (lale Teaching, No Greater Call, 50). Būreejtōn Monson eaar kwaļo̧k bwe ewōr maron̄ im kajoor in jeļā kōj rej ajri ro nejin Anij. Ālikin riiti bwebwenato in, kajjitōk ippān baam̧le eo n̄an kwaļo̧k ta eo eaar jipan̄ er kar kememej wōn er.