Hunyo 2010 Mensahe sa Visiting Teaching
Pagbag-o sang mga Kasugtanan paagi sa Sakramento
Itudlo ining balaan nga mga kasulatan kag sinambit nga mga pulong ukon, kon kinahanglanon, isa pa ka prinsipyo nga magabugay sa mga utod nga babayi nga inyo ginabisita. Magpanaksihon parte sa doktrina. Agdaha ang inyo mga ginabisita nga magpaambit sang ila nabatyagan kag natun-an.
Si Jesucristo Nagpahamtang sang Sakramento
“Nagkuha si Jesus sing tinapay, [kag] ginpakamaayo kag gintipiktipik ini, kag ginhatag sa [iya] mga Gintoton-an, [kag] nagsiling, ‘Kuha, kaon’ (Mat. 26:26). ‘Ini among akon lawas nga ginahatag tungod sa inyo: himoa [ninyo] ini sa handumanan nakon’ (Lucas 22:19). Sa amo man nga bagay ginkuha niya ang tagayan sang alak nga sa kinaandan ginasimbogan sang tubig, nagmitlang sang bendisyon sa pagpasalamat para sini, kag ginpasa ini sa mga nagapalibot sa iya nga nagasiling: ‘Ining tagayan amo ang bag-ong katipan sa akon dugo,’ ‘nga ginaula… sa kapatawaran sang mga sala.’ ‘Himoa ninyo ini sa handumanan nakon.’ …
“Sumugod sadtong eksperiyensya sa ibabaw nga hulot sang bisperas sang Getsemani kag Golgota, ang mga anak sang saad napaidalom sa kasugtanan nga dumdumon ang sakripisyo ni Cristo sa sining mas bag-o, mas mataas, mas balaan kag personal nga paagi.”1
Elder Jeffrey R. Holland sang Korum sang Napulo’g Duha ka mga Apostoles.
Ginabag-o Naton ang Aton mga Kasugtanan sa Pagbunyag paagi sa Sakramento
“Kon mabunyagan kita, ginadala naton sa aton mga kaugalingon ang sagrado nga ngalan ni Jesucristo. Ang pagdala sa aton kaugalingon sang Iya ngalan amo ang isa sang pinakaimportante nga mga eksperiyensya naton sa kabuhi. …
“Tagsa ka semana sa sakrament miting nagasaad kita nga dumdumon ang sakripisyo sang aton Manluluwas sa pagtubos sa aton gikan sa aton mga sala samtang ginabag-o naton ang aton kasugtanan sa pagbunyag. Nagasaad kita nga maghimo subong sang ginhimo sang Manluluwas—nga mangin matinumanon sa Amay kag pirme tumanon ang Iya mga kasuguan. Ang pagpakamaayo nga ginabaton naton sa baylo amo ang dalayon nga makaupod naton ang Iya Espiritu.”2
Elder Robert D. Hales sang Korum sang Napulo’g Duha ka mga Apostoles.
“Nakaupod ko ang isa ka walo-ka-tuig nga bata nga babayi sa adlaw sang iya bunyag. Sa katapusan sang adlaw iya gid ginpabugal, ‘Ginbunyagan ako sa bilog nga adlaw kag wala pa gid ako makasala bisan kis-a!’ Apang ang iya perpekto nga adlaw wala naglawig gid, kag nakasiguro gid ako nga nahibaloan na niya sa karon, subong nga nahibaloan man naton tanan, nga bisan ano naton nga pagtinguha, indi naton pirme malikawan ang tagsa ka malain nga sitwasyon, tagsa ka sala nga pagpili. …
“… Indi posible ang maghimo sang matuod-tuod nga pagbag-o sa aton lamang kaugalingon nga paghimakas. Ang aton kaugalingon nga determinasyon kag aton kaugalingon nga maayong mga intensyon indi bastante. Kon makasala kita ukon makapili sang indi maayo, kinahanglan naton maangkon ang bulig sang aton Manluluwas agud makabalik sa husto nga banas. Nagaambit kita sang sakramento tagsa ka semana agud ipakita ang aton pagsalig sa Iya gahum nga makapabag-o sa aton. Nagatuad kita sang aton mga sala kag nagasaad nga talikdan ang mga ini.”3
Julie B. Beck, pangkabilugan nga pangulo sang Relief Society.
© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang Visiting Teaching Message, June 2010. Hiligaynon. 09366 861
Mga Bulig para sa Visiting Teaching
Kon makilal-an mo na sing maayo ang isa ka utod nga babayi kag ang iya pamilya, magpangita sang mga paagi nga sarang mo sia mabuligan sa pagbag-o sang iya mga kasugtanan paagi sa sakramento. Kon wala sia nagatambong sa sakrament miting, puede mo bala sia agdahon sa pagtambong ukon tanyagan sang bulig agud mahimo niya ini (salakyan ukon plete, bulig sa pag-atipan sa kabataan, isa ka abyan nga masugilanon, kag madamo pa)?
Personal nga Pagpanghanda