Mensahe sang Unang Panguluhan, Hunyo 2010
Mga Kanaryo nga may Bukay sa Ila mga Pakpak
Malapit na sa 60 ka tuig ang nagligad, bataon pa ko sadto sang nagaalagad ako bilang isa ka bishop, si Kathleen McKee, nga isa ka balo sa akon ward, nagtaliwan. Dala sa iya mga pagkabutang amo ang tatlo ka hinuptanan nga mga kanaryo (sahi sang pispis nga kolor-dalag ang balahibo sa bug-os nga lawas). Ang duha nga masiri ang pagkadalag, gintugyan sa iya mga abyan. Ang ikatlo, nga si Billie, ang pagkadalag nadagtaan sang bukay sa iya mga pakpak. Si Sister McKee may ginbilin nga sulat sa akon: “Puede bala nga kamo sang imo pamilya ang magsagod sa iya? Indi sia ang pinakamatahum pero sia ang pinakamanami magkanta.”
Si Sister McKee daw pareho gid sang iya dalag nga kanaryo nga may bukay sa mga pakpak sini. Wala sia nabugayan sang katahum, nadulotan sang kaelegante, ukon napasidunggan nga makaangkon sang kaliwatan. Apang ang iya amba nakabulig sa iban agud madala sing mas handa ang ila mga kabudlayan kag matuman sing mas maayo ang ila mga katungdanan.
Ang kalibutan napun-an sang dalag nga mga kanaryo nga may bukay sa ila mga pakpak. Ang masubo amo nga diutay gid lang ang nakatuon magkanta. Ang iban mga lamharon nga wala makahibalo kon sin-o sila, ano’ng puede sila mangin ukon bisan pa luyag nga mangin; ang gusto lang gid nila amo ang mangin importante. Ang iban nagakuko sa katigulangon, ginapabug-atan sang pagkabalaka ukon napun-an sang pagpangduhaduha—nga nagapangabuhi nga kubos kaayo sa lebel sang ila mga ikasarang.
Agud magkabuhi sing dungganon, kinahanglan naton pauswagon ang ikasarang sa pag-atubang sang problema nga may kaisog, kapaslawan nga may kalipay, kag kadalag-an nga may pagpaubos. Mamangkot kamo, “Paano bala naton malab-ot ining mga tinutuyo?” Sabat nakon, “Paagi sa pag-angkon sang tunay nga panan-awan kon sin-o gid kita!” Kita mga anak nga lalaki kag babayi sang buhi nga Dios, nga sa Iya dagway kita gintuga. Pamensara ina: gintuga sa dagway sang Dios. Indi kita matuod nga makapati sini nga wala nagaeksperiyensya sang tuman nga bag-o nga igbalatyag sang kusog kag gahum.
Sa aton kalibutan, ang moral nga kinabatasan sa masami daw indi masyado kaimportante sangsa katahum ukon kaanyag. Apang gikan sang una pa nga panahon ang laygay sang Ginuo kay Samuel nga propeta nagabalik-balik: “Ang Ginuo nagatan-aw indi subong sang pagtan-aw sang tawo; ang tawo nagatulok sa gwa nga dagway, apang ang Ginuo nagatulok sa tagipusuon” (1 Samuel 16:7).
Sang ang Manluluwas nagpangita sang isa ka tawo nga may pagtuo, wala niya ginpili ini gikan sa panong sang mga nagapabugal sang ila kaugalingon nga pagkamatarong nga pirme makit-an sa sinagoga. Kundi, Iya gintawag ini gikan sa mga mangingisda sang Capernaum. Ang nagapangduhaduha, wala’y alam, kupog-kupog nga si Simon nangin si Pedro nga Apostoles sang pagtuo. Ang isa ka dalag nga kanaryo nga may bukay sa iya mga pakpak nangin angay sang bug-os nga pagsalig kag wala’y katapusan nga gugma sang Manunudlo.
Sang ang Manluluwas nagpili sang isa ka misyonero sang kaukod kag gahum, nasalapuan Niya ini indi sa tunga sang Iya mga sumulunod kundi sa tunga sang Iya mga kaaway. Si Saulo nga nagapangdaug-daog nangin si Pablo nga misyonero.
Ang Manunubos nagpili sang di-perpekto nga mga tawo nga magtudlo sang alagyan padulong sa pagkaperpekto. Ginhimo Niya ini sadto. Ginahimo Niya ini karon—bisan pa sa dalag nga mga kanaryo nga may bukay sa ila mga pakpak. Gintawag Niya ikaw kag ako agud alagaran Sia diri sa Duta. Ang aton pangako dapat mangin bug-os. Kag sa aton paghimakas, kon mapaslawan kita, mag-ampo kita: “Tuytuyi kami, o tuytuyi kami, dakong Tagtuga sang katawhan, gikan sa kadudulman agud magtinguha sa liwat.”1
Ang akon pangamuyo amo nga sundon naton ang halimbawa sang Tawo sang Galilea, nga makit-an nga nagaimpon sa mga imol, sa mga napaslawan, sa mga ginadaug-daog, kag sa mga nagaantos. Kabay nga may sinsero nga ambahanon nga maggikan sa aton mga tagipusuon sa aton paghimo sini.
© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang First Presidency Message, June 2010. Hiligaynon. 09366 861
Pagtudlo gikan sa Sining Mensahe
Kon magtudlo kamo … , masami makabulig nga papangitaon ukon papamation ang mga nagatuon sang isa ka pat-od nga butang” (Teaching, No Greater Call [1999], 55). Agud buligan ang mga miyembro sang pamilya nga mahangpan ang mensahe ni Pangulong Monson, tilawi nga pangabayon sila nga mangin handa sa pagpaambit sang ila natun-an pagkatapos nga mabasa ang mensahe sing dulungan. Agdaha ang tagsa nga magpaambit kon ano sa iya pamatyagan ang importante nga punto sa artikulo. Maghingapos paagi sa pagpaambit sang testimonya parte sa mensahe ni Pangulong Monson.
Ang pagtudlo sang pulong sang Dios, nga ginhatag paagi sa Iya mga propeta, sarang mangin mabaskog nga impluwensya sa mga kabuhi sadtong aton mga ginatudloan (tan-awa sa Teaching, No Greater Call, 50). Si Pangulong Monson nagasiling nga may kusog kag gahum sa paghibalo nga kita mga anak sang Dios. Pagkatapos basa sang artikulo, pangabaya ang pamilya nga magpaambit kon ano ang nagabulig sa ila sa pagdumdom kon sin-o sila.