Ennaan eo an Būreejtōnji eo Kein Kajuōn, Juļae 2010
M̧ōttā ro Retōmak
Juōn iaan men in letok ko jen Rilo̧mo̧r emaron̄ letok ej ilo an kūr kōj “ro m̧ōttan.” Jejelā bwe Ej iakwe kōn juōn iakwe eo ewāppen n̄an aolepen ro nejin Jemedwōj Ilan̄. Bōtaab n̄an ro otemjej rekar lukkuun tōmak ilo aer jerbal n̄an E, Enaaj lelo̧k taitōļ in aorōk. Kwōj kemeemej naan ko jen 84 m̧wen̄an ilo Doctrine and Covenant ilo wāween eo Irooj ej ba n̄an armej ro rekwojarjar, ro m̧ōttan—bwe jān iien in m̧aanļo̧k E enaaj kūr er ro m̧ōttan—bwe ej kōmene bwe Ej ej leļo̧k n̄an er kien in, bwe er ren erom aaet āinwōt ro Jeran ilo raan ko n̄e Ekar pād ippāer, ito itak n̄an kwaļo̧k ilo kajoor eo An (D&C 84:77).
Jenaaj erom ro M̧ōttan ilo ad jerbal n̄an ro jet ilo Etan. E ej waanjon̄ak eo em̧m̧an tata ikijjien m̧ōttā rot eo jej aikuj in erom̧. Ekōnaan wōt kōm̧m̧an men ko rem̧m̧an tata n̄an ajri ro nejin Jemedwōj Ilan̄. M̧ōņōņō ko aer ej m̧ōņōņō ko An. Ej en̄jaake būrom̧ōj ko aer āinwōt n̄e An kōnke E eaar kōļļaiki wōņāān aolepen jerawiwi ko aer, bōk ioon E make aolepen m̧ōjņo ko aer, kar ineek aolep jorāān ko aer, im kar en̄jaake aolep kōņaan ko aer. Wūn ko An rej erreo. Ejjab pukōt bun̄bun̄ ko n̄an E m̧ake ak n̄an leļo̧k aolep aiboojoj n̄an Jemedwōj Ilan̄. Eo m̧ōttad ejim̧we, Jisōs Kraist, ej make wōt jowan ilo an leļo̧k lemōņōņō n̄an ro jet.
Kajjojo iaad rekar kōm̧m̧an bujen in peptaij kar kalim̧m̧ur n̄an ļoor waanjon̄ak eo An n̄an ineek eddodo ko an ro jet (lale Mosiah 18:8).
Ilo raan kane tok enaaj maron̄ wōr am̧ iien ko rem̧m̧an n̄an erom juōn M̧ōttan. Emaron̄ ilo am̧ etetal ilo ial ko rebun̄aln̄al Emaron̄ ilo am̧ jijet ilo juōn iaļ an wa ko. Emaron̄ ilo am̧ pukōt juōn jikin jijet ilo juōn M̧ōn jar. Eļan̄n̄e kwōj alwōj, kwonaaj loe juōn eo ej eddodo kōn juōn men. Emaron̄ eddodo in burom̧ōj ak ajimakeke ak inepata. Emaron̄ in allikkar n̄an kwe eļan̄n̄e kwaar jar bwe Jetōb eo en lewaj n̄an eok mej ko n̄an am lo iloan bōro ko kajjojo im kwaar kalim̧m̧ur n̄an dāpij lōn̄ļo̧k pā ko rej toto.
Uwaak eo n̄an jar eo am̧ emaron̄ in turin mejān eo m̧ōttam etto, juōn eo im kwoj jan̄n̄in kar loe ium̧win elōn̄ iiō ko bōtaab eo me aikuj ko rej kab itok ilo ļōmņak eo am̧ im buruwōm̧ im en̄jaake āinwōt eļan̄n̄e rej am̧ make. Emōj an kar waļo̧k men in n̄an n̄a. Ro m̧ōttad etto rekar letok peir jen ijo ettoļo̧k im iiō ko n̄an letok rōjan̄ n̄e Anij wōt ekar maron̄ kar jiron̄ er kōn eddodo eo aō.
Rikanaan ro remour an Anij rekar jiron̄ tok kōj bwe jen erom m̧ōttā ro retōmak n̄an ro im rej delo̧n̄ tok n̄an Kabun̄ eo āinwōt rioktak ro im etal im lo̧mo̧ren ro otemjej emōj aer eļļo̧k. Jemaron̄ kōm̧m̧ane menin, im jenaaj kōm̧m̧ane menin eļan̄n̄e jej aolep iien kememej Rilo̧mo̧r eo. N̄e jej erļo̧ke peid n̄an leļo̧k jipan̄ im n̄an kōmraik ļo̧k juōn eddodo, ej erļo̧ke pein ippād. Enaaj tōl ļo̧k kōj n̄an ro im rej aikuj jipan̄. Enaaj kōjeram̧m̧an kōj bwe jen en̄jaake men ko im rej en̄jaake. Ilo ad kūjejeto ilo kōttōpar ko ad n̄an jerbal n̄an er, enaaj ļap ļo̧k an letok menin letok eo an kōn en̄jaake eo An n̄an kōj. Menin enaaj letok n̄an kōj peran im kajoor bwe jen bar erļo̧ke peid im bar erļo̧ke peir ilo lukkuun tōmak.
Im, jen kiō n̄an indeeo̧, jenaaj en̄jaake lan̄lōn̄ eo kōn ad ruwainene n̄an kumi in m̧ōttā ro retōmak An. Ij jar kōn kōjeram̧m̧an eo n̄an aoleped wōj im n̄an ro otemjej jenaaj jerbal n̄an er.
© 2010 by Intellectual Reserve, Inc. Aolep jim̧we rej an. Jeje ilo Amedka. Kōmālim ilo kajin English: 6/09. Kōmālim n̄an ukōte: 6/09. Ukok in First Presidency Message, July 2010. Marshallese. 09367 874
Katakin jān Ennaan In
Ro uwaan baam̧le ko eļap ļo̧k aer naaj m̧ōņōņō in bōk koņaer renaaj kajjitōk ippāer bwe ren katak jen jeje ko rekwo̧jarjar im jen naan ko an rikanan ro. (lale Teaching, No Greater Call [1999], 55). Ilo am̧ riiti kōnono eo, kajjitōk ippān ro uwaan baam̧le eo n̄an kakileni pedped ko me renaaj jipan̄ er erreeo n̄an ņaetaer ro m̧ōttan Irooj.
Teaching, No Greater Call ej ba: “Eļan̄n̄e ewōr ippam iakwe eo āinwōt iakwe eo an Kraist, kwonaaj pojak n̄an kwaļo̧k kōn ko̧jpeļ eo. Kwonaaj kaketak n̄an jipan̄ ro jet jeļā kake Rilo̧mo̧r eo im ļoor E” (12). Kwaļo̧ki jān laajrak in pedped ko me remaron̄ jipan̄ eok erom juōn rūkaki in loļo̧k eo em̧m̧an. Kōnono men kein ippān eo m̧ōttam̧, im lukkuun jar kake wāween eo n̄an erom “m̧ōttā ro retōmak” n̄an ro otemjej kwoj jerbal ippāer.