Naan in Katak an Kōrā, Juļae 2010
Kōkajoorļo̧k Baam̧le ko im M̧oko
Katak kein katak in, im n̄e ekkar, kōnono kake ippān jejtōr ro kwoj loļo̧k. Kōjerbal kajjitōk ko n̄an jipan̄ eok kōkajoorļo̧k jejtōr ro am̧ im n̄an kōm̧m̧an bwe Doulul eo an Kōrā ro en juōn men eo ej m̧ōttan mour eo am̧.
Jān Jeje ko Rekwojarjar: Jenesis 18:19; Mosaiha 4:15; D&C 93:40; Moses 6:55–58
Kōkajoorļo̧k ilo Aolep Iien ko Rem̧m̧an
“Kajjojo iad rej pād ilo jet baam̧le ko rekajjojo iaer jen doon. Jet baam̧le ko ewōr jiner im jemāer ro ippān ajri ro ilo m̧weo. Jet ripālele ejjeļo̧k ajri ro ilo m̧weo m̧wāer. Elōn̄ ro uwaan Kabun̄ eo ejjeļo̧k ippāer, im jet rej mama im baba ro ejjeļo̧k pāleer. Jet rej mama ro emej ro pāleer ak baba ro emej ro pāleer rej mour make iaer.
“Mekar ta kain rot baam̧le eo ad, kajjojo iad remaron̄ in kōkajoorļo̧k baam̧le ko aer make ak jipan̄ ilo kōkajoorļo̧k ro jet.
“[Kar juōn iien] ikar jokwe ippān leddik eo man̄dō im baam̧le eo an. Jotaan eo m̧okta jen an kar ajri ro etal im kiki, kōm kar kōm̧m̧ane juōn nokin in jota an baam̧le ekadu im ron̄jake juōn bwebwenato jān jeje ko rekwojarjar. Jemāer ekar bwebwenato kōn baam̧le eo an Liai im wāween an kar katakin ajri ro bwe rej aikuj dāpdep ilo aen in dāpdep eo, eo ej naan eo an Anij. Dāpdep ilo aen in dāpdep eo enaaj kar kōjparok er im tōl ļo̧k er n̄an lan̄lōn̄ im m̧ōņōņō. Eļan̄n̄e renaaj kōtļo̧k aen in dāpdep eo, emenin kauwatata n̄an er bwe renaaj m̧aļo̧n̄ ilo reba eo ettonoon dānnin.
“Ilo aer kajjieon̄ men in n̄an ajri ro, jineer ekar āinwōt ‘aen in dāpdep eo’ bwe rej aikuj dāpdep ie, im jemāer ekar āinwōt n̄e ej devil eo, kajjieon̄ kanōk ajri ro jān kōjparok im m̧ōņōņō. Ajri ro rekar iakwe bwebwenato eo im kar katak wāween eo eaorōk n̄an dāpdep ilo aen in dāpdep eo. Ālkin kar bwebwenato eo jān jeje ko rekwojarjar ekar iien n̄an jar an baam̧le. …
“Jeje ko rekwojarjar, nokin in jota an baam̧le, im jar an baam̧le renaaj kōkajoorļo̧k baam̧le ko. Jej aikuj in bōk aolep iien ko rem̧m̧an n̄an kōkajoorļo̧k baam̧le ko im jipan̄ kajjojo iaer n̄an pād wōt ilo ial eo ejim̧we.”1
Barbara Thompson, rikapilōklōk eo kein karuo ilo būreejtōnji eo eutiej an Doulul eo an Kōrā.
Ta Jemaron̄ Kōm̧m̧ane?
-
Ta ļōmņak ko n̄an kōkajoorļo̧k baam̧le ko im m̧oko kwonaaj maron̄ jake ippāņ jejtōr ro am̧? Ilo am̧ kōlmenļo̧kjen kōn aikuj ko aer, Jetōb eo emaron̄ bōktok ļōmņak ko n̄an kōļmenļo̧kjeņ eo am̧.
-
Ta kālet ko im̧aan tata kwomaron̄ ukōti allōn̄ in n̄an am̧ kōm̧m̧anm̧an ļo̧k am kōkajoorļo̧k baam̧le eo am̧ make im m̧weo?
Jān Bwebwenato ko Ad
Jān jinoin Doulul eo an Kōrā ro ekar wōr an eddo n̄an kōkajoorļo̧k baam̧le ko im m̧oko. Rikanaan Joseph eaar katakin kōrā ro ilō kweilo̧k ko jinoin an Doulul eo an Kōra ro, “Ne kwonaaj ro̧o̧l n̄an m̧weo, kwōn jab kwaļo̧k naan ko deddo n̄an ļōmaro pālemi, ak kōtļo̧k bwe jouj, meanwōr im iakwe en ļap ļo̧k ilo jerbal ko jen kiō im n̄an indeeo.2
Ilo kar 1914 Būreejtōn Joseph F. Smith eaar ba n̄an kōrā ro ilo Doulul eo an Kōra ro, “Jabdewōt iien enaaj wōr matōrtōr ak wōr lōkabokbok ko ilo baam̧le eo, … ewōr juōn doulul ak m̧ōttan jidik edede ļo̧k ejaake, im kōn men in letok ko im madenlo̧k ko ilowaan doulul in rej kōpooji im naaj pojak n̄an kōmļeļeiki jerbal ko im eļap aer aorōk im ļap tokjāer.3
© 2010 by Intellectual Reserve, Inc. Aolep jim̧we rej pād ippān. Jeje ilo Amedka. Kōmālim ilo kajin English: 6/09. Kōmālim n̄an ukōte: 6/09. Ukok in Visiting Teaching Message, July 2010. Marshallese. 09367 874