iTabagone
E Dua na Rai mai Delana
Me vaka e dua na itabagone a levu sara noqu madigi meu veipapitaisotaki ena vukudra na sa mate ena Valetabu e San Diego California. E dina ga niu dau marautaka na veika au dau sotava, ena dau dei tu ga ena noqu vakasama e dua na ilakolako o ya.
Au a sa yabaki 16, ka se qai yabaki 12 ga na taciqu yalewa lailai ka se qai imatai ni nona ilakolako me lai papitaisotaki ena vukudra na sa mate. Me vaka ga ni se qai imatai ni nona gauna, a loma ikeirau me keirau lako wavokita na taudaku ni valetabu ni oti na veika keirau cakava.
Na lomanibai ni valetabu e tiko kina e vica na vanua ni sarasara vinaka ena dua na yasana, keirau sa mani lako kina. Me vaka ni Valetabu e San Diego e tiko volekata e dua na gaunisala osooso, ni o tucake tu ena dua na vanua ni sarasara, o na raica sobu tu na sala ni motoka sega ni vakaiyalayala.
A solia vei au e dua na rai vou me baleta na bula na noqu tucake tu ena delana ni valetabu ena siga o ya. Au a raica sobu tu na vuravura vata kei na kena motoka cici vakatotolo, na veivanua ni volivoli curuoso, kei na veidroini ivakatakilakila ni gaunisala.
E kea sara ga a lako mai kina ena noqu vakasama e dua na vakanananu: “O sega ni vinakata mo dua na tiki ni ka o ya; e sega ni veika e baleta na bula.” Vakawasoma na kena dau vakatavulici vei au ni inaki ni bula sa ikoya noda lesu tale ka bula vata kei na Tamada Vakalomalagi ka yaco me da vakataki Koya. Au kila niu sega ni gadreva na veika vakavuravura meu rawata kina na inaki o ya.
Au vuki tale mai ka raica na valetabu totoka, kau vakamuduo me baleta noqu kila na kosipeli kei na kena irairai a solia vei au. Au kila ni ena lomadonu ni vuravura veilecayaki ka vakarerevaki oqo, au sa kunea kina e dua na delana cecere meu tucake tu kina.
Au a yalataka vua na Tamada Vakalomalagi ena valetabu ena siga o ya niu na tudei e Yasana ka sega ena vuravura ena veigauna kece. Veitalia ga se cava e viritaka mai vei keda na vuravura, e rawa ni da vorata mai na noda maroroya na veiyalayalati eda a cakava kei na noda tudei ena vanua tabu (raica V&V 87:8).