iVaqa ni Veisiko, Okosita 2010

Vakalevutaki ni Vakabauta kei na Bula Savasava Vakayadua

Vulica na veika oqo, veivosakitaka vata kei ira na marama o sikova. Vakayagataka na veitaro me vukei iko ena nomu vakaukauwataki ira na marama tacimu ka me tiki ni veivakabulabulataki ena nomu bula vakataki iko na iSoqosoqo Veivukei.

Vakabauta • Matavuvale • Veiqaravi

Mai na iVolanikalou

Isaia 2:2–3; V&V 109:22–23; 110:8–10

Noda iTavi Me Da Kilikili Kaya ena Sokalou ni Valetabu

“Na veiyalayalati eda vakayacora ka salavata kei ira na veicakacaka vakalotu eda ciqoma ena valetabu ena yaco me ka eda na vakadonui kina me da curu ki na iserau ni Kalou. Na veiyalayalati oqo era laveti keda me ulabaleta yani na noda iyacoyaco ni kaukauwa kei na rai. Eda veiyalayalati me da vakaraitaka kina na noda yalodina ena taraicake ni matanitu. Eda yaco me tamata ni veiyalayalati ena noda sa yalayala kivua na Kalou. Era na noda kece na veivakalougatataki yalataki ena noda yalodina ki na veiyalayalati oqo. …

“Na cava e rawa me ra vakayacora na marama ena Lotu me ra rawata kina na veivakalougatataki ni valetabu?

“Mai vei ira na Nona parofita, sa sureti ira tu kina na Turaga o ira era se bera ni ciqoma na veivakalougatataki ni valetabu, me ra vakayacora na veika e gadrevi me rawa ni ra ciqoma rawa kina. Sa sureti ira era sa ciqoma oti na veivakalougatataki oqo o Koya me ra dau lesu vakawasoma me ra marautaka tale kina na veika era sotava me ra laki vakarabailevutaka kina na nodra rai kei na kila me baleta na Nona ituvatuva tawamudu.

“Me da bula kilikili kaya me dua na noda ivolatara ni valetabu. Me da gole yani ki na valetabu ka vauci ira noda matavuvale me tawamudu. Me da dau lesu tale ki na valetabu ena veigauna taucoko sara e rawa me da gole kina. Me da solia vei ira na noda lewe ni matavuvale era sa mate na madigi me ra ciqoma kina na veicakacaka vakalotu ni bula vakacerecerei. Me da na marautaka na veivakaukauwataki vakayalo kei na ivakatakila eda ciqoma ena noda lakova vakawasoma na valetabu. Me da yalodina ka vakayacora ka maroroya na veiyalayalati ni valetabu me rawa ni da ciqoma kina na taucoko ni veivakalougatataki ni Veisorovaki.”¹

Silvia H. Allred, imatai ni daunivakasala ena mataveiliutaki raraba ni iSoqosoqo ni Veivukei.

Mai Na Noda iTukutuku Makawa

A vakatavulica o Peresitedi Gordon B. Hinckley (1910–2008) ni tubu mai na iSoqosoqo ni Veivukei ena nodra gagadre na marama me ra sokalou ena valetabu:

“Ena gauna a tara tiko kina na Valetabu e Kirtland era a kacivi na marama me ra qaqia nodra iyaya ni kana lase me matailalai me qai waki vata kei na palasita e dau vakayagataki ena lalaga ni valetabu, ka na rawa me vakayagataka na rarama ni siga kei na vula ka na vakacilava lesu mai na rarama o ya me vakarairaivinakataka na irairai ni vale.

“Ena gauna o ya, ni se lailai sara na ilavo ia e vutuniyau tu na vakabauta, o ira na tamata cakacaka era solia nodra igu kei na ivurevure ki na tara ni vale ni Turaga. O ira na marama era vakarautaka na kedra kakana, ena kena e uasivi duadua e rawa me ra vakarautaka. A tukuna o Edward W. Tullidge ni gauna era cula tiko kina na marama na ilati ni valetabu, a kaya, o Josefa Simici, ena nona vakaraici ira toka, ‘Kemuni na marama lewenilotu, o ni sa dau veivukei tu ga. O ira na marama lewenilotu era sa dau imatai ka yaga duadua ena cakacaka vinaka kecega. E a liu taumada o Meri me laki raica na Turaga sa tucaketale; ia o ira na marama oqo era sa liu ena cakacaka e loma ni valetabu.’ …

“E Nauvoo talega, ena kena tara tiko na valetabu, eratou duavata e vica na marama me ratou cula nodra sote na tamata cakacaka. Sa ikoya na veika a yaco oqo sa lewe ruasagavulu kina era a soqoni vata ena Lotulevu, 17 ni Maji 1842, ena rumu e cake ni nona sitoa na Parofita.”² Oqori sa tekivu kina na iSoqosoqo ni Veivukei.

Na Cava E Rawa Ni Da Cakava?

Na veitokoni cava e rawa meu solia me vukei ira kina na marama taciqu me baleta nodra vakavakarau ena lako ki na valetabu?
Ena rawa vakacava meu bulataka na veika era a sotava taumada na marama ka ra a solibula me rawa ni ra ciqoma na veivakalougatataki ni valetabu?
E rawa vakacava meu rawata na veivakalougatataki ni valetabu?

© 2010 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/09 Vakadonui me vakadewa: 6/09 iVakadewa ni Visiting Teaching Message, August 2010. Fijian. 09368 858