iTukutuku ni Mataveiliutaki Taumada, Okosita 2010

Veivakalougatataki ni Valetabu

Mai vei Peresitedi Dieter F. Uchtdorf

iKarua ni Daunivakasala ena Mataveiliutaki Taumada

Au se nanuma tikoga oqo na gauna erau a kauta kina neitou itubutubu na neitou matavuvale ki na Valetabu na Swiss ka se qai tara vou walega, na kena imatai e Iurope, me yaco me dua na matavuvale tawamdu. Au sa yabaki 16 ena gauna o ya kau gone duadua vei keitou na lewe va. Keitou tekiduru vata kece ena icabocabo ni isoro me keitou vauci vata e vuravura mai na kaukauwa ni matabete, vata kei na dua na yalayala veivakurabuitaki ni rawa me keitou vauci vata me tawamudu. Au na sega ni guilecava rawa vakadua na gauna totoka oqo.

Me vaka ga e dua na gonetagane au sa bau kurabui sara ga ena neitou takosova na iyalayala ni dua na vanua me keitou lai vauci vata vakamatavuvale. E vakaraitaka kivei au na sala ni cakacaka ni valetabu ena kena takosova na iyalayala kei vuravura raraba me kauta mai na veivakalougatataki tawamudu kivei ira kece na lewe ivuravura. Na veivaletabu ni Lotu i Jisu Karisito ni Yalododonu Edaidai era a tara vakaidina me baleta na kena yaga e vuravura taucoko, se kawa tamata cava ga, ivakarau vakavanua, se na veika vakapolitiki.

Na veivaletabu era sega ni guce ena nodra vakadinadinataka na qaqa ni vinaka. O Peresident George Q. Cannon (1827–1901), iMatai ni Daunivakasala ena Mataveliutaki Taumada, a kaya ena dua na gauna, “Na veivatu ni tutu kece sara e vakotori me baleta e dua na Valetabu, kei na Veivaletabu kece sara e vakacavari … sa vakalailaitaka na kaukauwa nei Setani e vuravura, ka vakalevutaka na kaukauwa ni Kalou kei na bula e va-Kalou.”¹

Ni vakalevutaka na valetabu yadua na vakayarayarataki ni bula savasava e vuravura, na veivakalougatataki cecere duadua, sa dina sara, e lako kivei ira era dau lakova na valetabu. E kea eda ciqoma kina na toso cake ni rarama kei na kila ka da cakava kina na veiyalayalati bibi ni, kevaka e vakamuri, ena vukei keda ena noda lakova na gaunisala vakatisaipeli. Me kena ivakalekaleka, e vakatavulica vei keda na valetabu na inaki tabu ni bula ka vukei keda ena noda kunea na gaunisala dina vakayago ka vakayalo.

Ia, e sega ni da lakova na valetabu me baleti keda ga. Ena gauna vakayadua eda curuma kina na veivale ni vakabauta tabu oqo, eda vakayacora e dua na itavi ena vakarokoroko, veivueti ena cakacaka ni veivakabulai ka vakarawarawataki kivei ira kece na luve ni Kalou mai na Veisorovaki ni nona Le Duabau ga na Tamada. Sa ikoya oqo e dua na veiqaravi tabu e sega ni baleti keda ga ka rawa kina vei keda eda vakayago me da vakaitavi ena cakacaka lagilagi ka da yaco kina me da ivakabula ki na ulu-ni-vanua ko Saioni.

Me baleti ira era sega ni rawa me ra lakova na valetabu ena gauna oqo ena kena iulubale cava ga, au vakauqeti kemuni mo ni vakayacora na veika kece sara ena nomuni kaukauwa mo ni taukena e dua na ivolatara ni valetabu. Na ivolatara ni valetabu sa ikoya e dua na ivakaraitaki ni noda yalodina kei na noda guta me da qarava na Turaga. Sa ikoya e dua na ivakaraitaki ni noda lomana na Turaga, me vaka e vakatavulica o Jisu, “Ko koya sa nanuma na noqu vunau, ka talairawarawa kina, sa ikoya oqo sa lomani au; ia ko koya sa lomani au ena lomani koya ko Tamaqu, ia kau sa lomani koya, ka vakatakilai au vua” (Joni 14:21).

Ena kena tomani tiko me yaco me vakarairaivinakataki na vuravura ena veivale tabu ka vakatabui kivua na Turaga, sa noqu masu ni da na vakayacora noda itavi ena noda kauti lomalagi vakavoleka mai ki vuravura ena noda kilikili me da taukena e dua na ivolatara ni valetabu ka vakayagataka tiko. Ni da vakayacora oqo, sa na vakalevutaka cake vakaidina na bula savasava sega walega ena noda bula kei na vuvale ia ena noda veiitikotiko kei na vuravura raraba.

© 2010 mai na Intellectual Reserve, Inc. Dodonu kece e taqomaki. Tabaki e Amerika.Vakadonui me Vakavalagi: 6/09. Vakadonui me vakadewa: 6/09. iVakadewa ni First Presidency Message, August 2010. Fijian. 09368 858

ivakavuvuli mai na iTukutuku Oqo

E levu na tamata era na vuli vakavinaka cake ka dei na nodra vakanananu ni ko veivakavulici mai na iyaloyalo ka sega mai na vosa walega (raica Veituberi, Me iLutua Ni Noda Bula [1999], 204). Ena gauna ni lesoni, vakasamataka mo vakaraitaka na iyaloyalo ni dua na valetabu. Ni o sa wilika oti na itukutuku, me veivosakitaki se cava na vuna e bibi kina kivei Peresitedi Uchtdorf na valetabu. Sureti ira na gone lalai ena matavuvale me ra droinitaka e dua na iyaloyalo ni nodra matavuvale ena valetabu.

E tukuni ena Veituberi, Me iLutua Ni Noda Bula, “Vakauqeti ira na lewe ni nomu kalasi me ra vakarautaka e dua se levu cake na nodra navunavuci me rawa ni vukea nodra bulataka na ivakavuvuli o sa vakatavulica vei ira” (207). Vakasamataka mo wilika vata kei na matavuvale na itukutuku nei Peresitedi Uchtdorf ka sureti ira na lewe ni matavuvale me ra vola e dua na nodra navunavuci vakataki ira me na vukea nodra tudei ka kilikili me ra taura kina ka vakayagataka e dua na ivolatara ni valetabu.