Fas Presidensi Mesej, Ogis 2010
Ol Blesing blong Tempol
Mi save tingbaot yet taem papa mo mama blong mi i tekem famle blong mifala i go long niufala Tempol blong Switselan we oli jes bildim mo i fas tempol long Yurop, blong kam wan famle blong oltaem. Mi bin gat 16 yia mo mi las bon long ol fo pikinini. Mifala i bin nildaon tugeta long alta blong sil long wol ia tru long paoa blong prishud, wetem wan gudfala promes se bae mifala i save sil blong taem we i no save finis. Bae mi neva save fogetem naesfala taem ia.
Olsem wan boe mi bin sapraes bigwan se mifala i bin krosem ol boda blong kantri blong sil olsem wan famle. Long mi, hem i wan saen long fasin we wok blong tempol i krosem ol boda blong wol blong karem ol blesing we oli no save finis i kam long evri man we oli stap long wol. Ol tempol blong Jos blong Jisas Kraes blong Ol Lata-dei Sent oli bildim tru from gud blong ful wol, nomata long weaples yu kam long hem, kalja, o wanem rod blong politik yu stap folem.
Ol tempol oli wan strong witnes se stret mo gud fasin bae i win. Presiden Joj K. Kanon (1827–1901), Fas Kaonsela long Fas Presidensi, i bin talem wan taem, “Evri fandesen ston we oli putumdaon blong wan Tempol, mo evri Tempol we oli komplitim … i daonem paoa blong Setan long wol ia, mo i mekem paoa blong God mo fasin blong kam olsem God i kam antap.”1
Taem wanwan tempol i mekem paoa blong stret mo gud fasin i kam antap long wol, i tru, ol bigfala blesing oli kam long olgeta we oli stap go long tempol. Long tempol, yumi kasem moa laet mo save, mo yumi mekem ol tabu kavenan we, sapos yumi folem, bae oli helpem yumi blong wokbaot long rod blong wan disaepol. Blong talem long sot toktok, ol tempol oli tijim yumi abaot ol tabu stamba tingting blong laef mo helpem yumi blong kasem ol tru daereksen blong yumi long saed blong bodi mo long saed blong spirit.
Be, yumi no stap go long tempol blong yumiwan nomo. Evri taem yumi go insaed long ol tabu bilding ia, yumi plei wan rol long wok ia we i tabu mo i blong sevem man we God i mekem i stap blong evri pikinini blong Hem from Atonmen blong Wan Pikinini Nomo Ia blong Papa. Hemia hem i wan gudfala mo tabu seves, mo i wan seves we i save letem yumi olsem ol man blong wol ia blong tekempat long wok blong glori ia blong kam ol man we oli winim faet long Hil ia, Saeon.
Long olgeta we oli no save go long tempol naoia nomata from wanem risen, mi leftemap tingting blong yufala blong mekem evri samting long paoa blong yufala blong holem wan tempol rekomen we i laef. Tempol rekomen hem i wan saen long fasin blong yumi blong stap fetful mo gat strong tingting blong givim seves long Lod. Hem i wan saen blong lav blong yumi long Lod, olsem we Jisas i bin tijim, “Man we i kasemgud ol tok blong mi, mo i stap obei long olgeta, man ya nao i lavem mi. Mo man we i lavem mi, Papa blong mi bambae i lavem hem. Mo mi bambae mi lavem hem, nao bambae mi save soemaot mi long hem, blong hem i savegud mi” (Jon 14:21).
Taem graon blong wol i gohed blong kam naes wetem ol tabu bilding ia we oli konsekretem long Lod, hem i prea blong mi se bae yumi mekem pat blong yumi blong karem heven i kam kolosap long wol taem yumi stap klin inaf blong holem wan tempol rekomen mo yusum. Taem yumi mekem olsem, stret mo gud fasin bae i no kam antap nomo long ol laef blong yumi mo ol hom, be tu, long ol komuniti blong yumi mo raon long wol.
© 2010 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/09. Oli letem translesen: 6/09. Translesen blong First Presidency Message, August 2010. Bislama. 09368 852
Yusum Mesej Ia blong Tij
Plante pipol oli lan moa gud mo oli save tingbaot samting longtaem moa taem yu presentem ol aedia wetem ol tul blong help we oli save luk, bitim taem yu toktok nomo (luk long Teaching, No Greater Call [1999], 182). Long taem blong lesen, tingting blong soemaot wan pikja blong wan tempol. Afta ridim atikel ia, toktok raon long from wanem tempol hem i impoten long Presiden Ujdof. Invaetem ol yang pikinini long famle blong oli droem wan pikja blong famle blong olgeta long tempol.
Buk ia Teaching, No Greater Call i talem, “Leftemap tingting blong olgeta we yu stap tijim blong oli setemap wan o moa gol we i save helpem olgeta blong oli laef folem prinsipol we yu bin tijim” (159). Tingting blong ridim mesej blong Presiden Ujdof wetem famle mo invaetem ol famle memba blong oli raetem wan gol blong olgetawan we bae i save helpem olgeta blong oli stap klin inaf blong holem mo yusum wan tempol rekomen.