Visiting Tijing Mesej, Ogis 2010
Kam Antap long Fet mo Fasin blong Yuwan blong Stap Stret mo Gud
Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.
Fet • Famle • Seves
Long Ol Skripja
Responsabiliti blong Yumi blong Stap Klin Inaf blong Mekem Tempol Wosip
“Ol kavenan we yumi mekem wetem ol odinens we oli go wetem we yumi kasem long tempol, oli kam ol kwalifikesen blong yumi blong save go long ples blong God. Ol kavenan ia oli leftemap yumi i go bitim ol limit blong paoa mo tingting blong yumiwan. Yumi mekem ol kavenan blong soemaot fasin blong givim evri samting blong yumi blong bildimap kingdom. Yumi kam ol kavenan pipol taem yumi putum yumi anda long kavenan blong God. Evri blesing we oli bin promesem bae oli blong yumi tru long fasin blong yumi blong stap fetful long ol kavenan ia. …
“Wanem nao ol woman blong Jos oli save mekem blong klemem ol blesing blong tempol?
“Tru ol profet blong Hem, Lod i invaetem olgeta we oli no kasem ol blesing blong tempol yet blong oli mekem wanem oli nidim blong mekem blong oli kwalifae blong oli save kasem ol blesing ia. Hem i invaetem olgeta we oli bin kasem ol blesing ia finis blong oli gohed blong kambak moa long tempol. Sapos i posibol, blong harem gud bakegen long ol eksperiens, blong kam antap long visen blong olgeta mo save blong olgeta long plan blong Hem we i no save finis.
“Letem yumi stap klin inaf blong gat wan tempol rekomen we i laef. Letem yumi go long tempol blong silim ol famle blong yumi blong taem we i no save finis. Letem yumi gobak moa long tempol sapos ol situesen blong yumi i givim janis long yumi. Letem yumi givim long ol famle blong yumi we oli bin ded finis janis blong kasem ol odinens blong fasin blong kam olsem God. Letem yumi glad long paoa long saed blong spirit mo long revelesen we yumi kasem taem yumi go long tempol oltaem. Letem yumi stap fetful mo mekem mo kipim ol tempol kavenan blong kasem ol ful blesing blong Atonmen.”1
Silvia H. Olred, fas kaonsela long Rilif Sosaeti jeneral presidensi.
I Kamaot long Histri blong Yumi
Presiden Godon B. Hinkli (1910–2008) i bin tijim se Rilif Sosaeti i gro aot long ol strong tingting blong ol sista blong stap wosip long ol tempol:
“Long taem we oli stap bildim Ketlan Tempol oli bin singaotem ol woman blong oli granem smosmol ol kap mo plet blong olgeta we oli wokem long seremik, blong oli miksim wetem plasta we oli bin yusum blong putum long ol wol blong tempol, we bae i save kasem laet blong san mo mun mo blong i letem laet ia i mekem bilding ia i luk naes.
“Long ol taem ia, taem i gat smol mane nomo be i bin gat fulap fet, ol man we oli bin wok oli givim paoa mo ol risos blong olgeta blong oli bildim haos blong Lod. Ol woman oli givim ol kaekae, gudfala kakae we oli save mekem. Edwod W. Tulidj i bin ripotem se taem ol woman oli stap somap ol vel blong tempol, Josef Smit, i stap lukluk olgeta i wok, mo i talem, ‘Okei, ol sista yufala i stap rere oltaem nomo. Ol sista oli stap faswan mo oli stap lidim evri gudfala wok. Meri i bin fas woman we i bin stap long taem blong laef bakegen long ded; mo ol sista naoia oli faswan blong wok insaed long tempol.’ …
“Bakegen long Nauvu, taem oli stap bildim yet tempol, sam woman oli bin joen tugeta blong mekem ol sot blong ol man we oli stap wok. Hem i from ol situesen olsem ia nao we twante long olgeta i bin kam tugeta long Tosdei, 17 Maj 1842, long rum antap long stoa blong Profet.”2 Afta nao, Rilif Sosaeti i bin stat.
Wanem Nao Yumi Save Mekem?
-
Wanem sapot nao mi save givim blong helpem ol sista blong mi blong oli rere blong go long tempol?
-
Olsem wanem nao mi save stap soem eksampol blong ol eli sista ia we oli bin sakrifaes blong kasem ol blesing blong tempol?
-
Olsem wanem nao mi save klemem ol blesing blong tempol?
© 2010 i kam long Intellectual Reserve, Inc. Oli holem evri raet.Oli printim long YSA. Oli letem long Inglis: 6/09. Oli letem translesen: 6/09. Translesen blong Visiting Teaching Message, August 2010. Bislama. 09368 852