Yut
Buk blong Momon blong Miwan
Long Ogis 2005, taem Presiden Godon B. Hinkli (1910–2008) i bin givimaot wan jalenj long ol memba blong Jos blong ridim Buk blong Momon bifo en blong yia, mi bin promesem miwan bae mi ridim flatem Buk ia. Mi bin save gud ol stori insaed long Buk blong Momon be mi neva ridim ful buk ia. Naoia mi minim blong kipim promes blong mi.
Oli bin tijim mi blong yusum ol skripja long laef blong mi mo mekem olgeta long yus blong miwan. Mekem se taem mi rid, mi raet long ol saed blong pej wanem mi ting hem i stret tingting blong ves we i stap. Mi droem laen andanit long ol toktok mo sentens we oli stap ripitim oltaem blong soem hamas hem i impoten.
Mi putum nem blong mi kolosap long ol nem insaed long ol skripja blong helpem mi tingbaot se toktok blong God we i bin talem long ol narawan i save stap olsem ol toktok we Hem i talem long mi tu. Olsem eksampol, long 2 Nifae 2:28 mi bin raetem nem blong mi: “Mo nao, [Hilari], mi wantem se yufala i dipen long bigfala Man blong givhan, mo obei long ol bigfala komanmen blong hem.” Moa mi mekem Buk blong Momon i kam blong miwan, mi glad moa blong ridim evri dei.
Taem mi ridim evri dei, ol prea blong mi i kam aot long hat mo i spesel long miwan. Mi kam blong tingting strong long ol klas blong mi mo folem ol wispa blong Spirit blong mekem fren long ol narawan. Long lasfala naet long en blong yia, mi bin finisim Buk blong Momon.
Nao mi kam blong andastanem from wanem hem i impoten blong ridim ful Buk blong Momon, wetem ol narafala skripja, mo mi wantem blong mekem plante moa taem long laef blong mi.