Fas Presidensi Mesej, Septemba 2010
Buk blong Momon Olsem Wan Gaed blong Yuwan
Evriwan long yumi i filim, long ol gudfala taem blong yumi, wan strong tingting blong go bak hom blong laef wetem God. Hem i bin givim long yumi presen we i Pikinini Ia blong Hem we Hem i Lavem Tumas olsem Sevya blong yumi blong i soemaot rod mo tijim yumi olsem wanem blong folem. Hem i bin givim long yumi ol profet blong oli soem rod. Profet Josef Smit i bin kasem paoa long God blong transletem rekod blong ol profet we i Buk blong Momon. Buk ia i stret gaed blong yumi long rod i go hom long God.
Josef smit i bin talem abaot gudfala buk ia, “Mi bin talem long ol brata se Buk blong Momon i moa stret long eni narafala buk long wol, mo i ki ston blong bilif long God blong yumi, mo wan man bae i kam moa kolosap long God sapos hem i folem ol tijing blong hem, bitim eni narafala buk.”1
Ol tijing long Buk blong Momon oli ol komanmen blong God we oli stap insaed long hem. Sam oli ol komanmen we i kam stret long Sevya tru long ol profet blong Hem, blong talem long yumi wanem blong mekem mo wanem bae yumi kam. Buk blong Momon i givim long yumi eksampol blong Sevya blong mekem fet blong yumi i kam antap mo strong tingting blong obei long ol komanmen blong Hem mo folem Hem. Buk ia i fulap wetem doktrin blong Kraes blong i gaedem yumi. Hemia wan eksampol long 2 Nifae:
“[Jisas] i bin talem long ol pikinini blong ol man se: yufala i folem mi. From samting ia, ol brata blong mi we mi lavem tumas, bae yumi save folem Jisas sapos yumi no glad blong holem ol komanmen blong Papa?
Mo Papa i bin talem se: Sakem sin yufala, sakem sin yufala, mo kasem baptaes long nem blong Pikinini blong mi we mi Lavem Tumas” (2 Nifae 31:10–11).
Buk ia i mekem i klia se yumi mas kasem Tabu Spirit olsem wan baptaes blong faea blong helpem yumi blong stap long stret mo smol rod. Oli bin tijim yumi blong yumi mas prea oltaem long nem blong Kraes, no letem tingting blong yufala i foldaon, mo sapos yumi mekem, yumi gat promes ia: “From samting, yufala i mas wokbaot fored wetem strong bilif long Kraes, wetem wan stret mo klin hop, mo wan lav blong God mo blong evri man. From samting ia, sapos yufala i gohed strong, kakae gud long toktok blong Kraes, mo stap strong kasem en, luk, olsem ia nao Papa i talem: Bae yufala i kasem laef we i no save finis” (2 Nifae 31:20).
Buk blong Momon i mekem i klia long naesfala toktok blong King Benjamin wanem i minim blong gat wan lav blong God mo blong evri man. Taem laef blong yumi i jenis tru long paoa blong Atonmen mo tru fet mo fasin blong obei blong yumi long ol komanmen, bae yumi fulap wetem lav blong God (luk long Mosaea 4:1–12).
Buk blong Momon i givim long yumi tu strong tingting se yumi save kam klin moa long laef ia long wan fasin we bae yumi nomo gat tingting blong mekem nogud (luk long Mosaea 5:2). Hop ia i givim yumi strong tingting mo harem gud taem Setan i traem blong temtem yumi mo spolem strong tingting blong yumi long rod blong yumi.
Evri taem mi rid, nomata smol ples nomo long Buk blong Momon, mi filim testemoni blong mi i kam strong se buk ia i tru, se Jisas i Kraes, se yu save folem Hem i go hom, mo we yumi save tekem olgeta we yumi lavem i go hom wetem yumi. Long mi, buk ia i gud tumas bitim evri buk. Hem i tok blong God.
Mi prea se bae yumi mo olgeta we yumi lavem bae yumi dring bigwan mo evri dei long buk ia. Mi testifae long nem blong Jisas Kraes se hem i wan tru gaed.
© 2010 i kam long Intellectual Reserve, Inc. Oli holem evri raet. Oli printim long YSA Oli letem long Inglis: 6/09. Oli letem translesen: 6/09. Translesen blong First Presidency Message, September 2010. Bislama. 09369 852
Yusum Mesej Ia blong Tij
“Taem yumi yusum ol skripja mo ol toktok blong ol profet blong tedei olsem ol tul blong evri tijing blong yumi, yumi invaetem Spirit blong stap olsem witnes. Hemia i karem i kam long tijing blong yumi paoa blong God blong winim tingting blong ol man (luk long D&C 11:21” Teaching, No Greater Call [1999], 51). Tingting blong ridim ol haelaet we i stap long mesej blong Presiden Aering, wetem toktok blong Josef Smit abaot Buk blong Momon. Invaetem ol memba blong famle blong serem olsem wanem taem oli stap laef folem ol tijing we oli faenem insaed long Buk blong Momon i helpem olgeta blong kam kolosap long God.
“Taem olgeta we oli stap lan oli toktok raon long ol prinsipol we i stap long ol skripja, oli developem ol skil we oli nidim long ol skripja stadi blong olgetawan” (Teaching, No Greater Call, 54). Tingting blong ridim ol skripja we oli stap long mesej ia mo lukaotem, mo toktok raon long ol prinsipol we oli tijim.