Visiting Tijing Mesej, Septemba 2010

Wok blong Yumi blong Lukaotem Gud Jeneresen we I Stap Kam Antap

Stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yuwan.

Pikja

Relief Society seal

Fet • Famle • Rilif

I kam long ol skripja

Ol sam 22:6; Efesas 6:4; Inos 1:1; Alma 53:20–21; 56:47; 57:27

Sapos yumi no lukaotem gud ol jeneresen blong yumi we oli stap kam antap bae oli kam olsem olgeta we oli stap tokbaot olgeta long Mosaea 26. Plante long ol yut oli no bilivim ol kastom blong ol papa blong olgeta mo oli kam wan seperet pipol folem fet blong olgeta, mo stap olsem blong oltaem afta. Jeneresen blong yumi we i stap kam antap i save go olsem ia tu sapos oli andastanem pat blong olgeta insaed long plan blong Papa long Heven.

Wanem samting nao bae i holemtaet jeneresen we i stap kam antap blong oli stap sef? Insaed long Jos, yumi tijim ol prinsipol blong sevem laef, mo ol prisipol ia oli ol prinsipol blong famle, ol prinsipol ia we bae oli helpem jeneresen we i stap kam antap blong mekem wan famle, tijim famle ia, mo mekem rere ol famle ia blong kasem ol odinens mo ol kavenan—mo afta nekis jeneresen bae i tijim nekis jeneresen mo bae i gohed olsem ia nao.

Olsem ol papa mo mama, ol lida, mo ol memba blong Jos, yumi stap mekem rere jeneresen ia blong kasem ol blesing blong Abraham, long tempol. Hem i wok blong yumi blong yumi mekem i klia gud long evri ki poen blong doktrin we i stap long ofisol toktok blong famle. Blong stap olsem wan mama mo papa oli ol rol mo responsabiliti we i no save finis. I nomata man o woman, wanwan long yumi i mekem wok blong plan ia.

Yumi save tijim doktrin ia long eni ples. Yumi mas tokbaot mared mo famle wetem respek. Mo tru long eksampol blong yumi, jeneresen we i stap kam antap i save kasem bigfala hop mo andastaning i no tru long ol toktok nomo we yumi stap talem be tru long fasin we yumi filim mo soemaot spirit blong famle.

Juli B. Bek, Rilif Sosaeti jeneral presiden.

I Kamaot long Histri blong Yumi

Taem hem i givim toktok long ol sista long jeneral Rilif Sosaeti miting long 23 Septemba 1995 Presiden Godon B. Hinkli i talem: “Wol we yumi stap long hem, hem i wol blong hadtaem, blong ol bilif we i stap muvmuv olbaot. Ol laod voes oli trikim yumi blong mekem plante samting we i go agensem ol standet fasin we i stap longtaem finis i kam.”¹ Presiden Hinkli i bin gohed blong givimaot long ol sista, Jos, mo evri pipol long evri ples “Famle: Wan Ofisol Toktok I Go Long Wol.”

Ol yia afta long taem ia, oli bin transletem toktok blong profet ia i go long plante lanwis mo oli serem long ol lida blong wol. Toktok ia i askem ol sitisen mo ol lida blong gavman “blong tokbaot moa mo leftemap tingting ol pipol blong mas mekem olgeta samting ia we i blong holem taet mo mekem famle i kam strong moa, blong famle i kam wan grup we i stamba blong sosaeti.”²

Ofisol toktok ia i bin kam fandesen blong ol bilif blong ol Lata-dei Sent abaot famle, wan toktok we yumi save holem taet mo save se sapos yumi laef folem ol tijing blong hem, yumi stap mekem famle mo home blong yumi i kam strong.

© 2010 i kam long Intellectual Reserve, Inc. Oli holem evri raet. Oli printim long YSA Oli letem long Inglis: 6/09. Oli letem translesen: 6/09. Translesen blong Visiting Teaching Message, September 2010. Bislama. 09369 852

Wanem Mi Save Mekem?

Olsem wanem bae mi save helpem ol sista blong mi blong oli yusum “Famle: Wan Ofisol Toktok I Go Long Wol” blong lukaotem gud Jeneresen we i stap kam antap? Yu save serem wan kopi blong ofisol toktok ia mo helpem ol sista blong yu blong luksave mo makem ol eria we i tijim gud ol ki doktrin.
Olsem wanem mi save helpem jeneresen we i stap kam antap? Yu maet wantem blong go aot mo visitim ol memba long wod blong yu, branj, famle, o komiuniti we oli save kasem help blong yu tru long visit mo lav blong yu.