Lamharon
Ang Kaugalingon Ko nga Libro ni Mormon
Sang Agosto 2005, sang si Pangulong Gordon B. Hinckley (1910–2008) naghangkat sa mga miyembro sang simbahan sa pagbasa sang Libro ni Mormon antes matapos ang tuig, nagpromisa ako sa akon kaugalingon nga basahon ko ang bug-os nga libro. Pamilyar ako sa mga estorya sa Libro ni Mormon apang wala ko gid ini maubos basa. Karon buot ko gid nga tumanon ang akon promisa.
Gintudloan ako sa pagpangabuhi sang balaan nga mga kasulatan kag sa pagkabig sang mga ini nga akon kaugalingon [nga mga estorya]. Gani samtang nagabasa ako, ginasulat ko sa mga kilid sang mga pamihak sang libro ang sa hunahuna ko nga amo ang pinakamayor nga ideya sang dinalan. Ginalinyahan ko man ang ginsulit nga mga pulong kag mga tinaga agud mapakita ang pagkaimportante.
Ginasulat ko ang akon ngalan sa dason sang mga ngalan sa balaan nga mga kasulatan agud magbulig sa akon sa pagdumdom nga ang pulong sang Dios nga ginhambal sa iban nga mga tawo amo man ang pulong nga ginhambal sa akon. Halimbawa, sa 2 Nefi 2:28 ginsulat ko ang akon ngalan: “Kag karon, [Hillary], luyag ko nga magtulok ka sa dako nga Manugpatunga, kag magpamati sa iya dalagko nga mga kasuguan.” Sa sigesige ko nga paggamit sang Libro ni Mormon sa akon kaugalingon, mas labi ako nga nagakalangkag sa pagbasa sini adlaw-adlaw.
Sa akon adlaw-adlaw nga pagbasa, ang akon mga pangamuyo nangin seryoso kag personal. Nahimo ko man ang magtutok sa akon mga klase kag magsunod sa mga pagpabatyag sang Espiritu sa pagpakig-abyan sa iban. Sa katapusan nga gab-i sang tuig, natapos ko ang Libro ni Mormon.
Kag sadto ko nahangpan ang kaimportante sang pagbasa sang bug-os nga Libro ni Mormon, kaupod ang iban nga balaan nga mga kasulatan, kag luyag ko ini nga himuon sa madamo pa nga beses sa akon kabuhi.