Mensahe sang Unang Panguluhan, Septyembre 2010
Ang Libro ni Mormon bilang isa ka Personal nga Giya
Tanan kita nagabatyag, sa aton pinakaespirituhanon nga mga tinion, sang isa ka handum sa pagpauli agud magkabuhi kaupod ang Dios. Ginhatagan niya kita sang dulot sang Iya Pinalangga nga Anak bilang aton Manluluwas nga agud maghatag sang alagyan kag agud magtudlo sa aton kon paano sundon ini. Ginhatagan niya kita sang mga propeta agud ipakita ang alagyan. Ang Propetang Joseph Smith ginpadasig sa paglubad sang mga sinulat sang mga propeta nga amo ang Libro ni Mormon. Ini amo ang aton pat-od nga giya sa dalanon pabalik sa Dios.
Si Joseph Smith nagtugda parte sa sinang bilidhon nga libro, “Ginsugiran ko ang mga kauturan nga ang Libro ni Mormon amo ang labing husto sa ano man nga libro sa duta, kag amo ang bato nga pamag-ang sang aton relihiyon, kag ang isa ka tawo magmangin mas malapit sa Dios paagi sa pagsunod sang mga pagsulundan sini, sangsa diin man nga libro.”1
Ang mga pagsulundan sang Libro ni Mormon amo ang mga kasuguan sang Dios nga aton makit-an diri. Ang iban direkta nga mga sugo gikan sa Manluluwas paagi sa Iya mga propeta parte sa kon ano ang aton dapat himuon kag kon ano kita dapat nga mangin. Ang Libro ni Mormon nagahatag sa aton sang ehemplo sang Manluluwas agud magdugang ang aton pagtuo kag determinasyon sa pagtuman sang Iya sugo nga sundon Sia. Ang Libro napuno sang doktrina ni Cristo agud maggiya sa aton. Yari ang halimbawa gikan sa 2 Nefi:
“Si [Jesus] nagsiling sa mga anak sang tawo: Sunod kamo sa akon. Gani, pinalangga kong mga kauturan, makasunod bala kita kay Jesus luwas kon sugot kita sa pagtuman sang mga kasuguan sang Amay?
“Kag ang Amay nagsiling: Maghinulsol kamo, maghinulsol kamo, kag magpabunyag sa ngalan sang akon Pinalangga nga Anak” (2 Nefi 31:10–11).
Ang libro nagapaathag nga dapat kita magbaton sang Balaan nga Espiritu bilang bunyag sang kalayo sa pagbulig sa aton nga magpabilin sa makitid kag masipot nga banas. Ginatudluan kita nga magpangamuyo pirme sa ngalan ni Cristo, nga wala nagapaluya, kag kon himuon naton, may yara kita sining promisa: “Gani, kinahanglan gid nga magdutdot kamo pasulong upod ang isa ka kalig-on kay Cristo, nga may isa ka himpit nga kasanagan sang paglaum, kag isa ka gugma sang Dios kag sang tanan nga mga tawo. Gani, kon magdutdot kamo pasulong, nga nagapaayaw sa pulong ni Cristo, kag magapadayon tubtob sa katapusan, yari karon, amo ini ang ginasiling sang Amay: Inyo maangkon ang kabuhi nga wala’y katapusan” (2 Nefi 31:20).
Ang Libro ni Mormon nagapaathag sa makahalawhaw nga sermon ni Haring Benjamin kon ano ang buot silingon sang mag-angkon sang gugma sang Dios kag sang tanan nga mga tawo. Kon ang mga duna sa aton pagkatawo pagabag-uhon paagi sa gahum sang Pagpasag-uli [Atonement] kag paagi sa aton matinuohon nga pagtuman sang mga kasuguan, mapuno kita sang gugma sang Dios (tan-awa sa Mosias 4:1–12).
Ang Libro ni Mormon nagahatag man sa aton sing kasiguruhan nga sarang kita mangin matinlo kaayo nga indi na kita makaangkon sing huyog sa paghimo sing malain (tan-awa sa Mosias 5:2). Ini nga handum nagahatag sa aton sang kaisog kag kaumpawan samtang si Satanas nagatinguha sa pagsulay kag pagpaluya sa aton sa dalanon.
Sa tagsa ka tion nga nagabasa ako sang bisan pila lang ka dinalan sa Libro ni Mormon, nabatyagan ko nga ang akon testimonya nagabaskog nga ang libro matuod, nga si Jesus amo ang Cristo, nga kita sarang makasunod sa Iya pabalik sa Dios, kag nga sarang naton dal-on ang aton mga pinalangga upod sa aton pabalik sa Dios. Para sa akon amo ini ang pinakamatahum sa tanan nga mga libro. Ini, pulong sang Dios.
Nagaampo ako nga kita kag ang tanan nga aton mga pinalangga magabasa sini sing maayo sa matag-adlaw. Nagasaksi ako sa ngalan ni Jesucristo nga ini isa ka matuodtuod nga giya.
© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang First Presidency Message, September 2010. Hiligaynon. 09369 861
Pagtudlo gikan sa Sining Mensahe
“Kon ginagamit naton ang balaan nga mga kasulatan kag ang mga pulong sang mga propeta sa ulihing mga adlaw bilang basehan sang tanan naton nga mga pagpanudlo, ginaagda naton ang Espiritu nga magsaksi. Nagadala ini sa aton pagpanudlo ‘sang gahum sang Dios agud magpati ang tawo’ (tan-awa sa D&C 11:12)” (Teaching, No Greater Call [1999], 51). Hunahunaa ang pagbasa sang mga pinakaimportante nga bahin gikan sa mensahe ni Pangulong Eyring, lakip na ang ginhambal ni Joseph Smith parte sa Libro ni Mormon. Agdaha ang mga katapo sang panimalay sa pagpaambit kon paano ang pagpangabuhi sang mga pinanudlo nga makita sa Libro ni Mormon nagabulig sa ila nga maglapit pa gid sa Dios.
“Kon ang mga nagatuluon nagahambalanay parte sa mga prinsipyo gikan sa balaan nga mga kasulatan, nagapalambo sila sang mga kabatid nga ila kinahanglanon para sa ila personal nga pagtuon sang balaan nga mga kasulatan” (Teaching, No Greater Call, 54). Hunahunaa ang pagbasa sang balaan nga mga kasulatan nga ginatumod sa sini nga mensahe kag sa pagpangita kag pagpakighambalanay parte sa mga prinsipyo nga ila ginatudlo.