Mensahe sa Visiting Teaching, Septyembre 2010

Ang Aton Responsibilidad sa Pagbatiti sang Ulihing Tubo

Tun-i ining materyales kag, sa nagakaigo, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo mismo kabuhi.

Litrato

Relief Society seal

Pagtuo • Panimalay • Bulig

Gikan sa Balaan nga mga Kasulatan

Mga Hulubaton 22:6; Mga Taga-Efeso 6:4; Enos 1:1; Alma 53:20–21; 56:47; 57:27

Kon wala sing pagbatiti, ang aton ulihing tubo mahimo nga yara sa peligro nga mangin kaangay sa ginlaragway sa Mosias 26. Madamo sa mga lamharon ang wala nagpati sa mga tradisyon sang ila mga katigulangan kag nangin isa ka napain nga katawhan suno sa ila pagtuo, nga nagapabilin nga subong sini halin sadto. Ang aton ulihing tubo mahimo man nga magtalang kon wala sila makahangop sang ila bahin sa plano sang Amay nga Langitnon.

Gani ano inang magatipig sa ulihing tubo nga luwas sa peligro? Sa Simbahan, nagatudlo kita sang nagaluwas nga mga prinsipyo, kag yadtong mga prinsipyo amo ang mga prinsipyo sang panimalay, ang mga prinsipyo nga magabulig sa ulihing tubo sa pagpasad sang panimalay, sa pagtudlo sinang panimalay, kag sa paghanda sinang panimalay para sa mga ordinansa kag mga kasugtanan—kag dayon ang madason nga henerasyon amo ang magatudlo kag padayon nga mangin kasubong.

Bilang mga ginikanan, mga lider, kag mga miyembro sang Simbahan, ginahanda naton ining henerasyon para sa mga pagpakamaayo ni Abraham, para sa templo. May responsibilidad kita nga mangin maathag kaayo parte sa mayor nga mga punto sang doktrina nga makita sa proklamasyon parte sa panimalay. Ang pagkailoy kag pagkaamay mga katungdanan kag mga responsibilidad nga wala’y katapusan. Ang tagsa sa aton nagadala sang responsibilidad sang lalaki ukon babayi suno sa plano.

Sarang naton matudlo ining doktrina sa bisan ano man nga kahimtangan. Kinahanglan kita maghambal sing may pagrespeto parte sa kasal kag panimalay. Kag gikan sa aton ehemplo, ang ulihing tubo sarang makaangkon sang dako nga paglaum kag paghangop— indi lamang gikan sa mga pulong nga aton ginapanghambal kundi sa paagi nga aton ginabatyag kag ginapabutyag ang maayong mga prinsipyo parte sa panimalay.

Julie B. Beck, pangkabilugan nga pangulo sang Relief Society.

Gikan sa Aton Kasaysayan

Sa pagpamulongpulong sa mga kauturan nga babayi sa pang-kabilugan nga miting sang Relief Society sang Septyembre 23, 1995, si Pangulong Gordon B. Hinckley nagsiling: “Ang kalibutan kon sa diin yara kita, isa ka kalibutan sang kagamo, sang nagabag-o-bag-o nga mga prinsipyo. Mabaskog nga mga tingug ang nagapangganyat sa aton sa paghimo sang mga butang nga nagatalikod sa sulukdan sang pamatasan.”¹ Dayon si Pangulong Hinckley nagpadayon sa pagpresentar sa mga sister, sa Simbahan, kag sang ulihi sa mga tawo sa tanan nga lugar sang “Ang Panimalay: Isa ka Proklamasyon sa Kalibutan.”

Sa nagsunod nga tinuig ining mapanagnaon nga dokumento ginlubad na sa madamo nga mga lengguahe kag ginpanagtag sa mga lideres sang kalibutan. Nagapanawagan ini sa mga pumuluyo kag mga opisyales sang gobyerno “sa pagsulong sadtong mga tikang nga gintuyo sa pagtipig kag pagpabakod sang panimalay bilang tig-una nga yunit sang sosyedad.”²

Ang proklamasyon nangin basehan para sa mga ginapatihan sang mga Santos sa Ulihing mga Adlaw parte sa panimalay, isa ka deklarasyon nga aton sarang mahawiran sing hugot kag mahibaloan nga paagi sa pagpangabuhi sa iya sini nga mga pagsulundan, aton ginapabaskog ang aton mga panimalay kag mga puluy-an.

© 2010 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/09. Petsa sang pagtugot sa paglubad: 6/09. Linubad sang Visiting Teaching Message, September 2010. Hiligaynon. 09369 861

Ano ang Sarang Ko Mahimo?

Paano ako makabulig sa akon mga sister nga gamiton ang “Ang Panimalay: Isa ka Proklamasyon sa Kalibutan” sa pagbatiti sang ulihing tubo? Mahimo mo nga ipaambit ang isa ka kopya sang proklamasyon kag buligan ang inyo mga sister nga kilalahon kag markahan ang mga dinalan nga nagatudlo sing labing maayo sang importante nga mga doktrina.
Paano ko bala batition ang ulihing tubo? Mahimo ka magdab-ot sa mga miyembro sang imo ward, branch, panimalay, ukon komunidad nga sarang makabenepisyo gikan sa imo atensyon kag pagpalangga.