Poraus seni ewe Aewin Presetensi, October 2010
Feiochun ewe Tempel
Ewe tempel a ngenikich popun non manuach. A awora kinamwe non ngunuch—nge esap ewe kinamwe seni aramas nge ewe kinamwe ewe Noun Kot a pwon ngenikich nupwen i a era, “Kinamwe epwe nom reom, ai kinamwe ua ngonuk.”
Non ewe tempel sia tongeni arap ngeni ewe Samon
Ese pwan wor eu neni won unusen fonufan me nukun ewe tempel ua arap ngeni ewe Samon usun nupwen ua nom non An we tempel mi pin. Ne mochomochono eu kapasen mirit:
Ifa toauen nang?
Ese kon toau.
Non an Kot tempel,
A nom ikeia.
Ewe Samon a apasa:
“Ousap achocho ngeni ami oupwe pisekisekino won ei fonufan, ikewe ekkewe manchonap me parang ra tongeni atai o ekkewe chon sona mi tongeni atai o sonani:
“Nge oupwe achocho ngeni ami oupwe piskisekino non nang, ikewe ekewe manchonap me parang rese tongeni atai o ekkewe chon sona rese tongeni atai o sonani:
“Pun fansoun meinisin netipemi epwe chok nonnom ikewe pisekimi mi auchea a nonnom ie.”1
Ren ekkewe chon ewe Mwichefenin Jises Kraist ren Aramas mi Pin non Fansoun Soponon, ewe tempel mi fokkun pin nap seni mettoch meinisin won fonufan. Ina ewe imwen ewe Samon, pwan usun met mi mak nukun ewe tempel, ewe tempel mi “pinino ngeni ewe Samon.”
Ewe tempel mi ekietakich me anisikich
Non ewe tempel, sia kaeo an Kot we kokkot mi auchea. Non ewe tempel a fis ekkewe pwon mi foch. Ewe tempel mi ekietakich, anisikich, a uta pwe aramas meinisin mi tongeni kuna, a pwan emwenikich ngeni ewe mun Kot. Ina ewe iwmen Kot. Mettoch meinisin mi fis non ewe tempel mi och me murinno.
Ewe tempel a nom fan itan ekkewe famini, eu nifang mi watte non manauch. Ewe Samon a fokkun fat ngenikich ekkewe sam, a erenikich pwe wisach non ewe famini pwe sipwe tongei ponuach ren unusen netipach me tumunu ir me nouch kewe. A pwan era pwe ewe angang mi kon auchea ngeni ewe sam me ewe in mi fis non imwach kewe, me imwach kewe mi tongeni usun nang, mi napano ika sia fori ewe riri fengen non ewe imwen Kot.
Elder Matther Cowley, i emon chon ewe Mwichen Engon me Ruemon Aposel i a fen mano, a apasa usun met a fis non eu Ammon ren emon semenap mi komoch poun noun noun we nengin non an ranin uputiw—rese feino ngeni ewe nenien man ika ewe nenien kacheto nge ra feino ngeni ewe nenien ewe tempel. Ren mwumwuta seni ewe chon tumunu ewe fonu, ir me ruemon ra fetan ngeni ekkewe asamen ewe tempel. I a pesei ngeni noun noun we negnin pwe i epwe attapa pekin ewe tempel mwirin attapa ewe asam mi kon watte. Ren kapasen mosonoson i apasa ngeni ewe nengin, “Chememeni ei ran pun ka attapa ewe tempel. Fan eu ran kopwe tonong non.” Ese nifang ngeni ewe kukkun semerit okasi ika unuman ice cream nge a ngeni i eu fansoun mi napano me eu fansoun epwe tongeni chememeni—pwe epwe asomonu ewe imwen ewe Samon. I a attapa ewe tempel, me a mefi murino non netipan seni ewe tempel.
Ewe tempel a awora kinamwe non ngunuch kewe
Ren ach mochen ne feino ngeni ewe tempel me tongei ewe tempel, manauach epwe uren nuku. Ren ach feino ngeni ewe imw mi pin, ren ach achechemen ekkewe pwon sia for, sipwe tongeni pworacho osukusuk meinisin me pworacho ekkewe sossot. Ewe tempel a ngenikich popun non manauach. A awora kinamwe non ngunuch—nge esap ewe kinamwe seni aramas nge ewe kinamwe ewe Noun Kot a pwon ngenikish nupwen i a era, “Kinamwe epwe nom reom, ai kinamwe ua ngonuk:esap usun chon fonufan ai ngonuk. Ousap noninen are tipemwaramwar; ousap pwan nuokus.”2
A watte ewe nuku me nein ekkewe Aramas mi Pin non Fansoun Soponon. Ewe Samon a ngenikich osukosuk nge pi ika sipwe apwonueta an kewe annuk, ika sipwe tapweno mwirin Jises seni Nazareth, ika sipwe tongei ewe Samon ren unusen netipach,tufich,tupwach, me ach pochukun, me tongei aramas unukich usun sia tongei pwisin kich.3
Ua nuku non ewe wokisin “Kopwe apinukunuk ewe Samon ren unusen netipom; Kosap apinukunuk met ka ekieki pwe ka sinei. Kopwe chechemeni ewe Samon non mettoch meinisin ka fori, iwe epwe pwar ngonuk ewe an mi pung.”4
Ina usun en nom; iwe ina usun epwene fis Ika sia fori wisach me nukunuk non ewe Samon, sipwe feino ngeni An kewe tempel, nge sisap chok fori pwisin ach angang, nge sipwe pwan fori ewe angang fan itan pwan ekkoch aramas. Sipwe fotupukutiw me ren ekkewe nenien asor mi pin pwe sipwe tongeni fori ekkewe riri fengen fan itan ekkewe mi fen mano pwe mwan me fefin me semerit repwe tongeni nom fengen fochofoch. Ekkewe at me nengin mi tupwen ika ir mi chok 12 ier ra tongeni feino fori papatais fan itan ekkewe mi fen mano me rese mo papatais. Iei met Semach won Nang epwe mochen me rei pwan me reom.
Eu mananaman a fis
Ekkoch ierin nom, emon semanap mi tekison mi uren nuku, Pwi Percy K. Fetzer, a angei eu kokko pwe epwe ngeni emon chon ewe Mwichefen mi nom non eu neni mi ngau eu feiochun semanap.
Pwi Fetzer a feino ngeni ewe fonu itan Poland non ekkewe ran mi kiroch. Ewe fonu mi apungano, ese wor aramas mi mwut ne su. Brother Fetzer a churi ekkewe chon mwichefen me non Germany minne ra niap me ikkewe nupwen a siwin tettening ewe fonu mwirin ewe Maunen Fonufan II me ewe fonu a winiti eu kinikinin Poland.
Ach we sou emwen nein ekkewe Sounengin Germany mi Brother Erick P. Konietz, minne a nonnom ikkewe ren punuan we me nour kewe semirit. Brother Fetzer a ngeni Brother me Sister Konietz me nour kewe mi watte ar feiouchun semanap.
Nupwen Brother Fetzer a niwin ngeni Merika, i a kokoriei ne tingorei ika i mi tongeni feito churiei. Nupwen i a momot non ewe rum rei, i a popueta ne kechiu. I a apasa, “Brother Monson, nupwen ua iseta pei kei won mokuren chon ewe Konietz famini, ua fori pwon rer nge ekkewe pwon ese tongeni apwonueta. Ua pwon ngeni Brother me Sister Konietz pwe repwe tongeni niwinsefan ngeni fonuer we Germany, me resap niapeni seni ekkewe maunen ekkewe fonu me repwe tongeni ririfengen pwe eu famini me non ewe imwen ewe Samon. Ua pwon ngeni nour we at pwe i epwe feino won eu misen, pwan ua pwon ngeni nour we nengin pwe i epwe pupunu non an Kot we tempel mi pin. En me ngang mi sinei pwe pokitan ewe fonu ese suk, ir resap tongeni angei unusen ekkewe feioch. Met ua fori?”
Ua apasa, “Brother Fetzer, Ua sineiochu en iwe ua sinei pwe ka chok fori met Semach won Nang mi mochen kopwe fori.” Am me ruemon mi fotupukutiw nepekin ewe chapen iwe aua ereni Semach won Nang usun netipach, aua apasa pwe mi wor pwon mi fis ngeni eu famini mi murino usun an Kot we tempel iwe iei mi wor feioch rese tongeni angei. I chok mi tongeni fori ewe manaman mi namwot ngenikem.
Ewe manaman mi fis. Eu etipeu mi fis nefinen ewe nouwisen Poland me ren nouwisen Federal Republic seni Germany, mi mut ngeni chon Germany mi niap pwe repwe tongeni mokut ngeni West Germany. Brother me Sister Konietz me nour kewe ra feino ngeni West Germany, iwe Brother Konietz a angei ewe wisen pisop non ar we wart.
Unusen ewe faminien Konietz ra feino ngeni ewe tempel mi pin non Switzerland. Iei ewe presetenin ewe tempel mi etiwa ir non ufan me an rousers mi pwech? Ina ewe Percy Fetzer—ewe semanap mi ngenir ewe pwon. Iei, non wisen ewe presitenen ewe Bern Switzerland Tempel, i a etiwa ir ngeni imwen ewe Samon, a apwonueta ewe pwon, i a fori ewe riri fengen nefinen ewe mwan me fefin pwan nefinen ekkewe semerit me ren ewe sam me ewe in.
Ewe fopun a pupunu non imwen ewe Samon. Ewe at a angei an we kokoren misin me a apwonueta an we misin.
“Sipwe kunok non ewe tempel!”
Ren ekkoch aramas ewe tempel mi chok karap ngeni imwach. Ren ekkoch, mi wor ewe sat pwan fitu main repwe feino me mwen ra tonong non an Kot we tempel.
Fitu ierin nom, me mwen a wes ewe tempel non South Africa, nupwen ua fiti ewe mwichenapen tischrik non Salisbury, Rhodesia, ua churi ewe presetenin ewe tischrik, Reginald J. Nield. I me ponuan me noun kewe nengin ra churiei non ewe imwen fan. Re awewe ngeniei pwe ra isoni ar moni pun ra fen popueta fan itan ewe ran repwe tongeni sai ngeni ewe an ewe Samon we tempel. Nge ewe tempel mi kon towau.
Nesoponon ewe mwich nefinach, noun kewe fomon nengin mi kapas eis ngeniei usun ewe tempel: “Ifa napanapen ewe tempel? Aua chok kuna echo sasing.” “Met aupwe mefi nupwen aua tonong non ewe tempel?” “Met aupwene chechemeni seni?” Ren ukukkun eu awa ua tufich ne fos ren ekkewe fomon nengin usun imwen ewe Samon. Nupwen ua feino ngeni ewe ermaik, re kapong ngeniei, nour we kukkun nengin a apasa, “Aupwap kunok non ewe tempel!”
Non eu ier mwirin Ngang mi tufich ne etiwa ewe Nield famini non ewe Salt Lake Tempel. Non ewe rumen ariri fengen Ngang ua tongeni fori ewe efeiochun achufengeni ren fanosun ese much, ren Brother me Sister Nield. Ekkewe asam mi sukano, nour kewe nengin mi fokkun ningoch, mi ufouf non ufer mi pwech, iwe ra tonong non ewe rumw. Ra turufi iner, pwan semer. Ra kechiu seni meser, kinisou mi nom non netiper. Aua karap ngeni nang. Iwe emon me emon mi tongeni apasa, “Iei kich eu famini fochofoch.”
Iei ewe watte feioch mi tori ekkewe mi feito ngeni ewe tempel. Amo ita kich sipwe tupwen non manauch, ren pouch kewe mi nimoch me netipach mi unusoch, pwe sia tongeni angei ekkewe memef seni ewe tempel non manuach pwan non manuen ach kewe famini.
Ifa towauen nang? Ua pwarata pwe non ekkena tempel mi pin ese kon towau—non ina neni mi pin nang me fonufan mi chufengen pwan Semach won Nang mi ngeni Noun kewe semirit efeiochun kewe mi nap.
© 2010 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/09. Kapungunon chiakun: 6/09. Chiakun ewe First Presidency Message, October 2010. Chuukese. 09370 901