Poraus seni Fefin Chon Amwa, October 2010
Ewe Tempel mi Pin
Non ekkewe tempel, chon ewe Mwichefen mi monata mi tongeni fiti non ekkewe feioch mi wesen ning nap seni met mi fen pwar ngeni aramas meinisin.
Non ewe tempel sia tongeni fori ekkewe feiochun ngaseno mi wesen ning
Mi wor chommong popun emon epwe mochen feino ngeni ewe tempel. Napanapan nukun mi anisikich ne weweiti ren an popunen ngun. Ei mi fat nupwen sia nom non ewe tempel. Asan seni ewe asamen ewe tempel mi a mak ekkewe kapas “Pinino ngeni ewe Samon.” Nupwen ka tonong non eu tempel mi fen feioch, ka nom non imwen ewe Samon.
Non ekkewe tempel, chon ewe Mwichefen mi monata mi tongeni fiti non ekkewe feioch mi wesen ning nap seni met mi fen pwar ngeni aramas meinisin. Mi wor mettoch mi fis mi pin, emon mi tongeni tunu me angei kepit me kaeo me angei feiochun me riri foch. Nupwen sia fen angei ekkewe feioch fan itan pwisin kich, sia tongeni fori fan itan ekkewe mi fen mano nge rese mo tufich ne fori. Non ewe tempel mettoch mi auchea mi fis fan itan ekkewe mi manau pwan ekkewe mi ma.
Ekkewe feiochun me afisin ewe tempel mi mecheres, mi ning, me pin
Ren ach akaneani ekkewe pukfel mi pwar pwe ewe Samon ese ereni mettoch meinisin ngeni aramas meinisin. Mi wor mettoch repwe fori me mwen repwe tongeni angei ewe mirit mi pin. Ekkewe afisin tempel mi nom non ei kinikin.
Sise kapas usun met a fis me non ewe tempel nupwen sia nom nukun ekkewe tempel. Esap ewe popun pwe weweitin met mi fis non ewe tempel epwe chok nom ren fitu aramas me ekkewe nusun resap kaeo usun ekkewe afisin ewe tempel. Mi fokkun sokkono seni ina ekiek. Ren unusen ach pochokun sia pesei ngeni aramas meinisin pwe repwe monata ne tori ewe tempel. Ekkewe ir mi fen feino ngeni ewe tempel mi fen kaeo ei popun: Non ekkoch ran aramas meinisin mi manau pwan aramas meinisin mi fen mano repwe tufich ne rongorong ewe kapas allim pwan ir repwe tongeni etiwa ika amam met ewe tempel mi awora. Ika ra amam non ei fansoun, ewe amam epwe feito seni emon me emon.
Ekkewe efeiochun me afisin ewe tempel m mecheres. Ir mi ning. Ir mi pin. Ra nom ren pwisin emon pwe resap nom ren ekkewe rese mo monata. Mochen ne sinei ese wewe ngeni monata. Ennetin mochen sinei ese wewe ngeni monata. Ren ach ammonata fan itan ekkewe feiochun mi namwot sipwe fori ekkei kinikin: nuku, aier, papatais, epinano ewe Ngun mi Fel, nimenimoch, weweiti me sufon usun emon wasona mi feino ngeni imwen ewe Samon.
Ekkewe mi nimoch mi tongeni tonong non ewe tempel
Meinisin mi nimoch me monata non mettoch meinisin mi tongeni tonong non ewe tempel, non na fansoun ra tongeni angei ekkewe feioch mi pin.
Nupwen ka mefi auchean ekkewe efeiochun ewe tempel pwan ukkukun pininon ren met a fis me non ewe tempel, kopwe mang ne kapas eis usun weiresin ach angei mutata seni ewe Samon ne tonong non ewe tempel mi pin.
Mi namwot epwe nom reom ewe taropwen mutata ne tonong non ewe tempel. Ekkewe nouwis non ewe Mwichefen repwe fen makketiw iter won ewe taropwe. Ekkewe mi nimoch ir repwe chok feino ngeni ewe tempel. Wisen noum we pisop ika presetenin ewe pranch pwe epwe kapas eis ngonuk usun om nimenimoch me mwen kopwe tongeni angei feiochun ewe tempel. Ei interfiu mi auchea, pun ina eu fansoun ka tongeni pwisin ekieki won napanapen manauom ren emon chon angangen ewe Samon. Ika mi wor mettoch mi ngau non manauom, ewe pisop mi tongeni anisuk ne wesino ren. Ren ei sokkun napanap, ka tongeni apasata ika angei aninis ne animenimochu manauom pwe kopwe tongeni tonong non ewe tempel ren mwumwuta seni ewe Samon.
Ewe interfiu fan itan ewe taropwen mwumwuta mi nom nefinen ewe pisop me ewechonewe Mwichefen. Ina ewe fansoun ewe member epwe ponu kapas eis usun pwisin nikinikin, nimenimoch, me tipeu ren ewe Mwichefen me an kewe nouwis. Ewe emon epwe apasa pwe I mi nimenimoch pwan mi apwonueta ewe Kapasen Emirit, mi fori asoren eu ne engon, mi manaueni maneun emon non ewe Mwichefen, pwan ese tipeu ika fiti ekkewe mwich mi u ngeni ewe Mwichefen. Ewe pisop mi fen kaeo pwe i esap pwar met mi fis non ekkena interfiue ren pwan emon politen mi wesen auchea.
Ponu mi pung ren ekkewe kapas eis seni ewe pisop napengeni epwe pwar an emon nimenimoch pwe epwe tongeni angei ewe taropwen mwumwuta ne tonong non ewe tempel. Ika ewe emon ese apwonueta ekkewe annuk pwan ika mi wor mettoch mi ngau non manauan, mi namwot pwe repwe ennetin aier me mwen repwe angei echo taropwen mwumwuta.
Mwirin ewe mwich ren ewe pisop, ewe presetenin steik ewpe pwan churi ewe emon me mwen kopwe angei ekkewe feiochun ewe tempel.
Ewe tempel mi aitikich ren awewe
Me mwen om akkeuin fansoun ne tonong non ewe tempel, pwan miwrin fan chommong, epwe anisuk ika ka sinei pwe napanapen kaeo non ewe tempel mi fis ren awewe. Ewe Samon, ewe Masta Sense, mi aiti fan chommong non ei napanap.
Ewe tempel mi eu sukun mi nap. Eu imwen kaeo. Non ekkwe tempel mi wor ewe memef mi murino pwe aramas mi tongeni aitikich won mettochun ngun mi anonon. Elder John A. Widtsoe emon non ewe Mwichen Engon me Ruemon Aposel mi fen mano nge i emon presetenin eu sukkun pwan i emon chon kaeo mi kon tipachem. I mi sufoniti ewe angangen ewe tempel iwe fan eu i mi apasa:
“Ekkewe efeiochun ewe tempel mi aitikich usun unusen ewe kokkoten manau ese much, pwan ekkewe mettoch mi wieres sipwe weweiti, usun met sia fen rong me ren nouwisen ewe Mwichefen. Ese wor angang mi weires pwe ekkewe mettochun ewe tempel epwe pwan aitikich usun ewe kokkoten manua ese much. Ewe weweiti mi nap seni ach angei feiochun mi eu popun pwe sia sinei mi ennet met mi fis non ewe tempel. Iwe, kaeo mi nap usun ewe kokkoten ewe kapas allim, ina eu popun pwe angangen ewe tempel mi unusen auchea ne achema ngenikich usun napanapen ewe Kapas Allim” (“Temple Worship,” Utah Genealogical and Historical Magazine, Apr. 1921, 58).
Ika ka feino ngeni ewe tempel me chechemeni pwe kaeo mi feito seni ekkewe awewe non, kete tongeni feino nge kese watteno om sinei, mefi pwe ka arap ngeni Kot, pwan om weweiti usun pekin ngun epwe napano. Ewe kokkoten aiti mi murino. Mi pwarata seni Kot. Ewe Samon pwisin, ewe Masta Sense, mi aiti noun kewe chon kaeo ren kapasen monomon—eu tetenin kapas ne awewe usun ekkoch mettoch epwe weires repwe weweiti.
Ewe tempel pwisin a winiti eu awewe. Ika ka fen kuna eu tempel nupwen a pwinino, mi tin, ka sinei pwe mi fokkun amwarar. Ewe imwen ewe Samon, nonnom non saram, nupwen mi kiroch, eu awewe usun pochokunen me pwaratan ewe kapas allimen Jises Kraist mi nom non eu fonufan mi uren rochopwak.
Nupwen ka tonong non ewe tempel, kopwe siwini ufoum kewe ngeni ufouf mi pwech fan itan ewe tempel. Ei siwini mi fis non eu rumen asiwini, emon me emon mi angei eu neni ne isoni pwan eu nenien asiwini. Non ewe tempel mi auchea ewe popunen ufoufoch. Nupwen ka wanong ufoum kewe non ewe nenien isoni, ka pwan poutano om kewe osukusuk me weires non ina neni. Nupwen ka tou seni ewe nenien asiwini non ufoum mi pwech, ka mefi anouno chok ren emon me emon aramas mi pwan ufouf usum.
Pupunu non ewe tempel ina ewe feioch mi nap non ewe tempel
Ami mi mochen oupwe pupunu non ewe tempel oupwe mochen sinei met epwe fis. Sise apasa ekkewe kapasen ariri (pupunu) me nukun ewe tempel, nge sipwe tongeni awewe pwe ewe rumen ariri mi wesewesen ning fan itan an popun, mi mosonoson non ngun, pwan mi pin ren ewe angang mi fis non.
Me mwen ekkewe ruemon chon pupunu repwe feino ngeni ewe nenien asor fan itan ewe riri fengen, ewe chon angang epwe ngeni ekkewe chon pupunu ekkis mirit. Ekkei mettoch mi chok ekkoch mettoch ekkewe ruemon chon pupunu repwe rong non na fansoun.
“Ikenai ami ranin apupunu. Ami mi nom non apwapwan ami apupunu. Ra aueta ekkewe tempel fan itan ei popun. Sise nom non ewe fonufan. Ekkewe mettochun ewe fonufan ese nifinifin ikei pwan resap emwenikich ren met sia fori ikei. Sia tou seni ewe fonufan pwe sipwe tonong non an ewe Samon we tempel. Ikenai ewe ran mi wesen auchea non manauch.
“Ka uputiw, feitiw won ei fonufan, ren semom me inom mi monata inisum fan itan ngunum. Emon me emon ami mi fen papatais. Papatais, eu efeioch mi pin, mi awewe pwe sia nimoch, a awewe usun ewe mano me ewe manuasefan, a awewe usun sia nom non eu manau minefo. Mi ekieki usun aier me omusomus seni ach kewe tipis. Ewe sakramen An ewe Samon Saingon Mongo mi eu asofosefannin ekkewe pwonen papatais, ika sipwe manaueni fan itan sipwe tongeni angei omusomus seni ach kewe tipis.
“En, ewe mwan, ka angei ewe pristut. Akkomwan ka angei ewe Pristut seni Aaron pwan ka tori wis meinisin non—deacon, teacher, me priest. Iwe a pwan tori ewe ran nupwen ka nimoch ne angei ewe Pristut seni Melkisetek. Ena pristut, ewe pristut mi tekia, wewen pwe ewe pristut mwirin napanap mi usunen pin seni Kot, ika ewe Pristut mi Pin mwirin Napanapen ewe Noun Kot (nengeni Alma 13:18; Ilaman 8:18; Doctrine and Covenants 107:2–4). Ka angei wisom non ewe pristut. En emon elter.
“Emon me emon ami oua fen angei ami feioch mi pin ika endowment. Non ena efeioch ka angei eu pwon mi tongeni nom fochofoch. Nge ekkei mettoch meinisin, mi usun chok, mettoch mi fis me mwen ka feito ngeni ei neni asor pwe ami oupwe tongeni riri fengen ewe mwan ren ewe fefin ren ei fansoun pwan tori feinfeino chok. Ami oua winiti eu famini, oua ngaseno ne fori manau, oua tufich ren ami angang me asor ne nounou semirit won ei fonufan me amarita ir non kinamwe; ne kuner eu ran nupwen ra tonong me fori ekkewe feiochun ewe tempel mi pin.
“Oua feito ren pwisin ami mochen pwan mi wor ekkewe aramas mi apasa pwe ami mi nimoch. Oua etiwafengeni kemi ne apupunu fengen non ewe pwonen apupunu eu wis mi watte, nge mi wor watte feioch.”
Ewe pochokunen ariri mi riri won fonufan me nang
Ika sia weweiti uruon pwan popunen angangen ewe tempel, sipwe pwan weweiti met ewe pochokunen ariri. Sipwe pwan ekieki pwata ewe mwumwuta ne fori ewe ariri mi kon auchea.
“Jises a feino ngnei ewe fonu a arap ngeni ewe teninimw Caesarea Phillipi, ikewe a eisini noun kewe chon kaeo, Met aramas ra era usun ewe Noun Aramas, i io? …
“Simon Peter a ponuweni, En ewe Messiah, Noun ewe Kot mi manau.
“Jises a ponuweni, En mi feioch Simon noun John! Pun ei kapas mi ennet ka sinei esap seni aramas, nge seni Semei non nang.
“Upwe pwan apasa, En Peter, me won ei achaw upwe aueta ai we mwichifel won o mano esap tongeni pwaracho ngeni.
“Upwe ngonuk ekkewe kien Mun nang: iwe minne kopwe fotekini won fonufan ewpe fotek won nang: o minne kopwe epichano won fonufan epwe pichino me won nang” (Matthew 16:13, 16–19).
Peter a wisen komoch ekkewe ki. Peter a wisen komoch ewe pochokunen ariri, na mwumwuta mi tongeni foti ika riri won fonufan ika pichino win fonufan iwe pwan inausun won nang. Ekkena kii mi nom ren ewe Presetenin ewe Mwichefen—ewe soufos, chon kuna, me chon pwarata. Na pochokun mi pin mi nom ren ewe Mwichefen iei. Ese pwan wor eu mettoch mi auchea ngeni ekkewe mi weweiti usun auchean ei mumuta. Ese wor met ra kon aucheani. Mi wor chokukkun mi angei ei pochokunen ariri won ewe fonufan non eu fansoun—non eu me eu tempel mi wor mwan mi fen angei ewe pochokunen ariri. Ese wor emon mi tongeni pwisin angei chinon chok mi angei seni ewe soufos, chon kuna, me chon pwarata, ewe Presetening Ewe Mwichefenin Jises Kraist ren Aramas mi Pin non Fansoun Soponon.
Ewe Soufos Joseph Smith mi apasa pwe fan chommong aramas mi kapas eis ngeni i, “‘Sise tongeni manau ika sise fori ekkewe feiochun?’ Upwe apasa, Ap, sise tongeni angei unusen ewe manau ese much. Jises a apasa, ‘Mi wor chommong imw mi nap non imwen Semei we, iwe Ngang upwe feino monata neniom.’ [Nengeni John 14:2.] Imwepwe wewen mun; pwan emon mi angei ewe ning mi nap epwe manaueni manauan mi tekia, me pwan unusen ewe annuk”(non History of the Church, 6:184).
Angangen ewe tempel mi eu neni sipwe angei pochokunen ngunuch
Ekkewe tempel ir nukunapen pochokunen ngunuch non ewe Mwichefen. Sipwe sinei pwe ewe tefin epwe mochen fiu rech non ewe Mwichefen pwan ren pwisin kich ren ach mochen ne fiti non ewe angang mi pin. Angangen ewe tempel mi awora chommong mi u ngeni pun eu minen apochokunata ngunuch am ekkewe Souneng me pwan tori unusen ewe Mwichefen.
Ren ewe Logan Utah Tempel ewe iotekin ewe foun nongonong, Presiten George Q. Cannon, I emon non ewe Aewin Presetensi, a apasa:
“Meinisin foun nongonong mi fori fan itan eu Tempel, me iteitan Tempel mi wesino ren ewe mwumwuta seni ewe Samon, mi ekisitiw an Setan pochokun won ewe fonufan, me awatteno ewe pochokunen Kot, a mokutukutu nang non pochokun fan itach, mi ngenikich me watiw woch ekkewe feioch seni ekkewe Kot mi Nap me ekkewe mi nom non nenier” (non “The Logan Temple,” Millennial Star, Nov. 12, 1877, 743).
Nupwen chon ewe Mwichefen mi osukosuk ika ra nom non eu fansoun mi weires, napangeni ra feino ngeni ewe tempel. Eu neni mi murino pwe sipwe uwei met mi aosukosuka kich. Non ewe tempel sia tongeni angei mettoch non pekin ngun. Ikkewe, non ena fansoun non ewe tempel, sia nom “nukun ewe fonufan.”
Fan ekkoch ekiekach mi nom won osukosuk mi pwan wor chommong mettoch mi afitikoko manauch non eu fansoun mi wieres pwe epwe fat ach ekieki. Non ewe tempel ewe mwirimwirin osukosuk mi kinamweno, ewe kiroch mi su senikich, sia tongeni kuna mettoch sise fen kuna me mwen pwan sia tongeni kuna eu an nukunapen ach kewe osukosuk sise fen sinei.
Ewe Samon epwe efeiochukich nupwen sia fori ewe angang mi pin non ewe tempel. Feioch esap chok nom ren ach angang non ewe tempel. Sipwe angei feioch non mettoch meinisin sia fori.
Ach angang non ewe tempel mi epetikich me tumunukich
Ese wor angang mi tumunu ei Mwichefen usun ewe angangen ewe tempel me forien ewe uroun ach kewe famini. Ese wor angang mi siwini ngunuch usun ei angang. Ese wor eu angang mi fang ngenikich ei sokkun pochokun. Ese wor angang mi kon aucheani ach tupwen usun ei angang.
Ach angang non ewe tempel mi epetikich me tumunukich, ren pwisin emon me emon pwan ren kich eu mwichen aramas.
Iwe feito ngeni ewe tempel—feito angei om kewe feioch. Mi eu angang mi pin.
© 2010 seni Intellectual Reserve, Inc. Meinisin pung mi kawor. A för non Amerika. Kapungunon non fasun Engenes: 6/09. Kapungunon chiakun: 6/09. Chiakun Visiting Teaching Message, October 2010. Chuukese. 09370 901